ខេត្តកំពង់ឆ្នាំង ៖ ឯកឧត្តម សាន់ យូ អភិបាលរងខេត្ត ដឹកនាំមន្ត្រីស្ថាប័នពាក់ព័ន្ធក្នុងខេត្តជាច្រើននាក់ និងកងកម្លាំងប្រមាណ ២០០នាក់ របស់គណបញ្ជាការឯកភាពខេត្ត មានកម្លាំងកងរាជអាវុធហត្ថ និងកម្លាំងនគរបាល បានចុះដកបង្គោល និងដកហូតយកដីព្រៃលិចទឹកក្នុងតំបន់៣ ប្រមាណជាងពាន់ហិចតា ដែលបានរងនូវការរំលោភបំពានយកធ្វើជាកម្មសិទ្ធកន្លងមក ។
ឯកឧត្តម សាន់ យូ មានប្រសាសន៍ថា សកម្មភាពចុះដកបង្គោលខាងលើនេះធ្វើជាបន្តបន្ទាប់ ដូចភ្លៀង រលឹមជារាងរាល់ថ្ងៃរហូតត្រូវបានបញ្ចប់រួចរាល់ ដោយកងកម្លាំងគណ:បញ្ជាការឯកភាពខេត្តត្រូវឈរជើងនៅគោលដៅនោះជាប្រចាំ។
សូមរំលឹកថា ក្រុមការងារអន្តរក្រសួង ដឹកនាំដោយ ឯកឧត្តម ឧបនាយកដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដីនគររូបនីយកម្មសំណង់ និងសុរិយោដី នាថ្ងៃទី២៩ ខែវិច្ឆិកា ឆ្នាំ ២០២១ បានអញ្ជើញចុះដល់ទីតាំដីព្រៃលិចទឹក ស្ថិតនៅឃុំច្រណូក ស្រុកកំពង់លែង ខេត្តកំពង់ឆ្នាំង ដែលរងកាកាប់បំផ្លាញ ជនខិលខូចយកធ្វើជាកម្មសិទ្ធ និងបានប្រកាសដកហូតដីទាំងនោះមកជាសម្បត្តិរដ្ឋវិញ ។
ក្រុមការងារអន្តរក្រសួង ដែលបានចូលរួមក្នុងកិច្ចការនេះ មានឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ និងជាប្រធានក្រុមការងាររាជរដ្ឋាភិបាលចុះខេត្តកំពង់ឆ្នាំង និងឯកឧត្តម វ៉េង សាខុន រដ្ឋមន្រ្តីក្រសួងកសិកម្មរុក្ខាប្រម៉ាញ់និងនេសាទ ឯកឧត្តមនាយឧត្តមសេនីយ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និង ឯកឧត្តម ស៊ុន សុវណ្ណារិទ្ធ អភិបាលខេត្តកំពង់ឆ្នាំង និងឯកឧត្តម អស់លោក លោកស្រីជាច្រើនរូបផងដែរ ៕
