ខេត្តកោះកុង ៖ លោកជំទាវ មិថុនា ភូថង អភិបាលខេត្តកោះកុង បានអញ្ជើញជាអធិបតី ក្នុងការប្រកាសតែងតាំងលោក ក្រូច បូរីសីហា ជាអភិបាលស្រុកថ្មី ស្រុកបុទុមសាគរ ខេត្តកោះកុង ដោយមានមន្ត្រីរាជការស៊ីវិលគ្រប់លំដាប់ថ្នាក់បានមកចូលរួមក្នុងពិធីនោះផងដែរ។ ចំណែកលោក ហាក់ ឡេង អភិបាលស្រុកចាស់ ត្រូវបានផ្ទេរភារៈកិច្ចទៅជាអភិបាលរងខេត្តកោះកុង។
លោកជំទាវ មិថុនា ភូថង អភិបាលខេត្តកោះកុង បានមានប្រសាសន៏ផ្ដាំផ្ញើលោក ក្រួច បូរី សីហា អភិបាលស្រុកបូទុមសាគរឡើងថ្មីឲ្យយកចិត្តទុក្ខដាក់ក្នុងការបំរើការងារជូនប្រជាពលរដ្ឋឲ្យអស់ពីកម្លាំងកាយចិត្ត ហើយក៏មិនត្រូវព្រងើយកន្តើយចំពោះប្រជាពលរដ្ឋ និងមិនរើសអើងចំពោះនិន្នាការបក្សពួកនិយមនោះទេ ត្រូវចេះស្រឡាញ់ប្រជាពលរដ្ឋរបស់យើង។
លោកជំទាវ អភិបាលខេត្តកោះកុង បានបន្ថែមទៀតថា សូមឲ្យលោកអភិបាលស្រុក លោក ក្រួច បូរីសីហា ទប់ស្កាត់រាល់អំពើល្មើសច្បាប់ ការជួញដូរមនុស្ស ការជួញដូរ គ្រឿងញៀន ជាពិសេសនោះ រាលបទល្មើសល្បែងស៊ីសងគ្រប់ប្រភេទក្នុងមូលដ្ឋានមិនឲ្យកើតឡើងឡើយ។
លោក ក្រួច បូរីសីហា អភិបាលថ្មីស្រុកបុទុមសាគរ បានប្តេជ្ញាចិត្តចំពោះមុខមន្ត្រីរាជការស៊ីវិលគ្រប់លំដាប់ថ្នាក់ លោកនិងខិតខំប្រឹងប្រែងដើម្បីបំរើការងារជូនប្រជាពលរដ្ឋឲ្យបានល្អប្រសើរក្នុងនាមលោកចូលកាន់តំណែងជាអភិបាលស្រុកនេះ ហើយមិនឲ្យប្រជាពលអស់សង្ឃឹមនោះទេ។
មិនតែប៉ុណ្ណោះលោក ក្រួច បូរីសីហា បានផ្តល់បទសម្ភាស៍ដល់អ្នកសារព័ត៌មានថា លោកនិងខិតខំប្រឹងប្រែងដើម្បីផ្ដល់សេវាសាធារណៈជូនប្រជាពលរដ្ឋឲ្យបានល្អប្រសើរ។ លោកបន្តទៀតថា លោកនិងខិតខំបំរើប្រយោជន៍ជូនសង្គមជាតិ ជាពិសេសនោះ លោកមិនឱ្យប្រជាពលរដ្ឋណាមួយជាប់ពន្ធនាគារ ដោយសាររឿងដីធ្លីនោះទេ លោកខិតខំដោះស្រាយបញ្ហាទាំងអស់នេះ។
ចំណែកលោកជំទាវ អភិបាលខេត្តកោះកុង បានផ្តល់បទសម្ភាសន៍ជាមួយអ្នកសារព័ត៌មានថា ចំពោះបទល្មើសល្បែងស៊ីសងគ្រប់ប្រភេទ ត្រូវតែទប់ស្កាត់ឲ្យទាន់ពេលវេលា ហើយមិនត្រូវឲ្យកើតមានឡើងនៅល្បែងស៊ីសងក្នុងមូលដ្ឋានទៀតទេ។ លោកជំទាវ អភិបាលខេត្ត បន្តទៀតថា បើមានមន្ត្រីរាជការក្នុងខេត្តមានពាក់ព័ន្ធនូវបទល្មើសល្បែងស៊ីសង និងបទល្មើសផ្សេងៗ ត្រូវទទួលខុសត្រូវចំពោះមុខច្បាប ៕
