ឧត្តរមានជ័យ ៖ ឯកឧត្តម ប៉ែន កុសល្យ អភិបាលនៃគណៈអភិបាលខេត្តឧត្តរមានជ័យ ព្រមទាំងឯកឧត្តម លោកជំទាវ អភិបាលរងខេត្ត មេបញ្ជាការកងកម្លាំងទាំង ៣ ប្រធានមន្ទីរអង្គភាពពាក់ព័ន្ធ និងអាជ្ញាធរមូលដ្ឋាន បានអញ្ជើញចុះជួបសំណេះសំណាលសាកសួរសុខទុក្ខ និងនាំយកកញ្ចប់ថវិការបស់ប្រមុខរាជរដ្ឋាភិបាល ប្រគល់ជូនដល់គ្រួសារសព ដែលស្លាប់ដោយជម្ងឺកូវីត១៩ ក្នុងមួយគ្រួសារ ទទួលបានថវិកាចំនួន ២លានរៀល និងអំណោយរបស់ឯកឧត្តមអភិបាលខេត្ត រួមមាន អង្ករ មី ត្រីខ អំបិល ប៊ីចេង ទឹកត្រី ទឹកស៊ីអ៊ីវ និងទឹកបរិសុទ្ធមួយចំនួនផងដែរ។
ឯកឧត្តម ប៉ែន កុសល្យ បានមានប្រសាសន៍ លើកឡើងថា ការរៀបចំផ្ដល់ជូននូវថវិការបស់រាជរដ្ឋាភិបាលនេះ គឺការគិតគូដោយយកចិត្តទុកដាក់បំផុត និងជាការចូលរួមចំណែករំលែកទុក្ខរបស់សម្តេចតេជោ ហ៊ុន សែន នាយករដ្ឋមន្ត្រីព្រះរាជាណាចក្រកម្ពុ ជាមួយបងប្អូនប្រជាពលរដ្ឋ ដែលបានបាត់បង់សមាជិកគ្រួសារសាច់ញាតិជាទីគោរពស្រលាញ់ដោយសារជំងឺកូវីដ១៩។
ឯកឧត្តម អភិបាលខេត្ត ក៏បានធ្វើការណែនាំដាស់តឿន ដល់បងប្អូនប្រជាពលរដ្ឋទាំងអស់ សូមបន្តអនុវត្តវិធានការការពារខ្លួន តាមការណែនាំរបស់ ក្រសួងសុខាភិបាល ក៏ដូចជាអនុវត្តវិធានការ ៣ការពារ និង៣កុំ ឲ្យបានខ្ជាប់ខ្ជួនបន្ថែមទៀត ក្នុងការចូលរួមប្រយុទ្ធប្រឆាំង និងទប់ស្តាត់ នូវការរីករាលដាលនៃជំងឺកូវីដ-១៩ ដើម្បីបញ្ជាប់នូវព្រឹត្តិការណ៍២០កុម្ភៈ ប្រកបដោយជោគជ័យ ក្នុងរយៈពេលខាងមុខនេះ។
បើយោងតាមរបាយការណ៍រដ្ឋបាលខេត្តឧត្តរមានជ័យបានអោយដឹងថា កញ្ចប់ថវិការបស់ប្រមុខរាជរដ្ឋាភិបាលកម្ពុជា ដែលផ្តល់ជូនតាមរយៈរដ្ឋបាលខេត្ត ចែកជូនគ្រួសារសព ដែលស្លាប់ដោយសារជំងឺកូវីដ ១៩ នៅខេត្តឧត្តរមានជ័យមានចំនួន២២គ្រួសារ ទី ១/ ក្រុងសំរោងចំនួន ៨ គ្រួសារ ទី២/ ស្រុក ចុងកាល់ចំនួន ៣ គ្រួសារ ទី៣/ ស្រុកអន្លង់វែងចំនួន ៥ គ្រួសារ និងទី៤/ស្រុក ត្រពាំងប្រាសាទចំនួន ៦ គ្រួសារ ៕
