មន្រ្តីក្រសួងមហាផ្ទៃចំនួន ២រូប គឺកញ្ញា សាក់ ស្រីណុច និងលោក សំណាង សេដ្ឋជេន ដែលបានបញ្ចប់ការសិក្សាថ្នាក់អនុបណ្ឌិតនៅប្រទេសជប៉ុន បានចែករំលែកបទពិសោធន៍ការសិក្សាថ្នាក់អនុបណ្ឌិត ជំនាញគោលនយោបាយសាធារណៈ ក្នុងគម្រោងអាហារូបករណ៍សម្រាប់ការអភិវឌ្ឍធនធានមនុស្សនៅកម្ពុជា (JDS) នៅសាកលវិទ្យាល័យម៉ីជិ (Meiji) នាទីក្រុងតូក្យូ រយៈពេល២ឆ្នាំ។
• ការសិក្សា
នាងខ្ញុំឈ្មោះ សាក់ ស្រីណុច ជាមន្រ្តីនៃអគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ។ នាងខ្ញុំត្រូវបានជ្រើសរើសឱ្យទៅបន្តការសិក្សាថ្នាក់អនុបណ្ឌិត ជំនាញគោលនយោបាយសាធារណៈ ក្នុងគម្រោងអាហារូបករណ៍របស់ប្រទេសជប៉ុនសម្រាប់ការអភិវឌ្ឍធនធានមនុស្សនៅកម្ពុជា (JDS) នៅសាកលវិទ្យាល័យម៉ីជិ (Meiji) នាទីក្រុងតូក្យូ រយៈពេល២ឆ្នាំ។ សាកលវិទ្យាល័យម៉ីជិ ផ្តល់មុខវិជ្ជាច្រើនសម្រាប់និស្សិតជ្រើសរើស ព្រមទាំងមានសាស្ត្រាចារ្យដែលមានចំណេះដឹងទូលំទូលាយ ថែមទាំងថ្នាក់រៀនមានការចូលរួមពីបណ្តានិស្សិតបរទេសជាច្រើនដូចជា ជប៉ុន ចិន ហ្វីលីពីន បង់ក្លាដេស វៀតណាម មីយ៉ាន់ម៉ា នេប៉ាល់ និង ស្រីលង្កា។ ការសិក្សាដែលចម្រុះជាតិសាសន៍ធ្វើឱ្យមានភាពងាយស្រួលក្នុងការផ្លាស់ប្តូរនូវបទពិសោធន៍ទាំងការរស់នៅ សង្គម និងវប្បធម៌ ដែលចំណុចទាំងអស់នេះធ្វើឱ្យការសិក្សាកាន់តែមានភាពរីករាយ និងពង្រីកនូវចំណេះដឹងបានកាន់តែច្រើន។ មុខវិជ្ជាសិក្សាផ្សាភ្ជាប់នឹងការអនុវត្តនៅក្នុងកិច្ចការសាធារណៈ ដែលប្រទេសអភិវឌ្ឍមួយចំនួនបាន និងកំពុងអនុវត្ត។ វាបានផ្តល់គំនិត និងមេរៀនជាច្រើនសម្រាប់យកមកប្រើប្រាស់នៅក្នុងការបំពេញការងារដើម្បីអភិវឌ្ឍស្ថាប័ននាពេលខាងមុខ។
ការសិក្សាស្រាវជ្រាវទទួលបានជោគជ័យទាមទារនូវការខិតខំប្រឹងប្រែងក្នុងការអាន និងស្រាវជ្រាវដោយខ្លួនឯង។ កត្តាសំខាន់មួយទៀតគឺការប្រឹក្សាយោបល់ជាមួយសាស្ត្រាចារ្យ សិស្សច្បង និងមិត្តរួមថ្នាក់ ដើម្បីជួយដោះស្រាយ ចម្ងល់ និងផ្លាស់ប្តូរយោបល់។ ការមានវិន័យសម្រាប់ខ្លួនឯងដូចជា ការគោរពពេលវេលាក៏ជាកត្តាចាំបាច់ដើម្បីធ្វើកិច្ចការបានជោគជ័យផងដែរ។
• ការរស់នៅ
