ខេត្តបន្ទាយមានជ័យ ៖ នៅថ្ងៃទី២៩ ខែសីហា ឆ្នាំ២០២២ នាឱកាសប្រកាសតែងតាំងអភិបាលរងខេត្តបន្ទាយមានជ័យ ៥រូប នៅសាលប្រជុំសាលាខេត្តបន្ទាយមានជ័យ រដ្ឋលេខាធិការក្រសួងមហាផ្ទៃ លោក ប៊ុន ហ៊ុន បញ្ជាឱ្យអាជ្ញាធរខេត្តលុបបំបាត់ល្បែងស៊ីសងតាមInternetនិងទប់ស្កាត់ពលករចំណាកស្រុកខុសច្បាប់។
លោក ប៊ុន ហ៊ុន បានបញ្ជាក់ថា អាជ្ញាធរមានសមត្ថកិច្ចខេត្ត ស្រុក ក្រុងត្រូវមានវិធានការលុបបំបាត់បទល្មើសល្បែងស៊ីសងតាមInternet និងបទល្មើសគ្រឿងញៀន ចោរកម្ម និងក្រុមបងតូច បងធំ ឱ្យបានដើម្បីការពារសន្តិសុខសណ្តាប់ធ្នាប់ក្នុងមូលដ្ឋានភូមិ ឃុំ ជាពិសេសគឺទប់ស្កាត់ពលករចំណាក់ស្រុកខុសច្បាប់ ការពារសុវត្ថិភាពប្រជាពលរដ្ឋ ព្រមទាំងស្រាវជ្រាវតាមចាប់មេខ្យល់ដែលបោកប្រាស់ប្រជាពលរដ្ឋដាក់ទោសតាមច្បាប់។
លោករដ្ឋលេខាធិការក្រសួងមហាផ្ទៃ ក៏បានលើកយកការផ្តាំផ្ញើពីសម្តេចក្រឡាហម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃដែលផ្តល់អនុសាសន៏ថា អភិបាលរងនៃគណៈអភិបាលខេត្ត ក្រោយប្រកាសទទួលភារកិច្ចហើយ ត្រូវខិតខំធ្វើការងារបម្រើប្រជាពលរដ្ឋ និងសង្គមឱ្យបានល្អប្រកបដោយវិជ្ជាជីវៈ និងក្រមសីលធម៌ត្រឹមត្រូវ ស្របតាមគោលនយោបាយរបស់រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលដឹកនាំប្រទេសឱ្យមានសុខសន្តិភាព និងការអភិវឌ្ឍន៍រីកចម្រើនគ្រប់វិស័យ៕
