ខេត្តកណ្តាល ៖ នាព្រឹក ថ្ងៃអាទិត្យ ០៨កើត ខែពិសាខ ឆ្នាំខាល ព.ស. ២៥៦៥ ត្រូវនឹងថ្ងៃទី០៨ ខែឧសភា ឆ្នាំ២០២២ ឯកឧត្តម គង់ សោភ័ណ្ឌ ប្រធានក្រុមការងារយុវជនគណបក្សប្រជាជនកម្ពុជាខេត្តកណ្ដាល និងឯកឧត្តមបណ្ឌិត ម៉ៅ ភិរុណ ប្រធានគណៈកម្មាធិការគណបក្សប្រជាជនកម្ពុជាខេត្តកណ្តាល បានចូលរួមក្នុងពិធីប្រគល់-ទទួលអំណោយរបស់យុវជនគណបក្សប្រជាជនកម្ពុជា ថ្នាក់កណ្ដាល នៅទីស្នាក់ការគណបក្សប្រជាជនកម្ពុជាខេត្តកណ្ដាល។
អំណោយរបស់យុវជនគណបក្សប្រជាជនកម្ពុជាថ្នាក់កណ្តាល ដែលបានប្រគល់ជូនក្រុមការងារយុវជនគណបក្សខេត្តកណ្តាល នាពេលនេះរួមមាន៖ អង្ករ៥តោន មីយើង/មីជាតិ២៥០កេស ត្រីខ២៥០យួរ Covid-១៩ test kits ១៥០០ ប្រអប់ និងថវិកា ចំនួន ១០លានរៀល។
ឯកឧត្តម ប្រធានក្រុមការងារយុវជនគណបក្សខេត្ត បានបន្តថា ក្នុងនាមក្រុមការងារយុវជនគណបក្សខេត្តកណ្តាល ខ្ញុំសូមថ្លែងអំណរគុណដ៏ជ្រាលជ្រៅជូនចំពោះ យុវជនគណបក្សថ្នាក់កណ្ដាល ដែលបានប្រគល់មកឲ្យនូវអំណោយ សម្រាប់ចែកជូនបងប្អូនប្រជាពលរដ្ឋក្នុងការចូលរួមចំណែកជួយសម្រាលដល់ជីវភាពរបស់ពលរដ្ឋនៅមូលដ្ឋានខេត្តកណ្តាល ។ ខ្ញុំសូមគោរពជូនពរ ឯកឧត្តម លោកជំទាវ លោក លោកស្រី ថ្នាក់ដឹកនាំយុវជនគណបក្សថ្នាក់កណ្តាល សូមជួបប្រកបតែនូវពុទ្ធពរទាំង ៥ ប្រការ គឺ អាយុ វណ្ណ: សុខ: ពល: និងបដិភាណៈ កុំបីឃ្លៀងឃ្លៀតឡើយ ។
លោក ហ៊ុត កុសល តំណាងឲ្យក្រុមសប្បុរសជនមកពីមូលនិធិដាយមិនស៍កម្ពុជា បានឲ្យដឹងថា លោក និងក្រុមសប្បុរសជនទាំងអស់មានសេចក្តីរីករាយយ៉ាងខ្លាំង ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ហ៊ុន ម៉ាណែត និងលោកជំទាវ នាំយកនូវអំណោយខាងលើនេះមកប្រគល់ជូន ឯកឧត្តម ប្រធានក្រុមការងារយុវជនគណបក្សខេត្តកណ្តាល ។
លោក ហ៊ុត កុសល បានសម្តែងនូវការគោរព និងថ្លែងអំណរគុណយ៉ាងជ្រាលជ្រៅបំផុតដល់ឯកឧត្តម ប្រធានក្រុមការងារយុវជនគណបក្សខេត្តកណ្តាល និងសហការី ដែលបានផ្តល់ពេលវេលាដ៏មានតម្លៃសម្រាប់ការប្រគល់ទទួលអំណោយនៅថ្ងៃនេះ ។
