សៀមរាប ៖ មន្ត្រីពាក់ព័ន្ធនឹងអាជ្ញាឃុំបាន លក់ដើមរាំងទឹក, ដើមកន្សែង, ដើមទោល, បញ្ជាឲ្យកម្មករគាស់រំល៉ឺងទាំងដើម នៅពេលថ្ងៃស្ថិតនៅចំនុច ២ ភូមិខុសគ្នា, ទី១/ចំនុចអកសគ្រឡេងដប ក្នុងភូមិច្រែស និងចំនុចទំនប់សោម, ទំនប់កន្សែងកំបុត ក្នុងភូមិគោកធ្លក ឃុំកណ្តែកស្រុកប្រាសាទបាគងខេត្តសៀមរាប ដើម្បីរងចាំឲ្យឈ្មួញ ដឹកចេញនៅពេលយប់ជារៀងរាល់ថ្ងៃ ក្នុងរយៈពេលតែ ១ ខែអស់ជាង១០០ដើម ពុំឃើញមានសមត្ថកិច្ចឬអាជ្ញាធរពាក់ព័ន្ធណាមកទប់ស្កាត់ឡើយ ។
តាមប្រភពពីអ្នកស៊ីឈ្មួលគាស់ដើមរាំងបានប្រាប់ថា ពួកគេត្រូវបានមេឃុំបញ្ជាឲ្យមក គាស់ដើមឈើទាំងអស់នេះ ក្នុងតំលៃ ១ ដើម ៣ ម៉ឺនរៀលទៅ ៥ ម៉ឺនរៀល ដើម្បីឲ្យ ឡានស្ទួចដឹកចេញនៅពេលយប់យកទៅវៀតណាម តែរឿងលក់ឲ្យក្នុងតម្លៃប៉ុន្មាននោះ ពួកខ្ញុំ មិនដឹងទេ បើចង់ដឹងច្បាស់ទាល់តែទៅសួរលោកមេឃុំ ខាំ លឿ ទៅទើបដឹងហើយ ។
លោក គង់ សារ៉ន អង្គការអភិរក្សការពារធនធានធម្មជាតិប្រចាំស្រុកប្រាសាទ បាគងបានប្រាប់ប្រព័ន្ធផ្សព្វផ្សាយ ក្នុងស្រុកថា ក្នុង ឃុំកណ្តែកនេះ ត្រូវបានមេឃុំ ខាំ លឿ បញ្ជាឲ្យកម្មករគាស់ដើមរាំងទឹក, ដើមកន្សែង, ដើមទោល ជាជំរកមច្ឆាចំរុះ ដែលត្រូវ បានគេ ហាមឃាត់ទាំងថ្ងៃទុក សំរាប់ពេលយប់ ទើបដឹកចេញតែពុំឃើញមានមន្ត្រី
ពាក់ព័ន្ធ ឬអាជ្ញាធរសមត្ថកិច្ចណា មកធ្វើការហាមឃាត់ ឡើយ ។ មានឃើញតែកម្មករជីកគាស់តែប៉ុណ្ណោះ តាំងពីខ្ញុំទៅប្រាប់មករហូត ដល់ពេលនេះមានរយៈពេលជាង ១ ខែមកហើយ គាស់អស់ចំនួនជាង១០០ដើមពួកគេធ្វើព្រងើយថែមទាំងនិយាយមកវិញថាបើចង់ហាមឃាត់ពួកខ្ញុំជីកទៅប្រាប់លោកមេឃុំ ខាំ លឿ ទៅទើបពួកខ្ញុំឈប់ បាន ពីព្រោះគាត់អ្នកបញ្ជា។
លោក ខាំ លឿ មេឃុំកណ្តែកបានប្រាប់ ថា ដើមរាំងទឹក, ដើមកន្សែង, ដើមទោល ដែលកម្មករជីកគាស់ទាំងឬសនៅពេលថ្ងៃ នឹង ដឹកចេញ នៅពេលយប់នេះ ត្រូវបាន
លោក កែវ សារ៉ាន់ អតីតកងវិស្វកម្ម, បច្ចុប្បន្ន ទីប្រឹក្សាក្រសួងការពារជាតិ បានស្នើសុំត្រឹម ភូមិ, ឃុំនិងសហគមន៏ក្នុងតំបន់ ២ ដើម្បីជីកគាស់យកទៅដាំ នៅក្នុងភូមិស្ពានក្អែក ឃុំកណ្តែកស្រុកប្រាសាទបាគងនេះទេ ចំនួន តែ ៣៥ ដើមប៉ុណ្ណោះ មិនបានយកទៅលក់ឲ្យពីណាទេ។
ចំណែកលោក សេង ស៊ឺ ប្រធានសហគមន៏កណ្តែក បានប្រាប់ថា លោកក៏បានដឹងរឿងនេះដែរ តែលោកកំពុងជាប់រវល់ ។
លោកភូ សំ អាត អភិបាលស្រុកប្រាសាទបាគងបានប្រាប់តាមទូរស័ព្ទថា លោកបានឲ្យកម្លាំងទៅហាមឃាត់ហើយ ដើម្បីកុំឲ្យដឹកចេញ តទៅទៀត ពីព្រោះលោកបានសួរទៅមេឃុំថា គេដឹកយកទៅដាំនៅក្នុងត្រពាំង ក្នុងសណ្ឋាគាររបស់លោក កែវ សារ៉ាន់ បើចង់ដឹងច្បាស់សូមសួរទៅលោកមេឃុំដឹងហើយ ។
លោកបន្តទៀតថា លោកបានរាយការណ៍ទៅឲ្យនាយករដ្ឋបាលសាលាខេត្តរួចអស់ហើយ នឹងដើម្បីសុំអនុសាសន៏ពី លោកអភិបាលខេត្ត ដើម្បីចាត់ការ តែចំពោះលោកអភិបាលខេត្តគាត់បញ្ជាមកត្រូវធ្វើយ៉ាងដូចម្តេចតទៅទៀត ពួកខ្ញុំចាំតែអនុវត្តតាម ។
រីឯលោក ធ្លន់ ចិន្ថា នគរបាលប៉ុស្តិកណ្តែកពុំមានការទាក់ទងក្នុងរឿង នេះទេ ដោយសារ ទូរស័ព្ទរបស់លោកស្ថិតនៅក្រៅ តំបន់សេវា ។
ទោះបីយ៉ាងណា ដើមរាំងទឹកជាង១០០ ដើម ដែលជាជំរកត្រីពងកូននារដូវវស្សា ត្រូវបាន គេគាស់ទាំងឬស យកទៅបាត់ បណ្តាលឲ្យប្រជាពលរដ្ឋនៅតំបន់នោះ ធ្វើ ការរិះគន់ដល់អាជ្ញាធរ និងសមត្ថកិច្ចមូលដ្ឋាន ៕
