រាជថានីភ្នំពេញ ៖ អនុវត្តន៍ខ្លឹមសារនៃអនុស្សរណយោគយល់គ្នារវាងអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងសាលាភូមិន្ទរដ្ឋបាល ក្រសួង មុខងារសាធារណ: ស្តីពីកិច្ចសហប្រតិបត្តិការបណ្តុះបណ្តាលលើកកម្ពស់សមត្ថភាពមន្រ្តី នៅសាលាភូមិន្ទរដ្ឋបាល បានបើកវគ្គបណ្តុះបណ្តាល ស្តីពីការកសាងសមត្ថភាពគណៈគ្រប់គ្រងអង្គភាពសាធារណៈ ដល់មន្រ្តីអាជ្ញាធរជាតិប្រយុទ្ធប្រឆាំងគ្រឿងញៀននិងអង្គភាពពាក់ព័ន្ធ តាមប្រព័ន្ធអនឡាញ ។ ដែលពីធីបើកវគ្គបណ្តុះបណ្តាលប្រព្រឹត្តទៅក្រោមអធិបតីភាពឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន ដែលមានសិក្ខាកាមចូលរួមដោយផ្ទាល់និងពីចំងាយសរុបចំនួន១១២នាក់ នៅថ្ងៃទី២៨ ខែកញ្ញា ឆ្នាំ ២០២១ ។
លោក ស្រ៊ាង ផានិត ប្រធាននាយកដ្ឋាន បណ្តុះបណ្តាលបន្ត នៃសាលាភូមិន្ទរដ្ឋបាល បានមានប្រសាសន៍ស្វាគមន៍ និងរបាយការណ៍ពីកិច្ចសហការរៀបចំរវាងក្រុមការងារដោយមានការគាំទ្រពីថ្នាក់ដឹកនាំនៃស្ថាប័នទាំងពីរ ធ្វើឱ្យការរៀបចំវគ្គបណ្តុះបណ្តាលអាចដំណើរការទៅបានដោយរលូន មានរយ:ពេល១៥០ម៉ោង មានការសិក្សាទ្រឹស្តី ចែករំលែកបទពិសោធន៍ ពីថ្នាក់ដឹកនាំក្រសួងស្ថាប័ន អង្គភាព។
ថ្លែងក្នុងនាមឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន នាឱកាសនោះ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ បានថ្លែងនូវការកោតសសើរដល់កិច្ចខិតខំបស់ក្រុមការងារស្ថាប័នទាំងពីរ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងសាលាភូមិន្ទរដ្ឋបាល រៀបចំបានវគ្គបណ្តុះបណ្តាលស្តីពីការកសាងសមត្ថភាពគណៈគ្រប់គ្រងអង្គភាពសាធារណៈ ដ៏មានសារសំខាន់ និងផ្ទេរចំណេះដឹងចែករំលែកបទពិសោធន៍ពីការងាររដ្ឋបាលគ្រប់គ្រងដល់សិក្ខាកាមយើងទាំងអស់ ហើយយកចំណេះដឹងទាំងអស់នោះទៅចូលរួមជួយអភិវឌ្ឍន៍អង្គភាពរបស់ខ្លួនអោយមានការរីកចម្រើន។
ក្នុងឱកាសនោះដែរ ឯកឧត្តម នាយឧត្តមសេនីយ៍ មាស វិរិទ្ធ បានថ្លែងបន្តថា យើងចូលមកដល់ទីនេះគឺត្រូវប្រកាន៉ខ្ជាប់នូវទិសស្លោករបស់សាលាភូមិន្ទរដ្ឋបាលមាន វិន័យ គុណភាព គុណធម៌ និងនវានុវត្តន៍ ដែលជាគ្រឹះសម្រាប់សិក្ខាកាមទាំងអស់មានយ័ន្តការពារខ្លួនជួយដាស់តឿនតម្រង់ទិសដើម្បីបានក្លាយជាមន្រ្តីល្អនិងមានសក្តានុពលសម្រាប់ក្រសួង ស្ថាប័ន អង្គភាពរបស់ខ្លួន ។
ជាមួយគ្នានេះ ឯកឧត្តម នាយឧត្តមសេនីយ៍ មាស វិរិទ្ធ បានសំណូមពរដល់សិក្ខាកាមទាំងអស់ត្រូវបន្តចូលរួមអនុវត្តវិធានការ ៣ការពារ បីកុំ ប្រឆាំងកូវីដ-១៩ ប្រល័យកូរ៉ូណា និងបីកុំ មួយរាយការណ៍ ប្រហារគ្រឿងញៀន ដើម្បីសហគមន៍មានសុវត្ថិភាព ប្រជាពលរដ្ឋរស់នៅបានសុខសាន្ត ៕
