រាជធានីភ្នំពេញ ៖ សមត្ថកិច្ចជំនាញគ្រឿងញៀនកម្ពុជា បានបើកប្រតិបត្តិការ បង្ក្រាបករណីជួញដូរគ្រឿងញៀនឆ្លងដែនខុសច្បាប់ដោយបានរឹបអូសគ្រឿងញៀនបានចំនួន១៦៧គីទ្បូក្រាម និងឃាត់ខ្លួនជនសង្សយ័សញ្ជាតិកាណាដាម្នាក់ ខណដែលប្រតិបត្តិការនោះធ្វើទ្បើង នៅរាជធានីភ្នំពេញ ។
មន្ត្រីនៃមន្ទីរប្រឆាំងបទល្មើសគ្រឿងញៀនបានបញ្ជាក់ប្រាប់សារពត៌មានថា ការបង្ក្រាបនេះធ្វើឡើងចាប់ពីថ្ងៃទី ២៧ ខែតុលា ដល់ថ្ងៃទី១០ ខែវិច្ឆិកា ឆ្នាំ២០២១ ដោយសមត្ថកិច្ចនៃមន្ទីរប្រឆាំងបទល្មើសគ្រឿងញៀន (ក១) ដឹកនាំដោយឧត្តមសេនីយ៍ទោ អ៊ិន សុង និងវរសេនីយ៍ឯក ម៉ាក់ សេរីវឌ្ឍនៈ នាយករងមន្ទីរប្រឆាំងបទល្មើសគ្រឿងញៀន និងវរសេនីយ៍ទោ ហុង វណ្ណារិទ្ធ នាយការិយាល័យ (ក១) ចូលរួមសហការជាមួយកម្លាំងជំនាញស្នងការដ្ឋាននគរបាលរាជធានីភ្នំពេញ ព្រមទាំងមានការ សម្របសម្រួលពីលោក ស៊ិត វណ្ណៈ ព្រះរាជអាជ្ញារងសាលាដំបូងរាជធានីភ្នំពេញផងដែរ។ក្រុមជំនាញ បានចុះស្រាវជ្រាវ និងឈានទៅបង្ក្រាបឧក្រិដ្ឋជនជួញដូរគ្រឿងញៀនឆ្លងដែន នៅ៣គោលដៅ ផ្សេងៗគ្នាជាបន្តបន្ទាប់រួមមាន៖ គោលដៅទី១-នៅចំណុចក្រុមហ៊ុនដឹកជញ្ជូន ស្ថិតនៅភូមិត្រពាំងស្វាយ សង្កាត់ឃ្មួញ ខណ្ឌសែនសុខ។ គោលដៅទី២-ចំណុចបន្ទប់លេខ ៤១២១ ខុនដូជិតកោះពេជ្រ សង្កាត់ទន្លេបាសាក់ ខណ្ឌចំការមន និងគោលដៅទី៣-នៅបន្ទប់ 13AD និង 13AE ខុនដូរ នៅផ្លូវលេខ៣០២ សង្កាត់បឹងកេងកង រាជធានីភ្នំពេញ។
ជនសង្ស័យដែលត្រូវបានឃាត់ខ្លួន ឈ្មោះ FU YONG QING ភេទប្រុស សញ្ជាតិកាណាដា និងដកហូត ថ្នាំអ៊ិចស្តាស៊ីគ្រាប់ (MDMA) ពណ៌ផ្កាឈូក ៨៥ ៩២២គ្រាប់ ស្មើទម្ងន់ជាង ២៨គីឡូក្រាម, ថ្នាំអ៊ិចស្តាស៊ីគ្រាប់ (MDMA) ពណ៌ប្រផេះ ១៥៤,៤៧៤គ្រាប់ ស្មើទម្ងន់ជាង៦០គីឡូក្រាម, អ៊ិចស្តាស៊ីម្សៅ (MDMA) កញ្ចប់រូបសេះ F3 ទម្ងន់ជាង៥០គីឡូក្រាម, អ៊ិចស្តាស៊ីក្រាម (MDMA) ទម្ងន់ជាង២៤គីឡូក្រាម, នីមេតាហ្សេប៉ាម (Nimetazepam) ៩,៧៥០គ្រាប់ ស្មើទម្ងន់ជិត២គីឡូក្រាម, មេតំហ្វេតាមីន (ICE) ទម្ងន់៩៨.៩៧ក្រាម, កេតាមីន (Ketamine) ទម្ងន់ ២.៣២ក្រាម រួមទាំងចាប់យកសម្ភារៈ អាវុធខ្លី១ដើម (គ្រាប់ ៦) ជញ្ជីង១គ្រឿង រថយន្ត១គ្រឿង និងមានសម្ភារ:មួយចំនួនទៀតផងដែរ៕
