ភ្នំពេញ :តាមប្រភពពត័មាន មាន ព្រះសង្ឃចំនួន២២អង្គនិងអ្នកភូមិជាង២០នាក់ ធ្វើការតវ៉ាទាមទារឲ្យសមត្ថកិច្ចខណ្ឌពោធិ៍សែនជ័យ ដោះលែង ព្រះសង្ឃចំនួន២អង្គ នៅមុខប៉ុស្តិ៍កាកាប ខណ្ឌពោធិ៍សែនជ័យ ។ ពេញមួយថ្ងៃចាប់តាំងពីព្រឹកដល់រសៀល ថ្ងៃទី០២ខែសីហា ឆ្នាំ២០១៥ បនា្ទប់ពីមានរឿងព្រះសង្ឃ២អង្គគង់នៅវត្តអង្គតេម៉ិញ ត្រូវកម្លាំងគណបញ្ជាការឯកភាពខណ្ឌពោធិ៍សែនជ័យ ចុះធ្វើរដ្ឋបាលឃាត់ខ្លួន នៅក្នុងវត្តអង្គតាមុិញ ភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោង៩ព្រឹក រហូតដល់វេលាម៉ោង១១និង៣០នាទីព្រឹកថ្ងៃទី១ ខែសីហាឆ្នាំ២០១៥ កន្លងមក នឹងធ្វើការឆែកឆេរ តាមកុដ៍ រកឃើញ មានខោលីអូ មនុស្សប្រុស-ស្រី ស្រោមអនាម័យ អាវ មួក ថ្នាំញៀន មានទាំង បៀ ដាវ កាំបិត សាំមុយរ៉ៃ សុទ្ធសឹងតែជារបស់ ដែលព្រះសង្ឃមិនត្រូវមានប្រើ ។
ការចុះធ្វើរដ្ឋបាលខាងលើ ក្រោមការដឹកនាំពីលោក ហែម ដារិទ្ធ អភិបាលខណ្ឌពោធិ៍សែនជ័យ និងមានការចូលរួម ពីលោក ថេ រ៉ាមី ក្រឡាបញ្ជី របស់ព្រះរាជអាជ្ញា អមសាលាដំបូងរាជធានីភ្នំពេញ ក្រោយពីសមត្ថកិច្ចឆែករកឃើញ សម្ភារ:អស់ទាំងនោះ ព្រះសង្ឃចំនួន២អង្គ ត្រូវបានឃាត់ខ្លួន ទី១- ព្រះនាម ដាវ ទេព ព្រជន្ម ២៨វស្សា , ទី២- ព្រះនាម ជា វណ្ណាដា ព្រះជន្ម៣០វស្សា ធ្វើការសាកសួរ និងនាំទៅកាន់វត្តជម្ពូវ័ន ដើម្បីរៀបចំពិធី ផ្សឹក ដែលមានការចូលរួមពី មន្ទីរធម្មការ ការិយាល័យធ្មមការ អាជ្ញាធរ សមត្ថកិច្ច រួចប្រគល់ឲ្យទៅជំនាញ អធិការដ្ឋាននគរបាលខណ្ឌពោធិ៍សែនជ័យ ធ្វើការសាកសួរបន្តនិងកសាងសំណុំរឿង ចាត់ការទៅតាមនិតិវិធី ។
ក្រោយពីពិធីផ្សឹកព្រះសង្ឃ២អង្គខាងលើ ចប់សព្វគ្រប់ កាលពីវេលាម៉ោង៤រសៀល ថ្ងៃទី០១ ខែសីហា រហូតមកដល់ព្រឹកថ្ងៃទី០២ ខែសីហា មានព្រះសង្ឃចំនួន២២អង្គ រួមជាមួយ ពុទ្ធបរិស័ទ ជាង២០នាក់ នាំគ្នាធ្វើការតវ៉ា ទាមទារឲ្យ សមត្ថកិច្ចធ្វើការដោះលែង ព្រះសង្ឃ២អង្គមកវិញ ក្រោមសម្រែក តាមមេក្រូ ថា ព្រះសង្ឃ២អង្គ សមត្ថកិច្ចចាប់ផ្សឹកឃាត់ខ្លួន ជាព្រះសង្ឃស្នេហាជាតិ ហើយការចោទប្រកាន់ របស់សមត្ថកិច្ច ជាការមួលបង្កាច់បង្ខូច ព្រះសង្ឃហើយ ចំពោះសម្ភារ:អស់ទាំងនោះដែលរកឃើញ ក្នុងកុដ៍ព្រះសង្ឃ សុទ្ធសឹងជាគម្រោង ផែនការរៀបចំ នេះជារឿងអយុត្តិធម៌ សូមឲ្យសមត្ថកិច្ច ដោះលែង ព្រះសង្ឃមកវិញ ។
តាមសមត្ថកិច្ច បានឲ្យដឹងថា ទោះជាយ៉ាងណាក៏ដោយ សមត្ថកិច្ចមិនអនុញាតិឲ្យក្រុមអ្នកតវ៉ា ចូលដល់ ក្នុងបរិវេណ បុ៉ស្តិ៍កាកាបឡើយ ឲ្យត្រឹមមុខច្រកចូល តែបុ៉ណ្ណោះ ដើម្បីរក្សានូវសណ្តាប់ធ្នាប់ សន្តិសុខ និយាយជារួម សមត្ថកិច្ច អនុវត្តន៍ និងធ្វើឡើងទៅតាមនិតិវិធី ផ្អែកទៅលើវត្ថុតាង ៕គេពុំទាន់ដឹងថាវាសនាអតីតសង្ឃទាំង២អង្គនោះយ៉ាងណាទេរង់ចាំព័តមានពេលក្រោយ៕
