ខេត្តរតនគិរី ៖ ដោយសារតែភ្លើងប្រច័ណ្ឋ ជនសង្ស័យស្ត្រីមួយរូបបានប្រើហឹង្សាជះទឹកអាស៊ីតដាក់ប្ដីបណ្ដាលឲ្យរលៀកពេញរាងកាយ ហើយរត់គេចខ្លួនមកខេត្តរតនគិរី ត្រូវសមត្ថកិច្ចស្រាវជ្រាវនិងឃាត់ខ្លួនបាន។
នៅថ្ងៃទី២ ខែធ្នូ ឆ្នាំ២០២២ ការិយាល័យព្រហ្មទណ្ឌ នៃស្នងការរដ្ឋាននគរបាលខេត្តរតនគិរី សហការជាមួយកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ និងនគរបាលខ័ណ្ឌព្រែកព្នៅ រាជធានីភ្នំពេញ បានឃាត់ខ្លួនជនសង្ស័យម្នាក់ដែលមានឈ្មោះ ញ៉ ហន ភេទស្រី អាយុ ៣៧ឆ្នាំ នៅចំណុចផ្ទះម៉ាស្សាមួយកន្លែង ស្ថិតក្នុងភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី ដោយស្ត្រីរូបនេះជាប់ពាក់ព័ន្ធករណីប្រើអំពើហិង្សា ដោយជះទឹកអាស៊ីតដាក់ប្តីរបស់ខ្លួន បណ្តាលឲ្យរងរបួសរលាកពេញខ្លួន។ បន្ទាប់ពីចាប់ខ្លួន ស្ត្រីរូបនោះត្រូវបានសមត្ថកិច្ចសហការប្រគល់ខ្លួនឲ្យទៅនគរបាលខណ្ឌព្រែកព្នៅ នាំខ្លួនទៅកាន់រាជធានីភ្នំពេញ ដើម្បីបន្តនីតិវិធីកសាងសំណុំរឿងបញ្ជូនទៅតុលាការចាត់តាមផ្លូវច្បាប់។
កាលពីល្ងាចថ្ងៃទី២៦ ខែវិច្ឆិកា ឆ្នាំ២០២២ នៅចំណុចស្ពានលីយ៉ុងផាត់ ស្ថិតក្នុងភូមិកណ្ដាល សង្កាត់ព្រែកព្នៅ ខណ្ឌព្រែកព្នៅ ស្ត្រីជនសង្ស័យនេះ បានប្រើប្រាស់ទឹកអាស៊ីតជះដាក់ប្តី បណ្តាលឲ្យរលាកពេញខ្លួនដោយសារតែភ្លើងប្រច័ណ្ឌហើយរត់គេច ខ្លួនចេញពីផ្ទះនៅរាជធានីភ្នំពេញ មកលាក់ខ្លួននៅក្រុងបានលុង ខេត្តរតនគិរី។
ក្រោយពីនគរបាលការិយ័យព្រហ្ម ស្នងការខេត្តរតនគិរី ប្រគល់ខ្លួនជនសង្ស័យ ជូនកម្លាំងនគរបាលខណ្ឌព្រែកព្នៅ រាជធានីភ្នំពេញ និងនគរបាលព្រហ្មទណ្ឌ នាយកដ្ឋានក្រសួងមហាផ្ទៃ ជនសង្ស័យស្ត្រីរូបនោះ ក៏ត្រូវបានបញ្ជូនខ្លួនទៅភ្នំពេញវិញនៅថ្ងៃទី២ ខែធ្នូ ឆ្នាំ២០២២ ផងដែរ៕
