រាជធានីភ្នំពេញ ៖ ឯកឧត្តម វង សូត រដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអនុប្រធានអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍បែបនេះ ក្នុងឱកាសដឹកនាំកិច្ចប្រជុំការងាររៀបចំពិធីសម្ពោធមជ្ឈមណ្ឌលជាតិផ្តល់សេវាព្យាបាល ស្តារនីតិសម្បទាអ្នកញៀនគ្រឿងញៀន ដោយស្ម័គ្រចិត្តនិងផ្អែកលើសហគមន៍ នៅព្រឹកថ្ងៃទី១៤ ខែកុម្ភៈ ឆ្នាំ២០២២នេះ ដោយមានការអញ្ជើញចូលរួមពីអ្នកពាក់ព័ន្ធជាថ្នាក់ដឹកនាំ និងថ្នាក់ជំនាញ ពីក្រសួង ស្ថាប័ន និងគណ:កម្មាធិការត្រួតពិនិត្យគ្រឿងញៀនខេត្តព្រះសីហនុ។
ឯកឧត្តម ធូ ស៊ុន រដ្ឋលេខាធិការ បញ្ជាក់ថា ៖ ក្រោយទទួលបានសេចក្តីជូនដំណឹងពីឯកឧត្តម ឧបនាយករដ្ឋមន្រ្តី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន គណកម្មការរៀបចំពិធីសម្ពោធបានរៀបចំការងារប្រុងប្រៀបរៀបជើងការរៀបចំពិធីសម្ពោធមជ្ឈមណ្ឌលជាតិ ដែលនឹងប្រព្រឹត្តទៅនៅថ្ងៃទី២២ ខែមីនា ឆ្នាំ ២០២២ ខាងមុខ ដោយបែងចែកជាបួនក្រុមការងារ មាន៖ក្រុមការងារឯកសារ ក្រុមការងារពិធីការ និងបដិសណ្ឋារកិច្ច ក្រុមការងារសន្តិសុខ សណ្តាប់ធ្នាប់ និងសុខាភិបាល និងក្រុមការងារហិរញ្ញវត្ថុ។
ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ថា ៖ មជ្ឈមណ្ឌលជាតិដែលកើតឡើងពីការផ្តួចផ្តើមរបស់ឯកឧត្តម ឧបនាយករដ្ឋមន្រ្តី កែ គឹមយ៉ាន ប្រធាន អាជ្ញាធរជាតិប្រយុទ្ធប្រឆាំងគ្រឿងញៀន ដើម្បីព្យាបាលស្តារនីតិសម្បទាបណ្តុះបណ្តាលវិជ្ជាជីវៈចំណេះជំនាញដល់ជនរងគ្រោះដោយសារធាតុញៀន បានសាងសង់រួចហើយក្នុងទំហំទឹកប្រាក់ប្រមាណ៧លានដុល្លាអាមេរិក ។
ឯកឧត្តម វង សូត រដ្ឋមន្ត្រី បានមានប្រសាសន៍ដោយថ្លែងអំណរគុណដល់សប្បុរសជន ជាថ្នាក់ដឹកនាំក្នុងប្រទេស និងប្រទេសជាមិត្តមានប្រទេសថៃ វៀតណាម ដែលបានចូលរួមជួយធ្វើឱ្យមជ្ឈមណ្ឌលជាតិដែលជាគំនិតផ្តួចផ្តើមរបស់ឯកឧត្តម ឧបនាយករដ្ឋមន្រ្តី កែ គឹមយ៉ាន និងជាក្តីសង្ឃឹមរបស់មាតា បិតា និងអាណាព្យាបាលដែលមានបុត្រធីតាធ្លាក់ចូលទៅក្នុងអន្ទាក់នៃគ្រឿងញៀន ត្រូវបានលេចចេញជារូបរាងនិងសូមឱ្យអ្នកពាក់ព័ន្ធទាំងអស់រួមគ្នាសហការគ្នា ធ្វើយ៉ាងណាឱ្យការងារនៅមជ្ឈមណ្ឌលជាតិ មានប្រសិទ្ធភាពដើម្បីជាគំរូសម្រាប់មជ្ឈមណ្ឌលដ៏ទៃទៀត ៕
