ខេត្តកំពង់ឆ្នាំង ៖ ក្នុងឱកាសអញ្ជើញជាអធិបតីភាព ក្នុងពិធីបើកវគ្គហ្វឹកហ្វឺនជំនាញកំទេចយុទ្ធភ័ណ្ឌមិនទាន់ផ្ទុះកម្រិត៣ជំនាន់ទី ១១ នៅមជ្ឈមណ្ឌលហ្វឹកហ្វឺនស៊ីម៉ាក់ខេត្តកំពង់ឆ្នាំង ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា មាន
ប្រសាសន៍ថា បញ្ហាវិបត្តិកូវីដគឺបានកើតឡើងជាសកលគ្មានប្រទេសណាមួយដែលមិនកើតជំងឺដ៏កាចសាហាវនេះទេ ។ សម្រាប់កម្ពុជា មានភ័ព្វសំណាងដែលសម្ដេចអគ្គមហាសេនាបតីតេជោ ហ៊ុន សែន បានរកវ៉ាក់សាំងមកចាក់ជូនប្រជាពលរដ្ឋចាប់ពីដូស៍ទី១ រហូតដល់បច្ចុប្បន្នបាននិងកំពុងជំរុញចាក់ដូស៍ទី ៥ ដែលធ្វើឲ្យស្ថានការកូវីដនៅកម្ពុជាបានធូរស្រាល ។
នៅព្រឹកថ្ងៃទី ១៤ ខែមិថុនា ឆ្នាំ២០២២នេះ ឯកឧត្តម ហេង រតនា បានបន្តថាៈ ប្រសិនបើគ្មានវ៉ាក់សាំងមកចាក់ការពារនោះទេ ម្លេះយើងមិនអាចមកអង្គុយជួប
ជុំដូចនៅពេលនេះបានដែរ ។ ដូចដែលបងប្អូនទាំងអស់គ្នាបានដឹងស្រាប់ បញ្ហាកូវីដ ក្នុងអំឡុងពេល២ឆ្នាំកន្លងទៅនេះ ធ្វើឱ្យស្ថានភាពសេដ្ឋកិច្ចបានធ្លាក់ចុះជាខ្លាំងពិសេស លើវិស័យទេសចរណ៍ ។
ប៉ុន្តែក្រោយពេលប្រជាពលរដ្ឋកម្ពុជាទទួលបានការចាក់វ៉ាក់សាំងចាក់ ធ្វើឲ្យស្ថានការណ៍បានធូស្រាល សេដ្ឋកិច្ចបានងើបឡើងវិញជាបន្តបន្ទាប់ ក្រោយវិបត្តិកូវីដ បានធូស្រាល សម្ដេចតេជោ ហ៊ុន សែន ក៏បានប្រកាសបើកឱ្យ ដើរហើរ ដោយសេរីឡើងវិញ និងបានអនុញ្ញាតឱ្យប្រជាពលរដ្ឋមានសិទ្ឋសម្រេចចិត្តដោយខ្លួនឯងត្រូវពាក់ម៉ាស់ឬមិនពាក់ម៉ាស នៅទីប្រជុំជន ។ ខុសពីពេលមុនដែលការដើរហើរត្រូវបានបិទជិត និងត្រូវតែពាក់ម៉ាស់ជាប្រចាំ ។ ដោយឡែកសម្រាប់ស្ថានការណ៍កូវីដ
នៅប្រទេសគេវិញ ដូចជានៅប្រទេសវៀតណាម ប្រទេសថៃ ជាប្រទេសជិតខាងយើង កូវីដក៍កំពុងនៅតែបន្តកើតឡើងជាបន្តបន្ទាប់ ដោយសារតែកង្វះវ៉ាក់សាំងចាក់ការពារ ។ ប្រទេសគេអ្នកមាន គេមានលុយគេទិញវ៉ាក់សាំងមកចាក់ជូនពលរដ្ឋគេ តែសម្រាប់ប្រទេសក្រីក្រ គឺពលរដ្ឋគេទទួលបានការវ៉ាក់សាំងត្រឹម ១៦%ប៉ុណ្ណោះ ។
ដោយឡែក សង្គ្រាមនៅអ៊ុយក្រែន ជាមួយប្រទេសរុស្ស៊ី ក៍បានធ្វើឲ្យសេដ្ឋកិច្ច ធ្លាក់ចុះដែរ។ តម្លៃប្រេងបានឡើងថ្លៃ ដោយសារតែសង្គ្រាម យើងទាំងអស់គ្នាមិនចង់បានសង្គ្រាមនោះទេ គឺចង់បានសុខសន្តិភាពដូចដែលកម្ពុជាកំពុងមានសព្វថ្ងៃ មានសុខសន្តិភាពនិងការអភិវឌ្ឍ ថ្មីៗនេះរាជរដ្ឋាភិបាលបានបន្តធ្វើផ្លូវហាយវេ ផ្លូវល្បឿនលឿនពីភ្នំពេញទៅខេត្តព្រះសីហនុ និងគម្រោងពីភ្នំពេញទៅកាន់ប្រទេសវៀតណាម ។ចំណែកនៅខេត្តសៀមរៀប ក៍កំពុងអភិវឌ្ឍន៍ កសាងផ្លូវគ្រប់ទីកន្លែង សូម្បីតែចញ្ជឹមផ្លូវក៍ក្រាលថ្មម៉ាបដែរ។
ជាចុងក្រោយឯកឧត្តម ក៏បានផ្តាំផ្ញើដល់សិក្ខាកាមទាំងអស់ ដែលបានចូលរៀន ជំនាញបច្ចេកទេសកំទេចយុទ្ធភ័ណ្ឌមិនទាន់ផ្ទុះកម្រិត៣ជំនាន់ទី ១១ ត្រូវខិតខំប្រឹងប្រែងរៀនសូត្រដើម្បីយកចំណេះដឹង ទៅអនុវត្ត រំដោះដីជូនប្រជាពលរដ្ឋបានបង្ករបង្កើនផលប្រកបដោយសុវត្ថិភាព។
យោងតាមរបាយការណ៍របស់ឯកឧត្តម ម៉ុង សុគន្ធារត ប្រធានវិទ្យាស្ថានបច្ចេកទេសសកម្មភាព កំចាត់មីន បានឲ្យដឹងថា វគ្គហ្វឹកហ្វឺនជំនាញបច្ចេកទេសកម្ពុចយុទ្ធភ័ណ្ឌមិនទាន់ផ្ទុះកម្រិត៣ជំនាន់ទី ១១ នៅពេលនេះគឺបានប្រព្រឹត្តិឡើងពីថ្ងៃទី ១៣ ខែមិថុនាដល់ថ្ងៃទី ២២ខែកក្កដា មានរយៈពេល៤០ ថ្ងៃមានសិក្ខាកាមចំនួន ២១ នាក់ ក្នុងនោះសិក្ខាកាមដែលជាស្ត្រីចំនួន ២នាក់ ៕
