ខេត្តពោធិសាត់ ៖ ឯកឧត្តម ជាវ តាយ អភិបាលនៃគណៈអភិបាលខេត្តពោធិ៍សាត់ថ្លែងថា ៖ រយៈកាលកន្លងមកនេះ រាជរដ្ឋាភិបាលដែលមានអន្តរក្រសួង ចេញនូវអនុក្រិត្យលេខ១១៣អនក្រ បានអនុវត្តអំពីសំណល់រឹងនិងរាវ ហើយការអនុវត្តនេះឃើញថាមិនទាន់បានល្អប្រសើរនៅឡើយទេ។ ដោយឡែកខេត្តពោធិ៍សាត់យើង ក៍ត្រូវតែមានវិធានការពាក់ពន្ធនឹងសំរាមនេះជាចាំបាច់ ព្រោះសំរាមគឺជាសំណល់ដែលបំពុលបរិស្ថាន ប៉ះពាល់សុខភាពប្រជាពលរដ្ឋ ដែលយើងត្រូវរួមគ្នាគិត រួមគ្នាធ្វើ រួមគ្នាទទួលខុសត្រូវ ធ្វើយ៉ាងណាឲ្យបរិស្ថានក្នុងខេត្តពោធិ៍សាត់ទទួលបានជោគជ័យ។
ឯកឧត្តមអភិបាលខេត្តលើកឡើងបែបនេះ ក្នុងឱកាសអញ្ជើញជាអធិបតីក្នុងទិវាអនាម័យបរិស្ថានជាតិ ២៣ វិច្ឆិកា ដែលបានប្រារព្ធធ្វើនៅវិទ្យាល័យពោធិ៍សាត់ នាថ្ងៃទី២៣ ខែវិច្ឆិកា ឆ្នាំ២០២១។
ឯកឧត្តម ជាវ តាយ បានសម្ដែងនូវសេចក្ដីរីករាយយ៉ាងខ្លាំងចំពោះមន្ទីរបរិស្ថានខេត្ត ដែលបានសហការជាមួយអាជ្ញាធរគ្រប់លំដាប់ថ្នាក់ មន្ទីរជំនាញ និងលោកគ្រូអ្នកគ្រូនៅវិទ្យាល័យពោធិ៍សាត់ រៀបចំទិវាអនាម័យបរិស្ថានជាតិនេះឡើង ក្រោមប្រធានបទ (ភូមិឋានស្អាត សុខភាពល្អ ជីវិតរីករាយ) គឺជាកិច្ចការមួយដ៍សំខាន់សម្រាប់យើងទាំងអស់គ្នា។ ខេត្តពោធិ៍សាត់ដែលមានមន្ទីរបរិស្ថានជាសេនាធិការ ទទួលបន្ទុកលើជំនាញបរិស្ថាន បានបំពេញតួនាទីរបស់ខ្លួនយ៉ាងសកម្មក្នុងការផ្សព្វផ្សាយ និងបញ្ជ្រាបចំណេះដឹងលើវិស័យបរិស្ថាន ដើម្បីចូលរួមកិច្ចគាំពារបរិស្ថាន ការអភិរក្សចម្រុះ និងការរស់នៅប្រកបដោយចីរភាពដល់សាធារណៈជន។
ឯកឧត្តម ជាវ តាយ បានបញ្ជាក់ថា ទិវាអនាម័យបរិស្ថាន ២៣ វិច្ឆិកា បង្កើតឡើងក្នុងគោលបំណង លើកកម្ពស់ការអប់រំ ផ្សព្វផ្សាយនិងជម្រុញចលនាប្រជាពលរដ្ឋ ព្រះសង្ឃ កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ សិស្ស និស្សិត ឲ្យចូលរួមធ្វើអនាម័យ កែលំអរសោភ័ណភាពទីក្រុង ទីប្រជុំជន ជនបទ ភូមិឋាន