ខេត្តបន្ទាយមានជ័យ ៖ កម្លាំងនគរបាលការិយាល័យប្រឆាំងការជួញដូរមនុស្ស និងការពារអនិតិជន នៃស្នងការខេត្ត បន្ទាយមានជ័យបានចុះប្រតិបត្តិការណ៍បង្ក្រាប និងទប់ស្កាត់ពលករបម្រុងលួចឆ្លងដែន ទៅប្រទេសថៃ ដើម្បីរកការងារធ្វើ នៅម៉ោង ១២ រសៀល ថ្ងៃទី១៦ ខែឧសភា ឆ្នាំ២០១៤ ត្រង់ចំណុចអាងសិលា ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
នាយការិយាល័យវរសេនីយ៍ត្រី ឡាយ គឹមលូន បានប្រាប់ឲ្យដឹងថា ក្រោយពីបានទទួលព័ត៌មានពីមហា ជន រស់នៅចំណុចខាងលើនេះ និងយោងតាមបញ្ជាពីឧត្តមសេនីយ៍ត្រី ស្នងការខេត្តបានដាក់បញ្ជា យ៉ាងតឹងរឹង ពីបញ្ហាពលករចំណាកស្រុកទៅរកការងារធ្វើនៅប្រទេសថៃ បច្ចុប្បន្ននេះនយោបាយ ក្នុងប្រទេសថៃកំពុងនៅថៃកំពុងវឹកវរផងនោះ អាចក្រុមខិលខូចជនជាតិថៃ ធ្វើបាប ទាត់ធាក់ទៅលើពលរដ្ឋខ្មែរ បានលួចឆ្លងដែនទៅរកការងារធ្វើនៅក្នុងប្រទេសថៃ ជាពិសេស ថ្មីៗនេះ គេឃើញមានកើតឡើងគ្រោះថ្នាក់ចរាចរ នៅថៃជាបន្តបន្ទាប់ វឹកវរ បណ្តាលឲ្យពលករស្លាប់ ជាច្រើននាក់ត្រូវបានក្រុមសមត្ថកិច្ចថៃបញ្ជូនមក កាន់ទឹកដីកម្ពុជាផងដែរ ។
នាយការិយាល័យបានបន្តថា ប្រតិបត្តិការណ៍បង្ក្រាបនេះខាងលើនេះ បានឃាត់ខ្លួនពលករសរុបចំនួន២៤នាក់ រួមទាំងស្រី៤នាក់ មានស្រុកកំណើតនៅ ស្រុកអង្គរជុំ ខេត្តសៀមរាប បានប្រាប់ចំពោះមុខសមត្ថកិច្ចថា ពួកខ្លួនបានចំណាកស្រុកទៅរកការងារធ្វើក្នុង ប្រទេសថៃនេះ គឺមកដោយតាមរយះមេខ្យល់ ដោយក្នុងម្នាក់តម្រូវយកប្រាក់ចំនួន២០០០បាត (លុយថៃ) ខ្លះទៀត ២៥០០ បាតឯណោះ ពួកគាត់បានដាក់ប្រចាំដីស្រែចំការ និងទ្រព្យសម្បត្តិមួយចំនួនផងនោះ។
លុះដល់ចំណុចត្រូវជិតដល់ជាយដែន កម្ពុជា ថៃ ភ្លាមនោះមេខ្យល់បានរត់គេចខ្លួនបាត់ស្រមោលតែម្តង ដោយទុកពួកគាត់ចោល ចំណុចខាងលើនេះ ក៏ត្រូវបានសមត្ថកិច្ចឃាត់និងសាកសួរនាំដូច្នេះ ។ ក្រោយពីបានបង្ក្រាបបានពលករខាងលើសមត្ថកិច្ចបានណែនាំនិងពន្យល់ពីបញ្ហាចំណាកស្រុកទៅរកការងារធ្វើនៅតាមប្រទេសផ្សេង និងបានអោយពលករខាងលើធ្វើកិច្ចសន្យាឈប់មកលួចឆ្លងដែនខុសច្បាប់ ដូចនេះទៀត បន្ទាប់មក សមត្ថកិច្ចបានអោយក្រុមពលករទាំងនោះវិលត្រឡប់ទៅស្រុកកំណើតរៀងៗខ្លួន ៕
ដោយចិន្តា
