រថយន្ត បុកម៉ូតូ បង្កគ្រោះថ្នាក់ធ្ងន់ ៣ នាក់ អ្នកបើកបរ គេចខ្លួនបាត់

បាត់ដំបង ៖ រថយន្តឆ្លាមពណ៌ស គ្មានស្លាកលេខ បើកលឿនបុកម៉ូតូ១គ្រឿង នៅផ្លូវបំបែក ៤ ប៉ើងទៅម្ខាងផ្លូវ បណ្តាលអោយ គ្រោះថ្នាក់ធ្ងន់៣នាក់ ។ អ្នកបើកបររថយន្តបន្តទៅដល់ឃុំអូរតាគី ស្រុកថ្មគោល ទុករថយន្តចោលគេចខ្លួនបាត់ ។

ហេតុការណ៍នេះកើតឡើង កាលវេលាម៉ោង២៤និង១០នាទី រំលងអាធ្រាត ឈានចូលថ្ងៃទី២៣ ខែកក្កដា ឆ្នាំ២០១៥ លើកំណាត់ផ្លូវជាតិលេខ៥ នៅចំណុចផ្លូវបំបែក៤ ក្បែរគ្លីនីកវិសាលសុខ ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។

ប្រភពពីសមត្ថកិច្ចចរាចរណ៍ បានអោយដឹងថា បុរស៣នាក់រងគ្រោះធ្ងន់ មានទី១ ឈ្មោះ យួន បូណា អាយុ២៣ឆ្នាំ បាក់ស្មងជើងឆ្វេង ។ ទី២ ឈ្មោះ វួន សាវុន ហៅម៉ាប់ អាយុ២៣ឆ្នាំ បែកក្បាលភ្នែក ប្រអប់ជើង និងដាច់ម្រាមជើង១ ។ ទី៣ ឈ្មោះ មិត្ត សុខុន អាយុ២២ឆ្នាំ ដាច់កជើង និងបែកភ្នែកឆ្វេង ។ អ្នកទាំង៣នាក់ មានរបរជាកម្មករសំណង់ មានទីលំនៅភូមិបត់សាលា ឃុំឈើទាល ស្រុកបាណន់ ខេត្តបាត់ដំបង ។ ម៉ូតូម៉ាកវីវ៉ាពណ៌ខ្មៅ ពាក់ស្លាកលេខ បាត់ដំបង1B8201 ។ ចំណែករថយន្តបង្ក ម៉ាកឆ្លាមពណ៌ស គ្មានស្លាកលេខ ។

ប្រភពសាក្សី បានអោយដឹងថា មុនពេលកើតហេតុ ម៉ូតូ១គ្រឿងជិះគ្នា ៣ នាក់ធ្វើដំណើរ ពីកើតទៅលិច ពេលបើកឆ្លងផ្លូវបំបែក ៤ ក៏មានរថយន្តឆ្លាម បើកលឿនពីទិសជើង មកបត់ស្តាំដៃ ដើម្បីប្តូរទិសទៅខាងលិចដែរ តែចាប់ហ្វ្រាំងមិនទាន់ ក៏បុកម៉ូតូ ប៉ើងខ្ទាតឆ្លងផ្លូវម្ខាង បណ្តាលអោយ មនុស្សរងរបួសធ្ងន់ ហើយរថយន្ត បានបន្តទៅមុខបាត់ឈឹង ។

ប្រភពពីសមត្ថកិច្ចចរាចរណ៍ បានបញ្ជាក់ថា ក្រោយពីកើតហេតុ សមត្ថកិច្ចបានចុះធ្វើការវាស់វែង និងយកជនរងគ្រោះ ចូលសង្គ្រោះនៅគ្លីនីកវិសាលសុខ ខណៈនោះ កម្លាំងនគរបាលក្រុមបង្ការបង្ក្រាប បានតាមរករថយន្តបង្ក ឃើញទុករថយន្តចោល នៅលើផ្លូវជាតិលេខ៥ ក្នុងភូមិអូរតាគី ឃុំអូរតាគី ស្រុកថ្មគោល រីឯម្ចាស់គេចខ្លួនបាត់ ។ ចំពោះមធ្យោបាយទាំង ២ គ្រឿង សមត្ថកិច្ចបាននាំ ទៅកាន់ការិយាល័យចរាចរណ៍ផ្លូវគោក រងចាំធ្វើការដោះស្រាយជាក្រោយ ៕