រថយន្តដឹកឈើក្រឡាប់ មេការឩកញ៉ាអុល ចេញមុខកាង សមត្ថកិច្ចមិនហ៊ានក្អក

ខេត្តក្រចេះ៖ រថយន្តយីឌុបភ្លៅ៥ ដឹកឈើប្រណិតជាង៧០ម៉ែត្រគីប បានក្រឡាប់ បង្កការភ្ញាក់ផ្អើលដល់ ប្រជាពលរដ្ឋនៅត្រង់ចំណុច K3 ផ្លូវចូលក្រុមហ៊ុន៩៩៩៩ ចម្ងាយប្រមាណ១០០ម៉ែត្រ ពីផ្លូវលេខ៧៦ ក្នុងភូមិក្រញូងសែនជ័យ ឃុំឃ្សឹម ស្រុកស្នួល ខេត្តក្រចេះ កាលពីយប់ថ្ងៃទី២៦ សីហា ។

ហេតុការណ៍ក្រឡាប់រថយន្ត ហើយក្អួតចេញឈើប្រណិតខុសច្បាប់នោះ បណ្តាលឲ្យកកស្ទះចរាចរមួយរយះផងដែរ ទំរាំក្រុមសមត្ថកិច្ច ស្ទួចរថយន្តចេញ។ចំណែក មូលហេតុដែលបណ្តាលឲ្យក្រឡាប់នោះ ព្រោះតែរថយន្តផ្ទុកឈើប្រណិតច្រើនពេកលើសទំងន់ គ្រាដែលផ្លូវកំពុងរងទឹកភ្លៀងនិងទន់ជ្រាយ ជាហេតុធ្វើឲ្យផុងកង់រថយន្តក្រឡាប់តែម្តង ហើយផ្លូវជាតិមួយចំនួន ត្រូវខូចខាតយ៉ាងធ្ងន់ធ្ងរក៏ដោយសាររថយន្តដឹកលើសទម្ងន់។

ទាក់ទងការក្រឡាប់រថយន្ត ផ្ទុកឈើប្រណិតខុសច្បាប់រាប់សិបម៉ែត្រគីបនោះ ត្រូវបានក្រុមអ្នកសារពត៌មានចុះយកពត៌មាន និងថតរូបយ៉ាងច្រើនកុះករផងដែរ ។ ប៉ុន្តែមិនមានសារ ពត៌មានណា ហ៊ានចុះផ្សាយនោះឡើយ ព្រោះតែមេកាលោកឧកញ៉ា សឹង្ហ សំអុលមួយរូប បានឈរកាងនៅទីនោះ រួមជាមួយការសន្យាថា នឹងផ្តល់លុយឲ្យ ដើម្បីជាថ្នូរកុំឲ្យមានការចុះផ្សាយ។
​

យ៉ាងណាក៏ដោយ អ្នកឃើញហេតុការណ៍ខាងលើនេះបានលើកឡើងថា ករណីក្រឡាប់រថយន្តដឹកឈើនោះ ជាភស្តុតាងនៃអំពើពុករលួយ និងឥតប្រកែកបាន ដែលបង្កឡើងដោយក្រុមដៃជើង របស់លោកឧកញ៉ា សឹង្ហ សំអុល តែម្តង រួមទាំងភស្តុតាង ដើម្បីចង្អុលមុខក្រុមជន កាប់បំផ្លាញព្រៃឈើយ៉ាងរង្គៀលនៅកម្ពុជា ។

រហូតមកដល់ពេលនេះ ពុំមានបណ្តាញពត៌មានណាមួយ ចេញផ្សាយពត៌មានទាក់ទងការក្រឡាប់រថយន្តដឹកឈើប្រណិតល្មើសច្បាប់ខាងលើ របស់ឧកញ៉ា សឹង្ហ សំអុល នោះទេ ព្រោះថាពួកគេប្រហែលជា រង់ចាំការសន្យាផ្តល់លុយពេលបំណាច់ខែ របស់មេការឧកញ៉ា អុល នោះហើយ។

ប្រភពព័តមានចុងក្រោយឲ្យដឹងថា ឈើដែលផ្ទុកក្នុងរថយន្តភ្លៅ៥ ហើយក្រឡាប់នោះជាឈើ របស់មន្រ្តីនគរបាលខេត្តក្រចេះមួយរូបទៅវិញ ។ ប៉ុន្តែមូលហេតុដែលមេការឧកញ៉ា សឹង្ហ សំអុល ចេញមុខការពារនោះ ព្រោះថា មេកាឧកញ៉ា អុល ឈ្មោះ ថុន គឺជាជនល្បីឈ្មោះ ខាងរត់ការកាងរថយន្តដឹកឈើខុសច្បាប់តាមដងផ្លូវ ដោយសារតែគេស្គាល់មន្ត្រីជំនាញនិងសមត្ថកិច្ចគ្រប់ច្រកល្ហក រួមទាំងចេះសំរបសំរួលទំនាក់ទំនងល្អ តាមរយះប្រើដុល្លាញាត់មាត់សមត្ថកិច្ច ដូច្នេះហើយទើបគេប្រគល់សិទ្ធិឲ្យមេការូបនោះ ឈរកាងនិងរត់ការផ្លូវ រថយន្តដឹកឈើប្រណិតខុសច្បាប់ខាងលើនេះតែម្តងទៅ។

ការកត់សម្គាល់នោះ គឺក្រុមឧកញ៉ា អុល កំពុងរកស៊ីមុខរបរមិនស្របច្បាប់ ដូចជាការកាប់បំផ្លាញនិងជំនួញឈើតែម្តង ហេតុដូច្នេះហើយទើប ឈ្មោះលោកឧកញ៉ា សឹង្ហ សំអុល ត្រូវបានប្រជាជនស្គាល់ជាទូទៅថា ជាមេក្លោងរកស៊ី និងកាប់បំផ្លាញព្រៃឈើយ៉ាងសកម្មនៅកម្ពុជា ហើយទោះបីជាមានឈ្មោះអាស្រូវ ក៏សមត្ថកិច្ជពុករលួយមួយចំនួន ធ្វើមិនដឹងមិនលឺ ទើបលោកឧកញ៉ារូបនោះ នៅតែជួបសំណាងល្អ ជារៀងរហូត ក្នុងអាជីវកម្មុខជំនួញខុសច្បាប់របស់ខ្លួនយ៉ាងរលូន ព្រោះតែក្រុមសមត្ថកិច្ចជំនាញរដ្ឋបាលព្រៃឈើ រួមទាំងអាជ្ញាធរពាក់ព័ន្ធ សុទ្ធតែលូកដៃទទួលលុយកខ្វក់ របស់លោកឧកញ៉ា អុល ។

ប្រជាពលរដ្ឋសុំអោយ រាជរដ្ឋាភិបាលចាត់វិធានការណ៏ច្បាប់ ជាបន្ទាន់ទៅលើក្រុមឩកញ៉ាអុល ដែលជំនាញខាងរកស៊ីឈើខុសច្បាប់ នឹងកំពុងបំផ្លាញសម្បត្តិព្រៃឈើ៕

គេហទំព័រយើងពុំអាចសុំការបំភ្លឺពីឩកញ៉ាអុលបានទេព្រោះគ្មានលេខទូរសព្ទ័៕