ខេត្តកំពង់ឆ្នាំង ៖ នៅល្ងាច ថ្ងៃទី២៦ ខែកញ្ញា ឆ្នាំ២០២១ នៅចំណុចរោងចិញ្ចឹមទានៅខាងជើង ភូមិពោធិ៍ម្រះ ឃុំចក ស្រុកបរិបូណ៌ ខេត្តកំពង់ឆ្នាំង បុរសម្នាក់បានគិតខ្លីសម្រេចចិត្តធ្វើអត្តឃាតដោយចងកសម្លាប់ខ្លួន នៅក្នុងកសិដ្ឋាន ចិញ្ចឹមទា បង្កអោយមានការភ្ញាក់ផ្អើល ក្រោយពីម្ចាស់កសិដ្ឋានទៅដល់ ក៏ប្រទះឃើញស្លាប់ដោយសារចងកបាត់ទៅហើយ។
យោងតាមលោក ប៊ឹម សុផល បាននិយាយឱ្យដឹងថា ជនរងគ្រោះបានទិញស្រាបៀរកន្លះកេះ បានចូលទៅហៅលោកមកផឹកជាមួយ នៅកន្លែងរោងចិញ្ចឹមទា នៅពេលផឹកនោះមានឈ្មោះ ប្រាក់ គឹមសូ ម្នាក់ទៀត មានគ្នាចំនួន៣នាក់ នៅពេលផឹកនិយាយគ្នាលេង ជាធម្មតាគ្មានរឿងរ៉ាវ អ្វីកើតឡើងទេ ។
លោក ប៊ឹម សុផល បាននិយាយប្រាប់បន្តទៀតថា ផឹកបានប្រហែលកន្លះម៉ោង ស្រាក៏អស់ លោកនិងឈ្មោះ ប្រាក់ គឹមសូ បានត្រឡប់ទៅផ្ទះរៀងៗខ្លួន មិនបាន២០នាទីផង ស្រាប់តែឈ្មោះ សាន់ សេងធី ហៅ( ចិ ) ជាម្ចាស់កសិដ្ឋានចិញ្ចឹមទា ប្រាប់ថា អាចេន ចងកស្លាប់បាត់ហើយ លោកនឹកស្មានមិនដល់ ហេតុអីក៏វាគិតខ្លីម្លេះលឿនពេកហើយ។
បើតាមការឲ្យដឹងពីឈ្មោះសាន់ សេងធី ហៅ( ចិ ) ជាម្ចាស់កសិដ្ឋានចិញ្ចឹមទា បាននិយាយឱ្យដឹងថា: ជនរងគ្រោះឈ្មោះចាន់ ចេន ភេទប្រុស អាយុប្រមាណជាង២០ឆ្នាំមានទីលំនៅភូមិ អូរំចេក ឃុំចក ស្រុកបរិបូរណ៍បានមកធ្វើ ជាកម្មករក្នុងរោងចិញ្ចឹមទា របស់លោកជិតមួយខែហើយ មុនពេលកើតហេតុ ជនរងគ្រោះ បានខលសុំ ស្រាបៀរកន្លះកេះ លោកបាន ឱ្យទៅយកពីអ្នកលក់នៅក្នុងភូមិ ពោធ៌ម្រះ ក្រោយពីនោះបានប្រហែលជាង១ម៉ោង ជនរងគ្រោះបានខលទៅលោកម្ដងទៀត ថាបើ បងមក រោងទា ទិញសាំង ផងពីព្រោះម៉ាសុីនបូមទឹកអោយទាអស់សាំងហើយ។
ម្ចាស់កសិដ្ឋានចិញ្ចឹមទាបាននិយាយប្រាប់បន្តទៀតថា ក្រោយពីជនរងគ្រោះខលប្រាប់ អស់សាំងបូមទឹកអោយទាលោកក៏រុះរាន់ទៅទិញសាំង ព្រោះសត្វទាអត់ទឹកយូពុំបានទេ មិនបានកន្លះម៉ោងផង លោកក៏ទៅដល់រោងទាលោកមិនឃើញ ជនរងគ្រោះសោះ ក៏ដើចូលទៅក្នុងរោងទា ស្រាប់តែឃើញ ជនរងគ្រោះបានចងក ស្លាប់បាត់ទៅហើយ ទើបបង្កការភ្ញាក់ផ្អើលដល់សត្ថកិច្ចមូលដ្ឋាន ចុះពិនិត្យដល់កន្លែងកើតហេតុតែម្តង។
ប្រភពពីប្អូនស្រីជនរងគ្រោះ បានប្រាប់អោយដឹងដែរថា មុនពេលទទួលដំណឹងបងប្រុសស្លាប់គាត់បានខលមកខ្ញុំ រួចនិយាយថា បើប្អូនស្រីស្រលាញ់បង សូមប្អូនមកកន្លែងរោងទាមួយភ្លេត ពេលនោះខ្ញុំឆ្លើយថា ខ្ញុំរវល់ណាស់មិនបានទៅទេ មិនបាន២០នាទីផង ស្រាប់តែទទួលដំណឹងថា គាត់ចងករស្លាប់បាត់ហើយ ។
-បើតាមសមត្ថកិច្ចឲ្យដឹងថា : ក្រោយការពិនិត្យនិងធ្វើកោសល្យវិច័យទៅលើសពជនរងគ្រោះខាងលើ ថា ពិតជាចងកធ្វើអត្តឃាតខ្លួនឯងពិតប្រាកដមែន ពុំមែនជាអំពើឃាតកម្មឡើយ ខណៈមុន ធ្វើអត្តឃាត ជនរងគ្រោះបានសរសេរលិខិតថា {ម៉ែកូនលាហើយ សូមតាំងអារម្មណ៍ កូនប្រុសម្នាក់នេះ សូមទៅហើយ}។
សមត្ថកិច្ចបានបញ្ចាក់ថា ជនរងគ្រោះសង្ស័យមានវិបត្តិផ្លូវចិត្ត ខណៈជនរងគ្រោះធ្លាប់មានប្រពន្ធ ដោយប្រពន្ធទីមួយ រស់នៅមិនចុះសម្រុងនឹងគ្នា ត្រូវបានប្រពន្ធរត់ចោល មិនយូរប៉ុន្មាន ក៏បានប្រពន្ធម្នាក់ទៀតនៅក្នុងភូមិជាមួយគ្នា ក៏ត្រូវបានប្រពន្ធទី ២ រត់ចោលទៀត ទើបធ្វើឲ្យជនរងគ្រោះតូចចិត្ត គិតខ្លីសម្រេចចិត្តប្រល័យជីវិតខ្លួនឯងដូច្នេះ។
ក្រោយការពិនិត្យទៅលើសាកសពរួចសមត្ថកិច្ចមូលដ្ឋាន ក៏បានប្រគល់សពទៅក្រុមគ្រួសារធ្វើបុណ្យតាមប្រពៃណីព្រះពុទ្ធសាសនា ៕
