ខេត្តកោះកុង ៖ មន្រ្តីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ បានប្រាប់ដល់យុវជនខេត្តកោះកុង ព្រមទាំងយុវជនក្នុងប្រទេសទាំងអស់ត្រូវចេះប្តូរផ្នត់គំនិតពីធ្វើការឱ្យគេទៅជាថៅកែរបស់គេវិញម្តង ទើបជីវភាពល្អប្រសើរ។
ក្នុងពិធីសម្ពោធអគារវិទ្យាស្ថានពហុបច្ចេកទេសខេត្តកោះកុង និងប្រគល់សញ្ញាបត្រដល់ជូននិស្សិតចំនួន៤០០នាក់ នៅព្រឹកថ្ងៃទី៩ ខែកុម្ភៈ ឆ្នាំ២០២៣ ឯកឧត្តម ពេជ សោភ័ន រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានបំផុសស្មារតីដល់យុវជនទាំងអស់គប្បីរួមគ្នាគិតអ្វីដែលល្អប្រសើរជីវិតរបស់ខ្លួនម្នាក់ៗតាមរយៈការផ្លាស់ប្តូរគំនិតចាស់ដដែលទៅរកអ្វីដែលថ្មីសម្រាប់ជីវភាពរស់នៅ។ការផ្លាស់ប្តូរនេះ ត្រូវបានឯកឧត្តម ពេជ សោភ័ន សំដៅទៅលើយុវជនដែលកំពុងធ្វើការងារឱ្យប្រចាំថ្ងៃ កុំពឹងផ្អែកតែលើប្រាក់ខែមួយមុខគត់ ពោលគឺចេះមានទំនួលខុសត្រូវខ្ពស់ ឥរិយាបថ និងប្តូរគំនិតទៅធ្វើជាថៅកែគេវិញម្តង ទើបជារឿងល្អសម្រាប់ជីវិត។ ប្រសិនណានៅតែប្រកាន់យកទម្លាប់អាក្រក់ យើងនឹងបរាជ័យគ្មានអ្វីប្រែប្រួលអភិវឌ្ឍន៍នោះទេ។
ទន្ទឹមនឹងប្រទេសជាតិ ការអភិវឌ្ឍន៍ផ្នែកឧស្សហកម្មជំនាន់០.៤ ឯកឧត្តម ពេជ សោភ័ន ក៏រំពឹងទុកជាមុនថា សិស្ស និស្សិត និងយុវជន បន្តប្រឹងអភិវឌ្ឍន៍សមត្ថភាពជំនាញរបស់ខ្លួនបន្ថែម ដើម្បីឈានចាប់យកឱកាសទីផ្សារការងារទទួលបានប្រាក់ចំណូលច្រើន ចៀសជាងការងារប្រើកម្លាំងពលកម្ម ទន្ទឹមនឹងប្រព័ន្ធបច្ចេកវិទ្យាកំពុងផ្លាស់ប្តូរឆាប់រហ័ស។
ដោយឡែកលោកជំទាវ មិថុនា ភូថង បានវាយតម្លៃខ្ពស់ចំពោះកិច្ចប្រឹងប្រែងចំណាយពេលវេលាសិក្សាក្រេបយកចំណេះដឹងរបស់ពេល៤ឆ្នាំទំរាំមានថ្ងៃនេះរបស់សិស្ស និងនិស្សិតនៅខេត្តកោះកុង ព្រមទាំងឆ្លើយតបសេចក្តីត្រូវការការងារនៅក្នុងខេត្តផង និងក្នុងប្រទេសផង គ្រាប្រទេសជាតិមានម្លប់សុខសន្តិភាពដឹកនាំដោយសម្តេចតេជោនាយករដ្ឋមន្រ្តី។
លោកជំទាវ មិថុនា ភូថង អភិបាលខេត្តកោះកុង ក៏លើកឡើងដែរថា រាជរដ្ឋាភិបាល កម្ពុជានៅតែបន្តផ្ដោតជាសំខាន់លើការអភិវឌ្ឍធនធានមនុស្ស តាមរយៈការពង្រឹងគុណភាព វិស័យអប់រំ ការលើកកម្ពស់ សេវាសុខភាពសាធារណៈ និងការគាំពារសង្គម ដោយផ្តោតការយកចិត្តទុកដាក់ និងគិតគូរដល់ប្រជាពលរដ្ឋក្រីក្រ និងងាយរងគ្រោះ ដូចជាស្ត្រី និងកុមារជាដើម និងជាមូលដ្ឋានគ្រឹះក្នុងការអភិវឌ្ឍខេត្តកោះកុងរបស់យើង ក៏ដូចជាប្រទេសជាតិទាំងមូលឱ្យបាន កាន់តែល្អប្រសើរជាលំដាប់។
អ្នកអង្គម្ចាស់បណ្ឌិត ស៊ីសុវត្ថិ ឬទ្ធីរ៉ាវង្ស អត្រាសិស្ស និស្សិត មានការងារធ្វើ បន្ទាប់ពីបញ្ចប់ការសិក្សារយៈពេល៣ខែ មានការងារធ្វើ៨៥ភាគរយ ដោយមានដៃគូសហប្រតិបត្តិការជាមួយក្រុមហ៊ុន និងសហគ្រាសរង់ចាំទទួលចូលធ្វើការ។ មុននឹងក្លាយជាវិទ្យាស្ថាន គឺមជ្ឈមណ្ឌលវិជ្ជាជីវៈខេត្តកោះកុង បានផ្តល់បណ្តុះបណ្តាលជំនាញអគ្គិសនី អេឡិចត្រូនិច សំណង់ និងកំព្យូទ័រ បានផ្តល់ចំណេះដឹងកម្រិតបរិញ្ញាបត្រ បរិញ្ញាបត្ររងជូនដល់សិស្សនិស្សិតសរុបជាង២ម៉ឺននាក់/ស្រ្តី១ម៉ឺននាក់៕
