តបតាមការអញ្ជើញរបស់រដ្ឋមន្រ្តីក្រសួងយុត្តិធម៌នៃប្រទេសជប៉ុន និងដោយទទួលបានការអនុញ្ញាតដ៏ខ្ពង់ខ្ពស់ពីសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសូងមហាផ្ទៃ នៅព្រឹកថ្ងៃទី១៤ ខែកុម្ភៈ ឆ្នាំ២០២២ នៅទីស្តីការក្រសួងមហាផ្ទៃ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានអញ្ជើញដឹកនាំគណៈប្រតិភូក្រសួងមហាផ្ទៃចូលរួមក្នុងកិច្ចប្រជុំលើកទី១នៃវេទិកាយុត្តិធម៌ព្រហ្មទណ្ឌអាស៊ីប៉ាស៊ីហ្វិក ដែលប្រព្រឹត្តទៅនៅទីក្រុង Tokyo នៃប្រទេសជប៉ុន រយៈពេល២ថ្ងៃ គឺចាប់ពីថ្ងៃទី ១៤-១៥ ខែកុម្ភៈ ឆ្នាំ២០២២ តាមរយៈ Video Conference ។
កិច្ចប្រជុំវេទិកាយុត្តិធម៌ព្រហ្មទណ្ឌអាស៊ីប៉ាស៊ីហ្វិកនេះត្រូវបានរៀបចំឡើងដោយរដ្ឋាភិបាលជប៉ុន ក្រោមកិច្ចសម្របសម្រួលពីអង្គការ UNODC ក្នុងគោលបំណងលើកស្ទួយកិច្ចសហប្រតិបត្តិការអន្តរជាតិក្នុងតំបន់អាស៊ីប៉ាស៊ីហ្វិក ដើម្បីពង្រឹងកិច្ចការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ និងការអប់រំកែប្រែ ស្តានីតិសម្បទាជនជាប់ឃុំ ឱ្យកាន់តែមានប្រសិទ្ធភាពខ្ពស់ ជាពិសេសជាវេទិកាដែលជួយសម្រួលឱ្យមន្រ្តីអនុវត្តច្បាប់ទាំងឡាយនៅក្នុងតំបន់បានជួបជុំគ្នា ចែករំលែកបទពិសោធន៍ និងការអនុវត្តល្អជាមួយគ្នាទៅវិញទៅមក។
វេទិកាយុត្តិធម៌ព្រហ្មទណ្ឌអាស៊ីប៉ាស៊ីហ្វិកនេះ មានការអញ្ជើញចូលរួមជាលក្ខណៈសាកលពីសំណាក់ថ្នាក់ដឹកនាំស្ថាប័នយុត្តិធម៌ព្រហ្មទណ្ឌចំនួន ១៧១នាក់ មកពី ១៨ប្រទេស ក្នុងតំបន់អាស៊ីប៉ាស៊ីហ្វិក រួមទាំងអគ្គលេខាធិការអាស៊ាន អង្គការ UNODC ក្នុងនោះមានប្រទេសកម្ពុជាយើង ដែលមានតំណាងមកពីក្រសួងយុត្តិធម៌ និងក្រសួងមហាផ្ទៃផងដែរ។
គណៈប្រតិភូមកពីបណ្តាប្រទេសទាំងអស់ រួមទាំងកម្ពុជាយើងផង បានសម្តែងនូវការពេញចិត្ត និងបានថ្លែងអំណរគុណដល់រដ្ឋាភិបាលជប៉ុនដែលបានរៀបចំអោយមានវេទិកាដ៏មានសារៈសំខាន់នេះឡើងសម្រាប់ផលប្រយោជន៍ក្នុងតំបន់ទាំងមូល។ ជាមួយគ្នានេះផងដែរ ឯកឧត្តមរដ្ឋមន្រ្តីក្រសួងយុត្តិធម៌ជប៉ុន បានថ្លែងអំណរគុណដល់គណៈប្រតិភូនៃប្រទេសទាំងអស់ដែលបានគាំទ្រ និងចំណាយពេលវេលាចូលរួមយ៉ាងសកម្មក្នុងវេទិកានេះ ដែលបានធ្វើអោយវេទិការយៈពេល០២ថ្ងៃនេះប្រព្រឹត្តទៅដោយរលូន និងជោគជ័យជាផ្លែផ្កា ហើយឯកឧត្តម បានប្តេជ្ញាថា នឹងរៀបចំវេទិកានេះជាប្រចាំជារៀងរាល់ឆ្នាំ៕
