នាវាចម្បាំងចិន៥គ្រឿង បង្ហាញខ្លួន នៅសមុទ្រអាឡាស្ការ ធ្វើឲ្យអាមេរិក ព្រួយបារម្ភយ៉ាងខ្លាំង

កាលពីថ្ងៃទី២ខែកញ្ញា២០១៥ នាវាចម្បាំង៥គ្រឿងរបស់ចិន បានបង្ហាញវត្តមាននៅសមុទ្រ Bering ស្ថិតនៅដែនសមុទ្ររដ្ឋអាឡាសក្ការអាមេរិក ធ្វើឲ្យអាមេរិកព្រួយបារម្ភយ៉ាងខ្លាំង។ សារព័ត៌មានWall Street Journal បានដកស្រងសម្តី មន្ត្រីក្នុងក្រសួងការពារជាតិអាមេរិក បានផ្សាយថា ទាហានការពារដែនសមុទ្រអាមេរិក បានប្រទះឃើញនាវាចម្បាំង៣គ្រឿង នាវាជំនួយមួយគ្រឿងនិង នាវាវាយឡើងគោក១គ្រឿងទៀត កំពុងតែធ្វើដំណើរឆ្ពោះទៅកោះAleutian ជាកន្លែងបែងចែគដែនទឹក រវាងអាមេរិកនិងរុស្ស៊ីគ្រប់គ្រង។
លោកBill Urban អ្នកនាំពាក្យក្រសួងការពារជាតិអាមេរិក បានឲ្យដឹងថា «យើងបានមើលឃើញនាវា របស់កម្លាំងទាហានជើងទឹកបដិវត្តប្រជាជនចិន នៅតំបន់សមុទ្រBering ជាលើកដំបូង ដោយកន្លងមក មិនមាននៅទីនេះឡើយ»។ វត្តមានរបស់នាវាចម្បាំងចិន នៅដែនសមុទ្រអាមេរិក បានបង្ហាញយ៉ាងច្បាស់ថា ចិនកំពុងតែពង្រីកសកម្មភាព នៅតំបន់សមុទ្រឆ្ងាយ ក្នុងនោះមានដែនសមុទ្រអាមេរិកជាដើម។ តាមអ្នកឯកទេសយោធាអាមេរិក បញ្ចាក់ថានៅពេលនេះចិន កំពុងតែឆ្ពោះទៅដែនទឹកអាមេរិក ដើម្បីកាត់បន្ថយកម្លាំងអាមេរិក នៅក្នុងតំបន់អាស៊ី ទាំងនោះ ហើយអាចធ្វើឲ្យចិន ធ្វើព្យុះភ្លៀងនៅអាស៊ី ដោយមិនមានការរារាំង ពីអាមេរិកឡើយ៕