ខេត្តកំពង់ចាម៖ ការចិញ្ចឹមត្រីឆ្ដោរ នៅក្នុងប្រទេសកម្ពុជា ត្រូវបានច្បាប់ហាមឃាត់ និងមានសារាចរណ៍ណែនាំ របស់ប្រមុខរដ្ឋាភិបាល បញ្ឈប់មិនអោយចិញ្ចឹមត្រីឆ្ដោរ ជាប្រភេទត្រីស៊ីគ្នាវាជាចំណី បណ្ដាលអោយត្រី ក្នុងបឹងទន្លេសាប មានការថយចុះ ។ បើទោះយ៉ាងណាក្តី គេសង្កេតឃើញ ក្រុមអ្នកមានលុយ មានទំនាក់ទំនងល្អ ជាមួយអ្នកមានអំណាច ធ្វើការចិញ្ចឹមត្រីឆ្ដោររាប់សែនក្បាល នៅតាមស្រះធំៗជាច្រើនស្ថិតនៅក្នុង ឃុំព្រែកកុយ ស្រុកកងមាស ខេត្តកំពង់ចាម។
យោងតាមសេចក្ដីរាយការណ៍ពីប្រជាពលរដ្ឋ នៅភូមិគងជ័យ និង ភូមិក្រហេ បានអោយដឹងថា ក្រុមឈ្មួញជាអ្នកមានលុយ ចិញ្ចឹមត្រីឆ្ដោរ តាមស្រះទាំងនេះជាច្រើនឆ្នាំកន្លងមកហើយ នៅក្នុងចំណុចទួលពពាលខែ និងចំណុច មេទឹកបឹងច្រកធំ ស្ថិតនៅខាងក្រោយភូមិគងជ័យ និងភូមិអន្លង់គគីរ ឃុំព្រែកកុយ មានស្រះធំៗចំនួន១០ស្រះ និងមានត្រីឆ្ដោរជាច្រើនម៉ឺនក្បាល ដែលគេស្គាល់ម្ចាស់ឈ្មោះ ថៃនិង ឈ្មោះ យាក ជាជនជាតិវៀតណាម ពួកគេចិញ្ចឹមបានដោយរលូន គ្មានការរំខានពីមន្ត្រីជំនាញឡើយ។
ប្រភពដដែលបានបន្តថា ក្រុមឈ្មួញចិញ្ចឹមត្រីឆ្ដោរខាងលើ គ្មានមន្ត្រីជំនាញធ្វើការបង្ក្រាបម្ដងណាឡើយ ធ្វើអោយពួកគាត់មានការសង្ស័យ មន្ត្រីជំនាញគ្រប់លំដាប់ថ្នាក់ក្នុងមូលដ្ឋាន ត្រូវរ៉ូវគ្នា តាមបែបអំពើពុករលួយជាប្រពន្ធ័ ទើបក្រុមឈ្មួញហ៊ានដឹក កូនត្រីឆ្ដោរពីប្រទេសវៀតណាម ទាំងរថយន្តៗ មកចិញ្ចឹមក្នុងស្រះ និងចែកចាយបន្ត មិនភ័យខ្លាចទៅនិងច្បាប់ និង ហ៊ានផ្គើនទៅនិងអនុសាសន៍របស់ប្រមុខរដ្ឋាភិបាល សម្តេចតេជោ ហ៊ុន សែន ជាហេតុនាំអោយបទល្មើសកើនឡើង ដូចជារបាំងស្បៃមុងកំពុងចាប់កូនត្រីល្អិតៗ ក្នុងរដូវបិតនេសាទនេះ រាប់សឹបតោនក្នុងមួយថ្ងៃៗដឹកតាមរថយន្តយកមកចែកចាយធ្វើចំណីត្រីឆ្ដោរទាំងនោះ។
ជុំវិញករណីខាងលើ លោកអ៊ុក ណារិននាយខណ្ឌ័ជលផលខេត្តកំពង់ចាម នៅពេលអ្នកយកពត៌មានយើង ទូរស័ព្ទទៅលោកសុំការបំភ្លឺ លោកបាននិយាយថា គាត់មិនបានដឹងទេ រួចបិទទូរស័ព្ទចោល ។
