ខេត្តកំពង់ឆ្នាំង ៖ សមត្ថកិច្ចចម្រុះចុះឃាត់និងបញ្ឈប់សកម្មភាពរថយន្តដឹកដី និងអេស្កាវ៉ាទ័រ ជីកកាយដឹកយកអាចម៍ដីលក់ប្រើប្រាស់ច្បាប់អនុញ្ញាតិហួសសុពល ភាព។ ការចុះឃាត់គ្រឿងចក្រខាងលើនេះ ធ្វើឡើងក្រោមការចង្អុលបង្ហាញ និងបញ្ជាផ្ទាល់ពី ឯកឧត្តម អ៊ិត សុធា ព្រះរាជ អាជ្ញាអមសាលាដំបូងខេត្តកំពង់ឆ្នាំង ដឹកនាំកម្លាំងដោយលោក ឡុង ស៊ីថា ព្រះរាជអាជ្ញារង និងមានការចូលរួមពីមន្ត្រីមន្ទីររ៉ែ និងថាមពលខេត្ត និងមន្ត្រីរដ្ឋបាលជលផលផងដែរ ។
ការឃាត់រថយន្តដឹកដីខាងលើនេះធ្វើឡើងនៅវេលាម៉ោង១០ព្រឹក ថ្ងៃទី២០ ខែមករា ឆ្នាំ២០២២ នៅចំណុចបឹងស្គន់ក្តី ក្នុងភូមិថ្នល់តាសែង ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។
ក្នុងការចុះឃាត់ខាងលើនេះ សមត្ថកិច្ចឃាត់រថយន្តបែនដឹកដីចំនួន ០៥គ្រឿង តែត្រូវបានក្រុមរថយន្តដឹកដីទាំងនោះបើករត់គេចអស់ ដោយឡែកអេស្កាវ៉ាទ័រមួយគ្រឿងត្រូវបានឃាត់នៅហ្នឹងកន្លែង ។
លោក ឡុង ស៊ីថា ព្រះរាជអាជ្ញារង បានឲ្យដឹងថា ការឃាត់រថយន្តដឹកដី និងអេស្កាវ់ាទ័រខាងលើនេះ ដោយពិនិត្យឃើញថា ធ្វើសកម្មភាពដោយប្រើប្រាស់ច្បាប់អនុញ្ញាតិហួសសុពលភាព។ លោកបានបន្តទៀតថា ខាងគ្រឿងចក្រត្រូវទៅសុំ បន្តច្បាប់អនុញ្ញាតិឲ្យត្រឹមត្រូវឡើងវិញ ទើបអាចបន្តសកម្មភាពវិញបាន ។
បច្ចុប្បន្នគ្រឿងចក្រអេស្កាវ៉ាទ័រ និងមេការគ្រឿងចក្រ ត្រូវបានបញ្ជូនមកមន្ទីរកសិកម្ម រុក្ខា ប្រមាញ់ និងនេសាទ ដើម្បីបន្តនីតិវិធីតាមផ្លូវច្បាប់ ៕
