ខេត្តកំពង់ធំ ៖ ឈ្មួញឈើដុះស្លែរ ដែលតែងតែធ្វើសកម្មភាព គគ្រឹកគគ្រេង ដែលត្រូវបានគេដឹងថា មកពីការបើកភ្លើងខៀវពីសំណាក់មេព្រៃ បណ្តែតបណ្តោយឲ្យដឹកជញ្ជូនបទល្មើសព្រៃឈើ ដោយសេរី ដោយគ្មានការបង្ក្រាបនោះ ត្រូវបាន លោក អ៊ិត សុធា ព្រះរាជអាជ្ញាអមសាលាដំបូង ខេត្តកំពង់ធំ និងលោក សាយ ណូរ៉ា ព្រះរាជអាជ្ញារង ដោយមានការ គាំទ្រ ពីសំណាក់ ឯកឧត្តម អ៊ុត សំអន អភិបាលខេត្តកំពង់ធំ និងជាប្រធានគណៈបញ្ជាការឯកភាពខេត្ត បើកទំព័រថ្មី បោសសំអាតទីតាំង ស្តុបឈើ ដឹកជញ្ជូន ឈើឆ្លងកាត់ខេត្តកំពង់ធំ ដែលបានធ្វើសកម្មភាព ដូចភ្លៀងរលឹម ។
ជាក់ស្តែងនៅរសៀលថ្ងៃទី ១៣ ខែ ឧសភា ឆ្នាំ ២០១៤ លោក សាយ ណូរ៉ា ព្រះរាជ អាជ្ញារងអមសាលដំបូង ខេត្តកំពង់ធំ បានសហការជាមួយ កំលាំងតំបន់ប្រតិបត្តិការ សឹករងកំពង់ធំ ប៉េអ៊ឹម ប៉ូលិស និងសមត្ថកិច្ចជំនាញ ចុះបង្ក្រាបនិងបោសសំអាត ទីតាំង ស្តុបឈើចំនួន ៤ កន្លែងស្ថិតនៅក្នុងក្រុងស្ទឹងសែន ទីតាំងទី១ ឈ្មោះ បាំង សុគន្ធារី ហៅចែស្រី ជាឈ្មួញឈើដ៏ល្បីល្បាញជាងគេ និងប៉ាវផ្តាច់សមត្ថកិច្ច ក្នុងខេត្តកំពង់ធំ រស់នៅ ក្នុងភូមិស្លាកែត សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ
កន្លងមកឈ្មួញឈើម្នាក់នេះ ពុំដែល មានអស់លោកណាម្នាក់ហ៊ានចុះបង្ក្រាបទីតាំងស្តុបឈើនេះទេ ដោយសារតែធ្លាប់ព្រមានប្តឹងសមត្ថកិច្ច និង អ្នកសារពត៌ដែលបាន ចុះផ្សាយ ពីការរកស៊ីដឹកជញ្ជូនឈើខុសច្បាប់របស់ចែស្រី ទី២ ឈ្មោះ ចាយ វែងឆេង ភេទ ប្រុស រស់នៅភូមិ ពោបាក់ក សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ ជា ឈ្មួញដឹកជញ្ជូនបទល្មើសឈើគ្រញូង រហូតមកដល់សម័យឈើ ធ្នង់ និងនាងនួន ក៏បានដាក់ថ្នាំសណ្តំមេព្រៃ និងសមត្ថកិច្ចពាក់ព័ន្ឋ ឲ្យលង់លក់រហូតជាប់ត្រគៀក ងាក មិនរួច ដោយសារតែឥទ្ធិពលដុល្លា ទី៣ឈ្មោះ ណៃ ប៊ុនឡុង ជាឈ្មួញឈើដុះស្លែរ រកស៊ីក្រោមឃ្លៀកមេព្រៃ តែ សមត្ថកិច្ចជំនាញ មិនអាចនឹងបង្ក្រាបបុគ្គលម្នាក់នេះ បានទេ ដោយសារតែមានសមត្ថកិច្ចជាច្រើន មានការពាក់ព័ន្ឋ និងទទួលសំណូកសំណែន និង១ កន្លែងទៀតជាឈ្មួញឈើតូចតាច។
រីឯជនសង្ស័យទាំង៤នាក់ ត្រូវបានបញ្ជូនទៅឃុំឃាំងនៅពន្ឋនាគារខេត្តកំពង់ធំ បណ្តោះអាសន្នលុះព្រឹកថ្ងៃទី ១៤ ទើបបញ្ជូនមកផ្នែករដ្ឋបាលព្រៃឈើស្ទោង ដើម្បីធ្វើ
កំណត់ហេតុ ទិដ្ឋភាពនៅក្នុងផ្នែករដ្ឋបាលព្រៃឈើ ស្ទោងប្រៀបបានទៅនឹង សាលាក្តី ដែលមានទាំងមេធាវី ការពារក្តី ព្រះរាជអាជ្ញា ព្រះរាជអាជ្ញារង និងសាច់ញាតិ ជនសង្ស័យទាំង៤នាក់ ដែលមានសភាពអូអរដូចផ្សារត្រី ។
ក្នុងនោះដែរ ក៏មានប្រជាពលរដ្ឋមួយចំនួន សម្តែងនូវការគាំទ្រ ដល់ស្ថាប័នតុលាការ ដែលបានចាត់វិធានការ បង្ក្រាបបទល្មើសដែលបានធ្វើសកម្មភាព ដឹកជញ្ជូនឈើដោយខុសច្បាប់ និងលុបបំបាត់អំពើពុករលួយ នៅ ក្នុងសង្គមបច្ចុប្បន្ន ដើម្បីកែតម្រូវប្រព័ន្ឋច្បាប់ និងសង្គម ។
ដោយឡែក ក៏មានមហាជនមួយចំនួន បានសំណូម ពរ ឲ្យស្ថាប័នតុលាការ អនុវត្តន៍តាមច្បាប់រដ្ឋបាលព្រៃឈើ ដូចជាចាប់មនុស្សនៅតាមផ្លូវ ដែលគ្មានវត្ថុ តាង ចាប់រថយន្តដែលពុំមានបទល្មើសជាវត្ថុតាងដែលជា ហេតុធ្វើអោយ មានការងឿងឆ្ងល់ដល់មហាជន ថាហេតុដូចម្តេចបានជាចាប់ទាំងគ្រែដេក ទាំងសាឡុង របស់ពួកគាត់ ដែលជារបស់ប្រើប្រាស់ប្រចាំថ្ងៃ ៕
ដោយ សុផាត កំពង់ធំ
