ខេត្តព្រះវិហារ៖ រថយន្តសណ្តោងរ៉ឺម៉ក ដឹកស៊ីម៉ង់ ជ្រុលចង្កូត ធ្លាក់ចូលទៅម្ខាងផ្លូវ ក្រឡាប់ផ្ងាជើង នៅក្បែរស្ពានឆ្លងស្ទឹងសែន ព្រះវិហារទៅ ស្ទឹងត្រែង ខណៈដែលរថយន្តខាងលើ ជាន់ហ្វ្រាំង បម្រុងឈប់សួរនាំអ្នកភូមិ ផ្លូវទៅកាន់ខេត្តស្ទឹងត្រែង តែដោយសារតែរថយន្តធ្ងន់ពេក ធ្វើឲ្យរ៉ឺម៉កសណ្តោងច្រានរថយន្ត ធ្លាក់ផ្លូវតែម្តង ។
តាមសាក្សី នៅកន្លែងកើតហេតុ បានឲ្យដឹងនៅព្រឹកថ្ងៃទី២៦ ខែសីហា ឆ្នាំ២០១៥នេះថា រថយន្តខាងលើមានល្បឿនយឺតៗ បម្រុងឈប់សួរ អ្នករស់នៅក្នុងភូមិ ក្បែរផ្លូវកែង ឆ្លងស្ពានស្ទឹងសែន ព្រះវិហារទៅ ស្ទឹងត្រែង ឋិតក្នុងភូមិដំណាក់ សង្កាត់កំពង់ប្រណាក ក្រុងព្រះវិហារ តែចៃដន្យអ្នកបើកបរ បានជាន់ហ្វ្រាំងយ៉ាងណា នៅតែទប់មិនជាប់ ដោយសារមេឃភ្លៀងរលឹមផង ធ្វើឲ្យរថយន្តរអិលធ្លាក់តែម្តង ។
សមត្ថកិច្ច អធិការដ្ឋាននគរបាលក្រុងព្រះវិហារ ក៏បានបញ្ជាក់ឲ្យដឹងថា អ្នកបើកររថយន្តសណ្តោងរ៉ឺម៉កខាងលើឈ្មោះ មឿង វិចិត្រ អាយុ៤០ឆ្នាំ រស់នៅភូមិស្វាយរលំ ឃុំស្វាយរលំ ស្រុកស្អាង ខេត្តកណ្តាល មានព្រូឡានម្នាក់ បានដឹកស៊ីម៉ង់ត៍ពី ក្រុងបោយប៉ែត ឆ្លងកាត់ក្រុងព្រះវិហារ បម្រុងឆ្ពោះទៅកាន់ខេត្តស្ទឹងត្រែង លុះមកដល់ ចំណុចកើតហេតុខាងលើ ចំចំណុចផ្លូវកែងផង ធ្វើឲ្យអ្នកបើកបរ យកចង្កូតមិនទាន់ ដោយសារតែរថយន្តខាងលើ មានទម្ងន់ធ្ងន់ ជាន់ហ្វ្រាំងមិនជាប់ ក៏ជ្រុលចង្កូត ក្រឡាប់ធ្លាក់ចូលជ្រលងអូរតែម្តង ។
សូមបញ្ជាក់ថា ក្នុងហេតុការណ៍គ្រោះថ្នាក់ចរាចរណ៍នេះដែរ មិនបណ្តាលឲ្យរបួស ឬគ្រោះថ្នាក់ ដល់អាយុជិវិតនរណាម្នាក់ឡើយ ។ មកដល់ពេលនេះ ម្ចាស់រថយន្ត កំពុងជញ្ជូន ស៊ីម៉ង់ត៍ នឹងស្ទូចរថយន្ត ចេញពីកន្លែងកើតហេតុ ។
