ភ្នំពេញ៖ នៅព្រឹកថ្ងៃទី៣សីហានេះ សម្តេចនាយករដ្ឋមន្ត្រីហ៊ុនសែន បានលើកឡើងដល់ ករណីលោក ឈូក បណ្ឌិត អតីតអភិបាលក្រុងបាវិត ដែលបានបាញ់កម្មករ ឲ្យរងរបួស កាលពីឆ្នាំ២០១២និង កំពុងរត់គេចខ្លួន មិនអនុវត្តសាលក្រមតុលាការ ខណៈសង្គមស៊ីវិលទាមទារ រកយុត្តិធ័ម អោយជនរងគ្រោះ ដោយសម្តេចបញ្ជាអោយ នគរបាលតាមចាប់ខ្លួន លោកឈូក បណ្ឌិត ក្នុងពេលសម្តេច ដាក់បញ្ជាឲ្យប៉ូលិស និងអាជ្ញាធររាជធានីភ្នំពេញ ក៏ត្រូវ តាមចាប់ខ្លួនបាតុករ ដែលជាសកម្មជន គណបក្សសង្គ្រោះជាតិ ធ្វើបាតុកម្ម បង្កអំពើហិង្សា លើក្រុមសន្តិសុខ កាលពីថ្ងៃទី១៥ ខែកក្កដា ឆ្នាំ២០១៤ នៅទីលានប្រជាធិបតេយ្យ។
ក្នុងពិធីសម្ពោធ បើកឲ្យដំណើរការ ស្ពានមិត្តភាពកម្ពុជា-ចិន នៅតាខ្មៅ នាព្រឹកថ្ងៃទី៣ សីហានេះ សម្តេចនាយករដ្ឋមន្ត្រី ហ៊ុន សែន បានលើកឡើងថា បើសិនជាប៉ូលិស មិនតាមចាប់បាតុករ ដែលប្រើអំពើហិង្សា លើក្រុមសន្តិសុខខណ្ឌដូនពេញ យកមកកាត់ទោសទេនោះ គឺប៉ូលិស ជាអ្នកខុស។ ដូចគ្នាដែរ ករណី ឈូក បណ្ឌិត បើប៉ូលិស មិនតាមចាប់ខ្លួនទេ គឺប៉ូលិស ក៏ខុសដូចគ្នា។
ជាមួយនឹងការប្រកាសដូច្នេះ សម្តេចនាយករដ្ឋមន្ត្រី ហ៊ុន សែន ក៏បានប្រកាសថា សម្តេចនៅតែរក្សា វប្បធម៌សន្ទនានយោបាយ ជាមួយនឹងគណបក្សសង្គ្រោះជាតិ។ ប៉ុន្តែកិច្ចព្រមព្រៀងនយោបាយនោះ មិនអាចដោះស្រាយបញ្ហានៅតុលាការ ដែលកាត់ទោស ដាក់ពន្ធនាគារ លើសកម្មជនគណបក្សសង្គ្រោះជាតិ បាននោះទេ។
កម្តៅនយោបាយហាក់ឡើងខ្ពស់រវាងគណបក្សដែលមានអាសនៈនៅសភា៕
