ខេត្តព្រះសីហនុ ៖ នៅថ្ងៃចន្ទ ៤កើត ខែស្រាពណ៍ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី០១ ខែសីហា ឆ្នាំ២០២២នេះ នៅទូទាំងខេត្តព្រះសីហនុ ចាប់ផ្តើមដាក់ឱ្យដំណើរការ ជាផ្លូវការនូវ យន្តការផ្តល់សេវាសាធារណៈតាមច្រកចេញ-ចូលតែមួយ នៃរដ្ឋបាលឃុំ-សង្កាត់ ទាំង២៩ នៅទូទាំងខេត្តព្រះសីហនុ។
យន្តការច្រកចេញ-ចូលតែមួយនៃរដ្ឋបាលឃុំ-សង្កាត់ គឺជាកន្លែងប្រមូលផ្តុំការផ្តល់ សេវារដ្ឋបាលនៅកន្លែងតែមួយ ដើម្បីបង្កលក្ខណៈងាយស្រួល សាមញ្ញ ឆាប់រហ័ស តម្លាភាព គណនេយ្យភាព និងប្រកបដោយភាពជឿជាក់ជូនប្រជាពលរដ្ឋនៅរដ្ឋបាលថ្នាក់ក្រោមជាតិ តាមបែបវិមជ្ឈការ និងវិសហមជ្ឈការ។ យន្តការច្រកចេញ-ចូលតែមួយ នៃរដ្ឋបាលឃុំសង្កាត់ ត្រូវស្ថិតនៅក្រោមការដឹកនាំរបស់លោក លោកស្រីជាមេឃុំ-ចៅសង្កាត់ ដោយមានស្មៀនឃុំ-សង្កាត់ជាសេនាធិការក្នុងការសម្របសម្រួល។
សេវាសាធារណៈផ្តល់តាមរយៈយន្តការច្រកចេញចូលតែមួយ នៃរដ្ឋបាលឃុំសង្កាត់ មានចំនួន១២សេវា ដូចជា៖ លិខិតបញ្ជាក់ភាពនៅលីវ មេម៉ាយ ឬពោះម៉ាយ, លិខិតបញ្ជាក់ទីលំនៅ, លិខិតបញ្ជាក់លើកិច្ចសន្យាខ្ចីប្រាក់, -លិខិតបញ្ជាក់ប្រវត្តិដីធ្លី, -លិខិតបញ្ជាក់ទាយាទ, លិខិតបញ្ជាក់កិរិយាមាយាទ, លិខិតបញ្ជាក់ប្រវត្តិរូបសង្ខេប, -លិខិតបញ្ជាក់ទិញ-លក់សត្វពាហនៈ, លិខិតបញ្ជាក់តបណ្តាញអគ្គិសនី, លិខិតបញ្ជាក់ត បណ្តាញទឹកស្អាត, លិខិតបញ្ជាក់ជួលដី ផ្ទះ តូប យានជំនិះ និងលិខិតបញ្ជាក់ផ្ទះ ជួលបន្ទប់ស្នាក់នៅ៕ដកស្រងពី AKP
