បន្ទាយមានជ័យ៖ សត្វមាន់ ទា ជ្រូក គោក្របី និងទំនិញផ្សេងៗ ទៀតពីប្រទេសថៃ កំពុងតែចរាចរ យ៉ាងគគ្រឹកគគ្រេង តាម ច្រករបៀងតូចៗ ខុសច្បាប់ ស្ថិតនៅក្នុងភូមិឃុំ អូរបីជាន់ ស្រុកអូរជ្រៅ ខេត្តបន្ទាយមានជ័យ ដែលពុំមានសមត្ថកិច្ចជំនាញ ឬអាជ្ញាធរណាទប់ស្កាត់បានឡើយ ។
ប្រជាពលរដ្ឋរស់នៅក្នុងភូមិឃុំ អូរបីជាន់ បានឱ្យដឹងថា មិនថា តែថ្ងៃ ឬយប់ជ្រៅនោះទេ ដែលច្រករបៀងទាំងនេះ គ្រប់គ្រងដោយទាហ៊ាន កងពល៥១ ដែលមានអ្នកគ្រប់គ្រងច្រកមានខ្នងបង្អែកជាមេភូមិភាគ៥ បានបើកអោយមានទំនិញគេចពន្ធនាំចេញពីប្រទេសថៃចូល កម្ពុជាយ៉ាងគគ្រឹកគគ្រេងជាងច្រកតំបន់បឹងត្រកួន និងម៉ាឡៃ។
ប្រភពដដែលឲ្យដឹងទៀតថា ទំនិញភាគច្រើនដែលនាំចូលតាមច្រកនេះមានដូចជា មាន់ ទា ជ្រូក គោក្របី និងទំនិញផ្សេងៗ។ ការនាំចូលទំនិញទាំងនេះដូចជា មាន់ គឺនាំចូលនៅពេលយប់ជ្រៅតាមរថយន្តនីស្សាន់ រថយន្តតូរីសនិងរថយន្តកាមរី ក្នុងការនាំចូលម្តងៗរាប់ពាន់ក្បាល ។
លោក ហ៊ុយ ទូច ប្រធានការិយាល័យបសុពេទ្យនិងផលិតកម្មខេត្តបន្ទាយមានជ័យបានអោយដឹងថា ជាមួយនឹងការនាំចូលមាន់ ទា ជ្រូក គោក្របី ខាងលើសមត្ថកិច្ចរបស់លោកពុំដែលនៅស្ងៀមនោះទេ គឺតែងចេញប្រតិបត្តិការស្រាវជ្រាវបង្ក្រាបបានជាបន្តបន្ទាប់ តែការបង្ក្រាបនេះនៅមិនទាន់គ្រប់គ្រាន់ និងការនាំចូលល្មើសច្បាប់ពីឈ្មួញឡើយ ព្រោះថាខេត្តបន្ទាយមានជ័យមានច្រករបៀងជាច្រើនដែលគ្រប់គ្រងដោយសមត្ថកិច្ចតាមបន្ទាត់ព្រំដែនដែលពិបាកក្នុងការរារាំង ទប់ស្កាត់ ឬបង្ក្រាប បានងាយនោះឡើយ។
លោកបានបន្តទៀតថា ច្រកអូរបីជាន់ឥឡូវសម្បូរទៅដោយមាន់ ទា ជ្រូក គោក្របី នាំចូលលោកបានដាក់កំលាំងចាំបង្ក្រាបជាញឹកញាប់ដោយកម្រនឹងបង្ក្រាបបាននៅនឹងមាត់ច្រកណាស់ ។ ដោយថ្មីៗនេះ ក្រសួងកសិកម្មបានណែនាំដល់ការិយាល័យ បសុពេទ្យគ្រប់ខេត្ត ជាពិសេសខេត្តបន្ទាយមានជ័យដែលនៅជាប់ព្រំដែនប្រទេសថៃ ត្រូវធ្វើយ៉ាងណាទប់ស្កាត់អោយបានការនាំចូលសត្វបក្សី ឬសត្វពាហនៈ ដែលមិនមានច្បាប់អនុញ្ញាត ត្រូវអោយមានច្បាប់វិញជៀសវាងការបាត់បង់ចំណូលពន្ធ និងការឆ្លងរាលដាលនៃជម្ងឺនានាមកលើប្រជាពលរដ្ឋកម្ពុជាយើងផងនោះ។
ពាក់ព័ន្ធបញ្ហាខាងលើនេះមិនអាចសុំការបំភ្លឺពីទាហ៊ាន កងពល៥១ ដែលមានអ្នកគ្រប់គ្រងជាភូមិភាគ៥ បានទេ ព្រោះគ្មានលេខទូរស័ព្ទសំរាប់ទំនាក់ទំនង ទោះបីជាយ៉ាងព័ត៌មាននិងលម្អិតបន្ថែមទៀត នៃករណីខាងលើទាំងអស់នេះ៕
ដោយចិន្តា
