ខេត្តបាត់ដំបង ៖ កាលពីថ្ងៃទី១២ ខែកុម្ភៈ ឆ្នាំ២០២២ នេះ ឯកឧត្តម ប៊ុន ហុន ប្រធាន និងឯកឧត្តម ឡាំ ជា អនុប្រធានទី១ នៃក្រុមកាងារគណបក្សប្រជាជនកម្ពុជាចុះជួយស្រុកគាស់ក្រឡ ខេត្តបាត់ដំបង បានដឹកនាំក្រុមការងារ ចុះសួរសុខទុក្ខ និងនាំយកអំណោយ ជាគ្រឿងឧបភោគ-បរិភោគ និងថវិកា ចែកជូនដល់បងប្អូនប្រជាពលរដ្ឋដែលកំពុងមានជីវភាពខ្វះខាតចំនួន ៣០០ គ្រួសារនៅស្រុកគាស់ក្រឡ ខេត្តបាត់ដំបង។
ថ្លែងក្នុងពិធីនោះ ឯកឧត្តម ឡាំ ជា បានពាំនាំនូវមតិផ្តាំផ្ញើសួរសុខទុក្ខ និងសេចក្តីនឹករលឹកពីសំណាក់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជាចុះជួយមូលដ្ឋានខេត្តបាត់ដំបង ក្នុងឱកាសនោះដែរ ឯកឧត្តម ឡាំ ជា ក៏បានសូមថ្លែងអំណរគុណដល់បងប្អូនប្រជាពលរដ្ឋដែលបានគាំទ្ររាជរដ្ឋាភិបាលកម្ពុជា ក្នុងការថែរក្សាសន្តិភាព ស្ថេរភាព និងការអភិវឌ្ឍន៍ប្រទេសកម្ពុជាយើងទាំងមូល។
ឯកឧត្តម បានបន្ថែមថា សុខទុក្ខរបស់បងប្អូន គឺជាសុខទុក្ខរបស់យើងខ្ញុំទាំងអស់គ្នា ព្រោះយើងជាមហាគ្រួសារខ្មែរតែមួយ ដែលតែងតែប្រកាន់ខ្ជាប់នូវវប្បធម៌ចែករំលែក ជួយគ្នាទៅវិញទៅមកក្នុងគ្រាលំបាក ដើម្បីភាពសុខសាន្តទាំងអស់គ្នា ក្រោមដំបូលសន្តិភាពតែមួយ។ សម្តេចតេជោ ហ៊ុន សែន និង សម្តេចក្រឡាហោម ស ខេង តែងតែគិតគូរពីសុខទុក្ខ និងជីវភាពរស់នៅប្រចាំថ្ងៃរបស់បងប្អូន ហើយតែងតែណែនាំទោះអោយយើងខ្ញុំចុះមកសួរសុខទុក្ខបងប្អូនជាប្រចាំដើម្បីស្វែងយល់ពីតម្រូវការនានារបស់បងប្អូន។ ទោះអំណោយថ្ងៃនេះមិនច្រើនក្តី តែវាអាចជួយដោះស្រាយជីវភាពរស់នៅប្រចាំថ្ងៃរបស់ប្អូនបានមួយរយៈពេលដែរ ដែលនេះគឺជាទឹកចិត្តរបស់គណបក្សប្រជាជន ដែលកន្លងមកមិនត្រឹមតែផ្តល់អំណោយជូនបងប្អូនប៉ុណ្ណោះទេ តែថែមទាំងបានជួយរំដោះ កសាង និងអភិវឌ្ឍប្រទេសជាតិអោយរីកចម្រើនរុងរឿងរហូតដល់សព្វថ្ងៃនេះ។
ជាមួយគ្នានេះដែរ ឯកឧត្តម ប៊ុន ហុន បានអំពាវនាវអោយបងប្អូនប្រជាពលរដ្ឋកុំចាញ់បោកកលល្បិច ឬពាក្យញុះញុងរបស់ក្រុមអគតិមួយចំនួន ដែលតែងតែបំផុសបំផុលដើម្បីតែផលប្រយោជន៍ផ្ទាល់ខ្លួន មិនគិតគូរដល់ប្រយោជន៍រួមរបស់ជាតិ ដោយមើលរំលងនូវសមិទ្ធិផលដ៏មហាធំធេងដែលគណបក្សប្រជាជនកម្ពុជាបានកសាងជាតិរហូតមកដល់បច្ចុប្បន្ននេះ។ ឯកឧត្តម បានបន្ថែមថា គណបក្សប្រជាជនកម្ពុជាដែលមានសម្តេចតេជោជាប្រមុខ និងសម្តេចក្រឡាហោម ជាអនុប្រធានទទួលបន្ទុកផ្ទាល់ខេត្តបាត់ដំបង តែងតែនៅក្បែរនិងយល់ពីសុខទុក្ខរបស់បងប្អូនប្រជាពលរដ្ឋគ្រប់ពេលវេលា ជាពិសេសបានយកចិត្តទុកដាក់មិនអោយបងប្អូនប្រជាពលរដ្ឋណាម្នាក់អត់អាហារឡើយ។ គណបក្សប្រជាជនកម្ពុជា ហ៊ានថា ហ៊ានធ្វើ ហ៊ានទទួលខុសត្រូវ ដូច្នេះសូមបងប្អូនគាំទ្រគណបក្សប្រជាជនកម្ពុជាអោយបាន១០០% ដើម្បីសន្តិភាព និងការអភិវឌ្ឍប្រទេសជាតិយើង។
ក្នុងឱកាសនោះដែរ ឯកឧត្តម ប៊ុន ហុន បានគោរពថ្លែងអំណរគុណដល់ សម្តេចតេជោ ហ៊ុន សែន ដែលបានខិតខំប្រឹងអស់ពីកម្លាំងកាយចិត្ត ស្វះស្វែងរកវ៉ាក់សាំងចាក់ជូនប្រជាពលរដ្ឋបានគ្រប់ៗគ្នា និងទាន់ពេលវេលា ដើម្បីសុខមាលភាពរបស់ប្រជាពលរដ្ឋទាំងអស់របស់សម្តេច ដែលបានធ្វើអោយប្រទេសកម្ពុជាយើងជាប់លេខ១ ក្នុងតំបន់អាស៊ី និងលេខ២ ក្នុងពិភពលោក ជាប្រទេសមានការស្ទុះងើបឡើងវិញពីមេរោគកូវីដ-១៩ បានល្អជាងគេបំផុតក្នុងពិភពលោក។
ឯកឧត្តម បានផ្តាំផ្ញើដល់បងប្អូនប្រជាពលរដ្ឋ អោយបន្តអនុវត្តវិធានការសុខាភិបាល ជាពិសេស វិធានការ ៣កុំ ៣ការពារ របស់សម្តេចតេជោ ហ៊ុន សែន អោយបានខ្ជាប់ខ្ជួន ដើម្បីសុខភាព និងសុខមាលភាពរបស់បងប្អូនផ្ទាល់ ក៏ដូចជាសហគមន៍ទាំងមូល៕
