កីឡា ៖ នៅក្នុងសន្និសីទកាសែតនៅពហុកីឡដ្ឋានជាតិមរតកតេជោ កាលពីថ្ងៃទី២៨ ខែមេសា ឆ្នាំ២០២៣បានបញ្ជាក់ថា កម្ពុជាបានត្រៀមមេដាយសរុបចំនួន ៥១៥១គ្រឿង ដែលជាមេដាយមាស ប្រាក់ សំរឹទ្ធ សម្រាប់បំពាក់ជូនអត្តពលិក ក្នុងព្រឹត្តិការណ៍កីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ ក្នុងនាមជាម្ចាស់ផ្ទះ។ នេះបើយោងតាមសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC) ។
សម្តេចពិជ័យសេនា បានលើកឡើងថា ក្នុងព្រឹត្តិការណ៍ស៊ីហ្គេមនេះ មានប្រភេទកីឡាចំនួន ៣៧ និងមានវិញ្ញាសាប្រកួតរហូតដល់ចំនួន ៥៨៦វិញ្ញាសា។ ក្នុងនោះ ១វិញ្ញាសា ១មេដាយមាស។ បើតាមសេចក្តីរាយការណ៍ដំបូងដែលសម្តេចទទួលបាន គឺមានប្រតិភូកីឡាចំនួន ១២៤០៤រូប មកពីប្រទេសទាំង១១ ចូលរួមក្នុងព្រឹត្តិការណ៍នេះ ក្នុងនោះ ថៃច្រើនជាងគេ ខណៈទីម័រឡេស្តតិចជាងគេ៕
