ខេត្តកំពង់ឆ្នាំង ៖ សមត្ថកិច្ចនគរបាលនៃស្នងការដ្ឋាននគរបាលខេត្តកំពង់ឆ្នាំង បានធ្វើការឃាត់ខ្លួនជនសង្ស័យចំនួន៣នាក់ ពាក់ព័ន្ធករណីឆបោក លក់ដូរវត្ថុអច្ឆរិយ:(ថ្មស៊ីដែក) ។
ការឃាត់ខ្លួនជនសង្ស័យខាងលើនេះក្រោយជនសង្ស័យទាំងនេះបានប្រព្រឹត្តការឆបោកកាលពីថ្ងៃទី១១ ខែមីនា ឆ្នាំ២០២២ វេលាម៉ោង ១៨:០០នាទី ចំណុចការ៉ាស់សាំងរបស់ឈ្មោះ ទុំ សុភី ស្ថិតក្នុងភូមិត្រពាំងចាន់ ឃុំត្រពាំងចាន់ ស្រុកបរិបូណ៍ ខេត្តកំពង់ឆ្នាំង ។
សមត្ថកិច្ចបានឲ្យដឹងថា ជនសង្ស័យដែលត្រូវបានឃាត់ខ្លួនពាក់ព័ន្ធករណីឆបោក លក់ដូរវត្ថុអច្ឆរិយ:(ថ្មស៊ីដែក) ១-ឈ្មោះ សែម សុខុម ភេទប្រុស អាយុ ៣៦ឆ្នាំ ជាតិខ្មែរ រស់នៅភូមិទី៤ សង្កាត់បឹងសាឡាង ខណ្ឌទួលគោក រាជធានីភ្នំពេញ , ២-ឈ្មោះ ទៀង គឹមម៉ាប់ ភេទប្រុស អាយុ ៣៩ឆ្នាំ ជាតិខ្មែរ រស់នៅភូមិអូរ ឃុំពន្លៃ ស្រុកបរិបូណ៌ ខេត្តកំពង់ឆ្នាំង , ៣-ឈ្មោះ ខឿន សំអាត ភេទប្រុស អាយុ ៤៤ឆ្នាំ ជាតិខ្មែរ រស់នៅភូមិ ក្បាលដំរី ឃុំត្រពាំងចាន់ ស្រុកបរិបូណ៍ ខេត្តកំពង់ឆ្នាំង។
ករណីខាងលើនេះ ឯកឧត្តម អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង អំពាវនាវដល់មហាជនទាំងអស់ត្រូវយកចិត្តទុកដាក់គិតពិចារណាឲ្យបានត្រឹមត្រូវជៀសវាងការចាញ់បោកក្រុមជនខាងលើ ឬក្រុមជនបោកប្រាស់ផ្សេងទៀត ៕
