ព្រះវិហារ៖ យុវជនម្នាក់ដែលជាជនសង្ស័យ ឈ្មោះសួន សារិត អាយុ១៩ឆ្នាំ ក្នុងចំណោមបក្ខពួក២នាក់ ត្រូវបានចាប់ខ្លួន និងនាំមកសាកសួរនៅស្នងការ ខេត្តព្រះវិហារនៅ ថ្ងៃទី១៧ខែសីហាឆ្នាំ២០១៥ បន្ទាប់សង្ស័យថា ជាប់ពាក់ព័ន្ធនឹង សំណុំរឿងឃាតកម្ម សម្លាប់ជនរងគ្រោះ ម្នាក់ឈ្មោះ គង់ លន់ ភេទប្រុសអាយុ៤៨ឆ្នាំ មុខរបររត់ម៉ូតូឌុប ដែលត្រូវបានជនសង្ស័យប្លន់សម្លាប់ យកម៉ូតូក្នុង ចម្ការអំពៅកាលល្ងាច ថ្ងៃទី១៥ ខែសីហា ឆ្នាំ២០១៥ នៅភូមិព្រះក្អក ឃុំឆែក២ ស្រុកឆែប ខេត្តព្រះវិហារ។ តាមការបញ្ជាក់ឲ្យដឹង ពីសមត្ថកិច្ចថា ក្រោយពីទទួលបណ្តឹងពីឈ្មោះ សួង ស អាយុ៥៣ឆ្នាំ ត្រូវជាប្រពន្ធជនរងគ្រោះឈ្មោះ គង់ លន់ អាយុ៤៨ឆ្នាំ រស់នៅភូមិឡឥដ្ឋ សង្កាត់កំពង់ប្រណាក ក្រុងព្រះវិហារ បានរាយការណ៍ពីករណីបាត់ប្តីរបស់ខ្លួន តាំងពីថ្ងៃទី១៥ សីហា មកម្លេះ បន្ទាប់មកសមត្ថកិច្ចក៏បានស្រាវជ្រាវ នឹងកំណត់ មុខសញ្ញាបានចំនួន០២នាក់ នឹងឈានដល់ការឃាត់ខ្លួន ជនសង្ស័យម្នាក់ឈ្មោះ សួន សារិត នឹងដកហូតម៉ូតូបាន មកវិញនៅចំនុច កណ្តាលក្រុងព្រះវិហារ ហើយបាននាំខ្លួន ជនសង្ស័យមកសាកសួរ ។ សមត្ថកិច្ចបន្តថា ក្រោយពីបានស្តាប់ការបំភ្លឺ ជនសង្ស័យបានសារភាពថា ខ្លួននឹងបក្សពួកម្នាក់ទៀត ឈ្មោះ តុលា ពិតជាបានធ្វើសកម្មភាព យកដែកឆាប នឹងដុំថ្មវាយ ជនរងគ្រោះដើម្បីសម្លាប់ ហើយប្លន់យកម៉ូតូប្រាកដមែន ។ សូមបញ្ជាក់ផងដែរ មកដល់ពេលនេះ សមត្ថកិច្ចស្នងការដ្ឋាននគរបាលខេត្តព្រះវិហារ កំពុងមានវិធានការយ៉ាងក្តៅ ដើម្បីស្វែងរកជនសង្ស័យម្នាក់ទៀត ដែលបានប្លន់សម្លាប់ បុរសជាអ្នករត់ម៉ូតូឌុប ដើម្បីផ្តន្ទាទោស ចាត់ការទៅតាមផ្លូវច្បាប់ ៕
