ខេត្តតាកែវ ៖ នៅព្រឹកថ្ងៃទី២៧ ខែ កុម្ភៈ ឆ្នាំ២០២២ លោក មែ ស៊ីថុន និងសហការី បាននាំយកនូវសៀវភៅដែលមានចំណងជើងថា ”អ្នកយុទ្ធសាស្ត្រវ័យក្មេងនៅអាស៊ី” និងកង់ចំនួន ២០ គ្រឿង ត្រូវបានប្រគល់ជូនលោក អ៊ុត សំនិត ប្រធានក្រុមការងារសមាគមអតីតសិស្ស-និស្សិតនៅកម្ពុជា ប្រចាំខេត្តតាកែវ និងជាប្រធានការិយាល័យអប់រំ យុវជន និងកីឡា នៃរដ្ឋបាលស្រុកត្រាំកក់ ។
លោក មែ ស៊ីថុន ប្រធានសមាគម បានឲ្យដឹងថា កង់ចំនួន ២០ គ្រឿង គឺបានទទួលពីក្រុមហ៊ុនសប្បុរសជន និងកម្លាំងសាមគ្គីពីសមាជិកសមាជិកាសមាគម និង សៀវភៅដែលមានចំណងជើងថា ”អ្នកយុទ្ធសាស្ត្រវ័យក្មេងនៅអាស៊ី” គឺបានទទួលការឧបត្ថម្ភពី ឯកឧត្តម ពៅ សុខ ទីប្រឹក្សាផ្ទាល់សម្តេចតេជោ ហ៊ុន សែន ហើយឯកឧត្តម ក៏ជាអ្នកនិពន្ធសៀវភៅនេះផ្ទាល់ផងដែរ ។
លោកប្រធានសមាគមបានបន្ថែមថា កង់ទាំង ២០ គ្រឿងនេះ គឺសម្រាប់ចែកជូនដល់សិស្សានុសិស្សដែលមានជីវភាពខ្វះខាត ជាពិសេសកំពុងជួបការលំបាកក្នុងការធ្វើដំណើរមកសាលារៀន ។ លោកប្រធានបានបន្តទៀតថា សៀវភៅដែលមានចំណងជើងថា ”អ្នកយុទ្ធសាស្ត្រវ័យក្មេងនៅអាស៊ី” គឺផ្តោតលើកិច្ចដំណើរការនៃការចរចាស្វែងរកសន្តិភាព ជាពិសេស កិច្ចព្រមព្រៀងសន្តិភាពទីក្រុងប៉ារីស ដែលសម្តេចតេជោ បានលះបង់អស់ពីកម្លាំងកាយចិត្ត និងពលីដើម្បីសន្តិភាពសម្រាប់ប្រជាជាតិកម្ពុជា ។ ហើយការចែករំលែកនៅពេលនេះ គឺដើម្បីឲ្យយុវជនជំនាន់ក្រោយបានសិក្សាស្រាវជ្រាវ និងឈ្វែងយល់អំពីប្រវត្តិសាស្ត្ររបស់ខ្លួន កុំឲ្យមានជនអគតិមួយក្តាប់តូចមកបំភ្លៃប្រវត្តិសាស្ត្រ ដើម្បីកេងចំណេញនយោបាយរបស់ពួកគេ ។
ជាមួយគ្នានោះដែរ លោក អ៊ុត សំនិត ប្រធានក្រុមការងារសមាគមប្រចាំខេត្តតាកែវ និងជាប្រធានការិយាល័យអប់រំ យុវជន និងកីឡា នៃរដ្ឋបាលស្រុកត្រាំកក់ បានថ្លែងអំណរគុណយ៉ាងជ្រាលជ្រៅចំពោះក្រុមហ៊ុនសប្បុរសជន សមាជិកសមាជិកាសមាគម និង ឯកឧត្តម ពៅ សុខ ទីប្រឹក្សាផ្ទាល់សម្តេចតេជោ ហ៊ុន សែន ដែលបានផ្តល់អំណោយជាកង់ និងសៀវភៅប្រវត្តិសាស្ត្រ ”អ្នកយុទ្ធសាស្ត្រវ័យក្មេងនៅអាស៊ី” សូម ឯកឧត្តម លោកជំទាវ លោក លោកស្រី អ្នកនាងកញ្ញា ទទួលបាននូវពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ៕
