ខេត្តកំពង់ធំ៖ យោងតាមប្រភពព័ត៌មាន បានរាយការណ៍បានឲ្យដឹងថា នៅម៉ោង ៣ រំលងអាធ្រាត្រថ្ងៃទី៥ឈានចូលថ្ងៃទី៦ ខែកញ្ញា ឆ្នាំ២០១៥ រថយន្តយីឌុបរបស់ ក្រុមហ៊ុនដីសម្បទាន ហួតម៉េងរីតា បានក្រឡាប់ខ្ជាក់ចេញសុទ្ធតែឈើ ត្រូវប៉ាន់យ៉ាងច្រើនសន្ធឹកសន្ធាប់នៅចំនុច ទល់មុខមណ្ឌលសុខភាពកំពង់ថ្ម ក្នុងឃុំកំពង់ថ្ម ស្រុកសន្ទុក ខេត្តកំពង់ធំ ដែលបណ្តាលអោយ តៃកុងរថយន្តរងរបួសធ្ងន់ បញ្ជួនទៅសង្គ្រោះបន្ទាន់ នៅមន្ទីរពេព្យ។
ប្រភពបានលួចបង្ហើបឲ្យដឹងថា បន្ទាប់ពីរថយន្តខាងលើនេះ បានក្រឡាប់ភ្លាម មេការក្រុមហ៊ុន ហួតម៉េងរីតា នេះបានព្យាយាមរតការណ៍ បិតបាំងព័ត៌មាន កុំអោយមានការចុះផ្សាយ តែនៅតែមិនអាចបិតបាំងបាន ដូចពាក្យចាស់ពោលថា ˝ដំរីងាប់យកចង្អេទៅបាំងយ៉ាងមេចនិងជិត˝ព្រោះបច្ចុប្បន្ននេះបណ្តាញព៏តមានបច្ចេកវិទ្យាទំនើបរីកចំរើនខ្លាំងណាស់ពុំអាចបិទបាំងបានឡើយ។
ប្រភពបានបន្តថា រថយន្តក្រុមហ៊ុន ហួតម៉េងរីតា ដែលក្រឡាប់ខាងលើនេះ បានដឹកឈើ ចេញពីក្រុមហ៊ុនរបស់ខ្លួន ស្ថិតនៅក្នុងស្រុកអន្លង់វែង ខេត្តឧត្តរមានជ័យ ជាប់ព្រំប្រទល់ខេត្តសៀមរាប ជាប់ជាមួយតំបន់ គូលេនព្រហ្មទេព ដែលជាតំបន់ព្រៃការពារ របស់រដ្ឋ។
ប្រភពបែកធ្លាយមិនទាន់ជាផ្លូវការណ៍ បានបង្ហើបថា ក្រុមហ៊ុនហួតម៉េងរីតា មិនបានដាំដំណាំ កៅស៊ូគ្រប់តាមការសន្យា ជាមួយរាជរដ្ឋាភិបាលនោះទេ បានត្រឹមតែកាប់ឈើ ដឹកលក់ចែកចាយគ្រប់ខេត្តក្រុង ឡើងរូងថ្នល់រលាយហិនហោចតែប៉ុណ្ណោះ ហើយកាលពីជិត១ឆ្នាំមុន រថយន្តក្រុងហ៊ុនមួយនេះ ក៏បានក្រឡាប់នៅខេត្តសៀមរាប ម្តងរួចទៅហើយ។
ប្រភពបានអោយដឹងទៀតថា ថៅកែក្រុមហ៊ុននេះ ឈ្មោះ លោកជ័យ (ឈ្មោះហៅក្រៅ) មានឋានៈផ្កាយ២កងអង្គរក្ស របស់លោកឧត្តមសេនីយ៍ឯក យឹមលាង កូនលោកឧបនាយក រដ្ឋមន្ត្រីយឹម ឆៃលី ដែលត្រូវបានគេស្គាល់ថាជា ដន្លងជាមួយលោកនាយករដ្ឋមន្ត្រី ហ៊ុនសែន ហើយបច្ចុប្បន្នត្រូវបានប្ដូរទៅជា អគ្គស្នងការរងនគរបាលជាតិពាក់ផ្កាយ៣។
អ្នកយកព័ត៌មានយើង មិនអាចសុំការបកស្រាយពីលោក ជ័យ ដែលជាថៅកែក្រុមហ៊ុនហួតម៉េងរីតានេះបានទេ ព្រោះមិនមានលេខទូរស័ព្ទសំរាប់ធ្វើការទំនាក់ទំនង ចំណែកឯលោក ប៊ុលបាន ដែលធ្លាប់បានអះអាងពីមុនៗថា ជាក្មួយរបស់លោក ជ័យ និងជាមេការរតការតាមដងផ្លូវនោះ ក៏មិនអាចសុំការបកស្រាយបានដែរ ព្រោះទូរស័ព្ទចូល២ដង តែគ្មានអ្នកទទួល៕ ដោយ៖ ផ្លុង-រ៉េត