វត្តអារាម មន្ទីរពេទ្យ រោងចក្រ សហគ្រាស ទីផ្សារ និងមជ្ឈមណ្ឌលសេដ្ឋកិច្ច សំដៅរួមចំណែកកសាងសង្គមកម្ពុជាឲ្យមានបរិស្ថានស្អាតនិងស្រស់បំព្រង។ ឯកឧត្តមអភិបាលខេត្តបន្តទៀតថា ការរួមចំណែកក្នុងការធ្វើអនាម័យទាំងនៅលំនៅដ្ឋាន ទីកន្លែងបម្រើការងារ សាលារៀន និងនៅតាមទីសាធារណៈ ជាកិច្ចការដ៍សំខាន់របស់យើងទាំងអស់គ្នា មិនថាអាជ្ញាធរឬអង្គភាពជំនាញផ្ទាល់នោះទេ យើងត្រូវចាត់ទុកខេត្តពោធិ៍សាត់ក៍ដូចប្រទេសកម្ពុជាទាំងមូលជាផ្ទះរបស់យើង ដូច្នេះយើងត្រូវចូលរួមទាំងអស់គ្នាដើម្បីឲ្យភូមិឋានយើង ខេត្តយើង និងប្រទេសជាតិយើង មានបរិស្ថានល្អ រស់នៅមានសេចក្ដីសុខនិងភាពរីកចម្រើន។ ក្នុងឱកាសនោះ ឯកឧត្តម ជាវ តាយ បានប្រគល់ធុងសម្រាម ម៉ាស់ និងសម្ភារៈប្រើប្រាស់មួយចំនួនទៀត សម្រាប់ប្រើប្រាស់ក្នុងវិទ្យាល័យពោធិ៍សាត់នោះផងដែរ។
បន្ទាប់មកនៅព្រឹកថ្ងៃដដែលនេះ ឯកឧត្តម ជាវ តាយ អភិបាលនៃគណៈអភិបាលខេត្តពោធិ៍សាត់ និងថ្នាក់ដឹកនាំរួមដំណើរទាំងអស់ បានបន្តចុះទៅពិនិត្យមើលទឹកប្រឡាយមេ ដែលកំពុងហៀរលិចស្រែស្រូវនិងភូមិឋានរបស់ប្រជាកសិករ នៅឃុំអូរតាប៉ោងនិងឃុំស្វាយដូនកែវ ស្រុកបាកាន ដែលទឹកទាំងនេះមិនមែនបណ្ដាលមកពីជំនន់ស្ទឹងពោធិ៍សាត់នោះទេ គឺធ្លាក់មកពីខាងស្រុករុក្ខគិរីនិងស្រុកមោងឬស្សី ខេត្តបាត់ដំបង។
ឯកឧត្តម ជាវ តាយ បានប្រាប់ប្រជាកសិករថា ក្នុងរយៈពេល៣រឺ៤ថ្ងៃទៀតបើពុំមានភ្លៀងធ្លាក់ខ្លាំងទេ ទឹកក្នុងស្រែនឹងស្រកទៅវិញជាបណ្ដើរៗហើយ ហើយក៍មិនធ្វើឲ្យប៉ះពាល់ស្រែស្រូវផលដំណាំរបស់បងប្អូនធ្ងន់ធ្ងរនោះដែរ តែបងប្អូនត្រូវតែមានការប្រុងប្រយ័ត្នជានិច្ច។ ជាមួយគ្នានេះឯកឧត្តមអភិបាលខេត្ត សូមឲ្យអាជ្ញាធរមូលដ្ឋានក្ដាប់សភាពការណ៍ឲ្យបាន បើមានបញ្ហាអ្វីកើតឡើងត្រូវរាយការណ៍ជាបន្ទាន់ ដើម្បីមានវិធានការណ៍។ ចំណែកមន្ទីរកសិកម្មរុក្ខាប្រមាញ់និងនេសាទ ត្រូវត្រៀមស្រូវពូជសម្រាប់ស្ដារឡើងវិញនៅពេលទឹកស្រក ៕
