ខេត្តកំពង់ធំ ៖ ថ្ងៃទី២៧ ខែតុលា ឆ្នាំ២០២១ ខណ្ឌរដ្ឋបាលជលផលកំពង់ធំ បានចុះបំពេញការងារ ទទួលបានលទ្ធផលល្អនិងដំណើរការដោយរលូន។
ការចុះបំពេញភារកិច្ចខាងលើនេះមានដូចជា៖ ពេលព្រឹក លោក ជិន ស៊ីថា នាយខណ្ឌរដ្ឋបាលជលផលកំពង់ធំ ជួបជាមួយក្រុមការងារCOST របស់អង្គការ worldveson ពិភាក្សាអំពីការអភិវឌ្ឍន៌វារីវប្បកម្ម ការកែច្នៃផលិតផលជលផលប្រកបដោយគុណភាព និងទីផ្សារ ។
នៅរសៀលថ្ងៃដដែលនេះ នាយខណ្ឌបានចូលរួមកិច្ចប្រជុំបូកសរុបរបាយការណ៍ទីតាំងដីដែលបានប្រើប្រាស់ និងអាស្រ័យផលក្នុងតំបន់ដីព្រៃសហគមន៍ និងគម្របព្រៃឆ្នាំ២០០២ ក្រោមអធិបតីភាពឯកឧត្តម ងួន រតនៈ អភិបាលខេត្ត នៅសាលាខេត្តកំពង់ធំ ។
ដោយឡែកលោក ប៉ៅ ម៉េងហុង និងលោក ឡែម ភីរម្យ មន្ត្រីខណ្ឌរដ្ឋបាលជលផលកំពង់ធំ សហការជាមួយក្រុមការងារអង្គការអភិវឌ្ឍនារីខ្មែរ (ANKO) ចុះសម្របសម្រួលកិច្ចប្រជុំនៅសហគមន៍ស្រះជម្រកត្រីចំនួន០២គឺ ៖ សហគមន៍ស្រះជម្រកត្រី ត្រពាំងក្តីត្នោត ស្ថិតក្នុងភូមិក្ដីចារ ឃុំរុងរឿង ស្រុកស្ទោង ។ សហគមន៍ស្រះជម្រកត្រីស្ទឹងជីមាស ស្ថិតក្នុងភូមិជីមាស ឃុំម្សាក្រង ស្រុកស្ទោង ។ លទ្ធផលដែលទទួលបានក្នុងកិច្ចប្រជុំ៖ទី១-បានអនុម័តលក្ខន្តិក និងបទប្បញ្ញតិស្រះជម្រកត្រី ។ ទី២-បានបោះឆ្នោតជ្រើសរើសគណៈកម្មការ គ្រប់គ្រងស្រះជម្រកត្រី។ ទី៣-បានប្រជុំបែងចែកតួនាទី ភារកិច្ចគណៈកម្មការដែលទើបជាប់ឆ្នោតថ្មី ។
បន្ទាប់ក្រុមការងារក៏បានចុះពិនិត្យការ ស្ដាររុក្ខជាតិទឹក(កំប្លោក) ចេញពីស្រះជម្រកត្រីផងដែរ ។
ចំណែកឯសង្កាត់រដ្ឋបាលជលផលស្រុកបារាយណ៍ បានចូលរួមជាមួយក្រុមការងាររដ្ឋបាលជលផល ចុះផ្សព្វផ្សាយអំពីសារៈសំខាន់នៃព្រៃលិចទឹក នៅឃុំចុងដូង នឹងឃុំបារាយណ៍ ស្រុកបារាយណ៍ ខេត្តកំពង់ធំ អ្នកចូលរួមសរុបចំនួន ១៤២ នាក់ ប្រុស១២៤នាក់ នឹងស្រី១៨ នាក់ ។
ដោយឡែកកិច្ចការបង្ក្រាបបទល្មើសវិញ ខណ្ឌរដ្ឋបាលជលផលកំពង់ធំ ដឹកនាំកម្លាំងផ្នែករដ្ឋបាលជលផលផាត់សណ្តាយ និងសង្កាត់រដ្ឋបាលជលផលពាមបាង សហការជាមួយអធិការដ្ឋានរដ្ឋបាលជលផលខាងជើងបឹងទន្លេសាប និងសហគមន៍នេសាទដូនស្តើង បន្តសកម្មភាពរុះរើវះកាត់របាំងសាច់អួន និងស្បៃមុង នៅចំណុចភូមិពាមបាង ឃុំពាមបាង ស្រុកស្ទោង ។
ក្នុងការបង្ក្រាបខាងលើនេះ លទ្ធផលអនុវត្តន៍បាន០២ ករណី បានរុះរើ បំផ្លាញចោលឧបករណ៍នេសាទរបាំងសាច់អួន និងស្បៃមុង នៅនឹងកន្លែងរួមមាន ៖
-របាំងសាច់អួនចំនួន១២របាំង ប្រវែង២២៣០ម៉ែត្រ
-របាំងស្បៃមុងចំនួន២៤ របាំង ប្រវែង២៩០០ម៉ែត្រ
-ឡុកចំនួន៨២គ្រឿង
-លូចំនួន១១៦មាត់
-បង្គោលចំនួន៣០៥០ដើម
-ចាក់លែងត្រីចំនួន១៣០គក្រ ៕
