ខេត្តកំពង់ឆ្នាំង ៖ នៅព្រឹកថ្ងៃទី២៨ ខែមីនា ឆ្នាំ២០២២ កម្លាំងកងរាជអាវុធហត្ថចុះសហការណ៍បង្រ្កាបបទល្មើសនេសាទចំនួន០៣គោលដៅ ៖
គោលដៅទី១ កម្លាំងអ.ហ ស្រុកជលគិរី ខេត្តកំពង់ឆ្នាំង ចំនួន ០៣ នាក់ ដឹកនាំដោយលោកអនុសនីយ៍ឯក គង់ សុភិន មេបញ្ជាការអ.ហស្រុក សហការណ៍ជាមួយកម្លាំង គណៈបញ្ជាការឯកភាពស្រុក ជំនាញសង្កាត់ជលផលស្រុក និងប៉ូលីសសេដ្ឋកិច្ចខេត្ត សរុបចំនួន ២៣នាក់ មធ្យោបាយបាឡាស្មាច់ចំនួន០៦គ្រឿង ដឹកនាំដោយលោក លី ផល្លីន អភិបាលរងស្រុកជលគិរី ចុះបង្ក្រាបបទល្មើសនេសាទនៅចំណុច ភូមិកំពង់បាស្រូវ ឃុំជលសា ស្រុកជលគិរី ខេត្តកំពង់ឆ្នាំង ។
គោលដៅទី២ កម្លាំងអ.ហ ស្រុកកំពង់លែង ខេត្តកំពង់ឆ្នាំងចំនួន ០៤ នាក់ ដឹកនាំដោយលោក វរសេនីយ៍ត្រី ឡុង សាវ៉ាត មេបញ្ជាការមូលដ្ឋានអ.ហស្រុក សហការណ៍ជាមួយកម្លាំងចម្រុះសរុប៣៨នាក់ មធ្យោបាយបាឡាស្មាច់ចំនួន០៩គ្រឿង ដឹកនាំរួមដោយលោកឧត្តមសេនីយ៍ត្រី ចាប ចន្ថា ស្នងការរងនគរបាលខេត្តកំពង់ឆ្នាំង ចុះបង្រ្កាបបទល្មើសនេសាទនៅចំណុចព្រែកដូនតី ដល់ព្រែកតាភោគក្នុងភូមិក្រម៉ាល់ ឃុំប្រឡាយមាស ស្រុកកំពង់លែង ខេត្តកំពង់ឆ្នាំង ។
គោលដៅទី៣ កម្លាំងអ.ហស្រុកកំពង់ត្រឡាច ខេត្តកំពង់ឆ្នាំង ០៣ នាក់ សហការណ៍ជាមួយកម្លាំងចម្រុះរបស់គណបញ្ជាការឯកភាពស្រុកចំនួន១៨នាក់ បាឡាស្មាច់០៣គ្រឿងដឹកនាំដោយលោក ឃឹម ឡុង ប្រធានជលផលស្រុកកំពង់ត្រឡាច ចុះបង្រ្កាបបទល្មើសនេសាទនៅចំណុចភូមិវាលស្បូវ ភូមិបាក់ភ្នំនិងភូមិខ្លាគ្រហ៊ឹម ក្នុងឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង ។
លទ្ធផលនៃប្រតិបត្តការបង្ក្រាបសរុបទាំង០៣គោលដៅ ៖ រុះរើរបាំងសាច់អួន ១១កន្លែង ប្រវែង ៥២០ម៉ែត្រ; លូរសាច់អួន ចំនួន១១មាត់; រុះរើរបាំងស្បៃមុង ១៥កន្លែង ប្រវែង៣០០ម៉ែត្រ; លូរស្បៃមុងចំនួន១៥មាត់; រុះរើសម្រ៉ាស់១៣កន្លែងទំហ៊ំ ២៨៥៥ម៉ែត្រការ៉េ មែកសម្រ៉ាស់ ៣៩៥០មែក; បង្គោលចំនួន ១៣៤០ ដើម; សម្ភារៈបានដុតបំផ្លាញចោលនៅនឹងកន្លែង និងលែងកូនត្រីចំរុះចូលក្នុងបឹងធម្មជាតិវិញ ២៥ គីឡូក្រាម ៕
