ខេត្តបាត់ដំបង ៖ ឯកឧត្តម សក់សេដ្ឋា រដ្ឋលេខាធិការក្រសួងមហាផ្ទៃ និងជាប្រធានក្រុមការងាររាជរដ្ឋាភិបាល ចុះជួយស្រុកបវេល បានថ្លែងទៅកាន់ប្រជាពលរដ្ឋថាប្រជាពលរដ្ឋបច្ចុប្បន្ន រស់នៅសុខស្រួល មិនមានការភិតភ័យគ្រាប់កាំភ្លើងផ្លោង ខ្មែរក្រហមបាញ់សម្លាប់ ឬដុតផ្ទះឬចោរកម្មផ្សេងៗទៀត ។
ឯកឧត្តមបានថ្លែងនាព្រឹកថ្ងៃទី ២៦ ខែកក្តដា ឆ្នាំ២០១៥ នៅបរិវេណវត្តឧត្តមសាមគ្គី ហៅវត្តដាច់ព្រ័តស្ថិត ក្នុងភូមិដាច់ព្រ័ត ឃុំបវេល ស្រុកបវេលដែលមានការចូលរួម លោក ខាន់ ម៉ាណេរ ប្រធានមន្ទីរ សាធារណៈការនឹងដឹកជញ្ជូនខេត្តបាត់ដំបង និងជាប្រធានក្រុមការងារឃុំក្តុលតាហែន និងឯកឧត្តមអភិបាលរង ខេត្តបាត់ដំបង និងឯកឧត្តមអភិបាលរងខេត្តប៉ៃលិន ព្រមទាំងឯកឧត្តមក្រុមការងារចុះជួយឃុំជាច្រើនរូបទៀត ក្នុងពិធីប្រគេនទៀនវស្សា និងទ័យវត្ថុដល់ព្រះសង្ឃគង់ចាំព្រះវស្សា ចំនួន ២៩ វត្ត ។
ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ និងជាប្រធានក្រុមការងារ រាជរដ្ឋាភិបាល ចុះជួយស្រុកបវេល បានថ្លែងទៅកាន់ប្រជាពលរដ្ឋថា កាលពីមុនបោះឆ្នោតតំណាងរាស្ត្រ សម្តេចអគ្គមហាសេនាបតីតេជោ ហ៊ុន សែន ក៏ជាប្រមុខរាជរដ្ឋាភិបាល តែកាលនោះ ប្រទេសជាតិមិនទាន់ចប់សង្គ្រាមទាំងស្រុង មានខ្មែរក្រហាម មានចោរព្រៃ មានប៉ារ៉ា លុះឆ្នាំ១៩៩៣ ទើបបានបោះឆ្នោតភាគីប្រឆាំងរដ្ឋាភិបាលមួយចំនួន ក៏បានចូលរួមបោះឆ្នោតតាមអង្គការសហប្រជាជាតិ ។ ប៉ុន្តែរបបខ្មែរក្រហម មិនទាន់សម្រេចចិត្តចូលរួមបោះឆ្នោតឡើយ ធ្វើអោយប្រជាពលរដ្ឋរស់នៅជួបការភិតភ័យជាខ្លាំង ទាំងថ្ងៃទាំងយប់ ដោយខ្លាចគ្រាប់កាំភ្លើងផ្លោង ចោរប្លន់និងខ្មែរក្រហមចូលដុតផ្ទះ ។ ដោយសារនយោបាយឈ្នះសម្តេច ហ៊ុន សែន បានធ្វើពលីកម្មគ្រប់បែបយ៉ាង ដើម្បីបង្រួបបង្រួមជាតិទាំងមូលអោយមានសន្តិភាព ទើបខាងភាគីខាងខ្មែរក្រហម ចូលរួមបោះឆ្នោតជាសកលជ្រើសរើសនាយករដ្ឋមន្ត្រីតាមអង្គការសហប្រជាជាតិ ។ នេះជាអាណត្តិទី ៥ ដែលប្រជាពលរដ្ឋខ្មែរទាំងអស់ រស់នៅសុខស្រួល មិនមាការភិតភ័យគ្រាប់កាំភ្លើងផ្លោង ខ្មែរក្រហមបាញ់សម្លាប់ ឬដុតផ្ទះឬចោរកម្មផ្សេងៗទៀត ។
ក្រោយពីសំណេះសំណាលជាមួយប្រជាពលរដ្ឋឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ បានប្រគេនទៀនវស្សាក្នុង១វត្តចំនួន២ដើម អង្ករ៥០គីឡូ និងទ័យវត្ថុគ្រប់មុខ ព្រមទាំងចែកជូនក្រណាត់សដល់ចាស់ម្នាក់ ១ ដុំ និងថវិការម្នាក់១ម៉ឺនរៀលផងដែរ ៕
