ខេត្តកំពង់ចាម ៖ តាមប្រភពរាយការណ៍ពីប្រជាពលរដ្ឋបានឱ្យដឹងថា នៅត្រង់ចំណុចខាងត្បូងភូមិរោទិ៍ ហៅថា ប្រឡាយអាង ទឹក ពោធិតាឡុង ស្ថិតនៅក្នុងឃុំត្រាប់ ស្រុកបាធាយ ខេត្តកំពង់ចាម កំពុងមានបទ ល្មើសបូមទឹក ប្រឡាយ និងឆក់ត្រី យ៉ាងអនាធិបតេយ្យដោយគេពុំឃើញមានសមត្ថកិច្ច។
តាមសេចក្តីរាយការណ៍ខាងលើបានឱ្យដឹងទៀតថា មានប្រជាពលរដ្ឋ ២រូប រស់នៅភូមិរោទិ៍ ឃុំត្រប់ ស្រុកបាធាយ បានយកម៉ាស៊ីនគោយន្តមកបូមទឹកប្រឡាយអាងទឹកឡើងរីងរួចឆក់ត្រីម៉ាសេរី ពុំញញើតច្បាប់បន្តិច ណាឡើយ ។
សូមបញ្ជាក់ថា ប្រឡាយអាងទឹកមានប្រវែងមួយគីឡូម៉ែត្រ ចំណែកសកម្មភាពឆក់ត្រីយ៉ាងអនាធីបតេយ្យ បណ្តាល ឱ្យងាប់ទាំងកូនត្រីអណ្តែតពេញលើផ្ទៃទឹក បណ្តាលឱ្យមានវិនាសសកម្មហិនហោចពូជត្រីអស់រលីង ។
អ្នកស្រុកបានឱ្យដឹងទៀតថា ពួកជនល្មើសបានបូមទឹក និងឆក់ត្រីទាំងថ្ងៃយ៉ាងរំភើយ ដោយគ្មានឃើញ សមត្ថកិច្ច អាជ្ញាធរដែនដី និងមន្ត្រីជលផលសង្កាត់ផ្នែក និងខណ្ឌចុះបង្ក្រាបឡើយ ។
អ្នកស្រុកក៏បានរិះគន់ដែរថា ប្រហែលជាជនល្មើសទាំងនោះ យកសំណែនទៅសែនព្រេនសមត្ថកិច្ច និងមន្ត្រី ជល ផលហើយមើលទៅ បានជាមានភាពធូររលុងបណ្តោយឱ្យជនល្មើសឆក់ត្រីតាមអំពើចិត្ត ។
ទោះបីជាមន្ត្រីជលផលបានអះអាងថា ឆ្នាំនេះបទល្មើសនេសាទមានការថយចុះច្រើនក៏ដោយ ក៏នៅតាមតំបន់ មួយ ចំនួនបទល្មើសនេសាទនៅតែកើតមានព្រោងព្រាត ហើយការកើតមានបទល្មើសនេសាទ គឺដោយសារតែ សមត្ថ កិច្ច ពាក់ព័ន្ធគិតតែពីផលប្រយោជន៍សួនតួរ ទើបបទល្មើសអាចកើតមានក្រោមក្លៀករបស់ សមត្ថកិច្ច ។
ប្រជាពលរដ្ឋបាននិយាយថា ពួកគាត់បានស្តាប់អនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រី ឱ្យខិតខំ ទប់ស្កាត់បទល្មើសជលផល ជាពិសេសឱ្យមន្ត្រីថ្នាក់ក្រោមទប់ស្កាត់ជនប្រព្រឹត្តបទល្មើស តែមន្ត្រីថ្នាក់ក្រោម មិនព្រមអនុវត្តន៍ ៕
