ខេត្តបាត់ដំបង ៖ នៅរសៀលថ្ងៃសៅរិ៍ ទី០៣ ខែមិថុនា ឆ្នាំ២០២៣ ឯកឧត្តម ប៊ុន ហុន ប្រធាន និង ឯកឧត្តម ឡាំ ជា អនុប្រធានទី១ នៃក្រុមការងារគណបក្សប្រជាជនកម្ពុជា ចុះជួយស្រុកគាស់ក្រឡ ខេត្តបាត់ដំបង បានអញ្ជើញដឹកនាំកិច្ចប្រជុំដើម្បីពង្រឹងសកម្មភាពការងារ ត្រៀមលក្ខណៈសម្រាប់ការឃោសនាបោះឆ្នោតជ្រើសតាំងតំណាងរាស្រ្ត នីតិកាលទី៧ ដោយមានការចូលរួមពីសំណាក់ ឯកឧត្តម លោកជំទាវ លោក លោកស្រី ជាអនុប្រធានសមាជិក សមាជិកាក្រុមការងារថ្នាក់ស្រុក និងប្រធាន អនុប្រធានសមាជិក សមាជិកាក្រុមការងារឃុំទាំង៦ ក្នុងស្រុកគាស់ក្រឡ។
កិច្ចប្រជុំនេះ ត្រូវបានរៀបចំឡើងដើម្បីពិភាក្សារៀបចំយុទ្ធសាស្រ្ត ត្រៀមលក្ខណៈសម្រាប់យុទ្ធនាការឃោសនាបោះឆ្នោត និងដើម្បីស្តាប់របាយការណ៍ អំពីបញ្ហាប្រឈមនានា ចំនុចខ្លាំង ចំនុចខ្សោយ និងវិធីដោះស្រាយបញ្ហានានានៅតាមបណ្តាឃុំទាំង៦ ដែលលើកឡើងដោយប្រធានក្រុមការងារឃុំទាំង៦ សំដៅធានាអោយបាននូវជ័យជម្នះលើការបោះឆ្នោតជ្រើសតាំងតំណាងរាស្រ្តដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខ។
ក្នុងឱកាសនោះដែរ ឯកឧត្តម ប្រធានទាំងពីរ បានផ្តល់អនុសាសន៍ជាយុទ្ធសាស្រ្តសំខាន់ៗដល់ក្រុមការងារ អំពីការពង្រឹងសកម្មភាពការងារ ការឃោសនារកសំលេងឆ្នោត ដើម្បីភាពទាក់ទាញប្រជាប្រិយភាព ជាពិសេសត្រូវអនុវត្តអោយមានប្រសិទ្ធិភាពខ្ពស់លើសេចក្តីណែនាំលេខ ០៣៣/០៦២៣/លគ.គគ ចុះថ្ងៃទី០២ ខែមិថុនា ឆ្នាំ២០២៣ របស់គណៈអចិន្រ្តៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា។
ឯកឧត្តម បានណែនាំអោយក្រុមការងារមានសាមគ្គីភាពផ្ទៃក្នុងអោយបានរឹងមាំ ហើយត្រូវបន្តយកចិត្តទុកដាក់ដោះស្រាយរាល់សំណើ និងសំណូមពររបស់ប្រជាពលរដ្ឋ៕
