ខេត្តបន្ទាយមានជ័យ ៖ ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រជូននិស្សិតជ័យលាភីរបស់សាកលវិទ្យាល័យជាតិមានជ័យ ដែលមានអ្នកចូលរួមចំនួន ជិត១០០០នាក់ នាព្រឹក ថ្ងៃទី២៨ ខែមីនា ឆ្នាំ ២០២២ នេះ ឯកឧត្តម ឧបនាយករដ្ឋមន្រ្តី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានថ្លែងថា នយោបាយឈ្នះ ឈ្នះ របស់សម្តេចតេជោ ហ៊ុន សែន នាឆ្នាំ១៩៩៨ គឺជាគន្លឹះនៃមាគ៌ាដ៏មានប្រសិទ្ធភាពបំផុត ក្នុងការនាំមកជូនប្រទេសជាតិទាំងមូល និងប្រជាពលរដ្ឋទាំងអស់នូវសុខសន្តិភាពពេញលេញ ដែលជាមូលដ្ឋានគ្រឹះ នៃការអភិវឌ្ឍប្រទេសជាតិ។
ក្នុងឱកាសនោះដែរ ឯកឧត្តម ឧបនាយករដ្ឋមន្រ្តី កែ គឹមយ៉ាន បានថ្លែងបន្ថែមថា ការងារអប់រំជាការងារអាទិភាព យ៉ា ងសំខាន់ ដែលគ្រប់ភាគីពាក់ព័ន្ធទាំងអស់ត្រូវរួមគ្នាឱ្យតម្លៃ រួមគ្នាទទួលខុសត្រូវ និងរួមគ្នាប្ដេជ្ញាចិត្តធ្វើឱ្យបានក្នុងការផលិតចេញនូវធនធានមនុស្សប្រកបដោយសមត្ថភាព វិជ្ជាជីវៈ សីលធម៌ និងមនសិការសេ្នហាជាតិ ជួយការងារសង្គមពិសេសការងារប្រយុទ្ធប្រឆាំងគ្រឿងញៀន។
ជាមួយគ្នានេះ ឯកឧត្តម ឧបនាយករដ្ឋមន្រ្តី កែ គឹមយ៉ាន ក៏បានថ្លែងនូវការកោតសរសើរ និងវាយ តម្លៃខ្ពស់ចំពោះថ្នាក់ដឹកនាំនិងមន្រ្តីទាំងអស់ដែលខិតខំបំពេញការងារផ្តល់សេវាបានល្អនៅសាកលវិទ្យាល័យជាតិមានជ័យ ពិសេសថ្នាក់ដឹកនាំក្រសួងអប់រំ យុវជន និងកីឡា និងមន្រ្តីអប់រំទាំងអស់ ដែលបានខិតខំប្រឹងប្រែង ធ្វើកំណែទម្រង់ ទទួលបានលទ្ធផលល្អអភិវឌ្ឍបានធនធានមនុស្ស និងបានបង្កើតគណៈកម្មការ ដឹកនាំ កំណែទម្រង់សាកលវិទ្យាល័យជាតិមានជ័យ ដើម្បីធ្វើឱ្យសាកលវិទ្យាល័យជាតិមានជ័យកាន់តែមានកិត្យានុភាព ឧត្តមភាព និងការជឿទុកចិត្តកាន់តែទូលំទូលាយទាំងក្នុងប្រទេស និងអន្តរជាតិ។
ជាមួយនឹងភាពសប្បាយរីករាយនោះ ឯកឧត្តម ឧបនាយករដ្ឋមន្រ្តី កែ គឹមយ៉ាន និងលោកជំទាវ ម៉ៅ ម៉ាល័យ កែ គឹមយ៉ាន បាននាំយកអំណោយជាថវិកា និងសម្ភារ ផ្តល់ជូន :
១.មន្ត្រីអប់រំសាកលវិទ្យាល័យជាតិមានជ័យ ចំនួន៦១រូប និងនិស្សិតជ័យលាភីចំនួន៥៣៥នាក់ ម្នាក់ៗថវិកា៥ម៉ឺនរៀល
២.នាយកវិទ្យាល័យនៅក្រុងសិរីសោភ័ណ្ឌ ចំនួន៨នាក់ ម្នាក់ៗថវិកា១០ម៉ឺនរៀល
៣.និស្សិតសាកលវិទ្យាល័យជាតិមានជ័យ ចំនួន ១០០នាក់ ម្នាក់ៗថវិកា៣ម៉ឺនរៀល
៤.ឧបត្ថម្ភសាកលវិទ្យាល័យជាតិមានជ័យ ថវិកា ៥លានរៀល LCD ២០គ្រឿង ម៉ាស៊ីនត្រជាក់ ២សេះ ៣០គ្រឿង កុំព្យូទ័រ៥០រឿង (សរុបជាថវិកាជិត១០ម៉ឺនដុល្លា)។
៥.ឧបត្ថម្ភ នគរបាល កងរាជអាវុធខេត្ត និងគ្រូពេទ្យ មួយក្រុមៗ ថវិកា ៥០ម៉ឺនរៀលផងដែរ។