ប្រទេសជប៉ុនជាប្រទេសស្រស់ស្អាត ទំនើប ស៊ីវិល័យ ព្រមទាំងមានសុវត្ថិភាពក្នុងការធ្វើដំណើរ។ បទពិសោធន៍ក្នុងការធ្វើដំណើរកំសាន្តទៅទីកន្លែងនានាក្នុងប្រទេសជប៉ុន បានជំរុញលើកទឹកចិត្តនាងខ្ញុំឱ្យកាន់តែមានភាពក្លាហាន មានភាពឯករាជ្យ និងផ្តល់នូវភាពរីករាយឱ្យជីវិតខ្លួនឯងផងដែរ។
ការសិក្សា និងការរស់នៅរយៈពេល២ឆ្នាំផ្តល់នូវបទពិសោធន៍សំបូរបែប ហើយមានគុណតម្លៃជាពិសេសដើម្បីអភិវឌ្ឍសមត្ថភាព ចំណេះដឹង និងអាជីពការងារក្នុងបច្ចុប្បន្នភាព និងពេលអនាគត។
-ការសិក្សា
ខ្ញុំបាទឈ្មោះ សំណាង សេដ្ឋជេន សព្វថ្ងៃជាមន្រ្តីបម្រើការនៅនាយកដ្ឋានកិច្ចការសមាគម និងគណបក្សនយោបាយ នៃអគ្គនាយកដ្ឋានរដ្ឋបាល ក្រសួងមហាផ្ទៃ។ ខ្ញុំគឺជាបេក្ខជនមួយរូបដែលទទួលបានអាហារូបករណ៍ក្រោមគម្រោងមូលនិធិរបស់រដ្ឋាភិបាលជប៉ុន ដែលហៅកាត់ថា គម្រោងជប៉ុនដើម្បីអភិវឌ្ឍន៍ធនធានមនុស្ស (JDS) តាមរយៈការសិក្សាថ្នាក់អនុបណ្ឌិត លើជំនាញគោលនយោបាយសាធារណៈ រយៈពេលពីរឆ្នាំ នៅទីក្រុងតូក្យូប្រទេសជប៉ុន។ ខ្ញុំបាទមានឪកាសចូលរៀននៅសាកលវិទ្យាល័យម៉ីជិ Meiji University នៅក្នុងឆ្នាំសិក្សា២០១៩ និងបញ្ចប់ការសិក្សានៅក្នុងឆ្នាំ២០២១នេះ។
សាកលវិទ្យាល័យម៉ីជិ គឺជាសាកលវិទ្យាល័យវ័យចំណាស់មួយ ដែលត្រូវបានបង្កើតឡើងនៅក្នុងឆ្នាំ១៨៨១ ដែលមានប្រវត្តជាង១៤០ឆ្នាំមកហើយ។ បទពិសោធន៍ដ៏យូរនៅក្នុងវិស័យអប់រំ បានផ្ដល់គ្រិះដ៏រឹងមាំនៅក្នុងការអភិវឌ្ឍន៍ធនធានមនុស្ស។ ការសិក្សាដ៏សំបូរបែបចាប់ពីថ្នាក់បរិញ្ញាប័ត្រ រហូតដល់ថ្នាក់អនុបណ្ឌិត និងថ្នាក់បណ្ឌិត ដែលបង្ហាញនូវវិសាលភាពអប់រំដ៏ទូលំទូលាយផ្ដល់ដោយសាកលវិទ្យាល័យមួយនេះ។ នៅក្នុងការសិក្សាផ្នែកគោលនយោបាយសាធារណៈ សាកលវិទ្យាល័យម៉ីជិមិនត្រឹមតែបានផ្ដល់នូវការអប់រំផ្នែកទ្រឹស្ដី (Theories) ប៉ុន្តែក៏បានបង្ហាញនូវការអនុវត្តផ្ទាល់ (Practices) តាមរយៈកម្មសិក្សានានានៅតាមបណ្ដាកន្លែងសំខាន់ៗមួយចំនួន មានដូចជា រដ្ឋបាលទីក្រុងតូក្យូ Tokyo Metropolitan Government, បណ្ដារដ្ឋបាលថ្នាក់ក្រុង នាយកដ្ឋានពន្ធដារនៅតាមថ្នាក់ក្រោមជាតិ មណ្ឌលកុមារ និងចាស់ជរា និងការធ្វើទស្សនកិច្ចនៅការិយាល័យគ្រប់គ្រងរថភ្លើងនៃទីក្រុង Tsukuba នៃខេត្ត Ibaraki ជាដើម។ ទន្ទឹមនេះការសិក្សាចម្រុះជាតិសាសន៍ ដែលមាននិស្សិតមកពីបណ្ដាប្រទេសកំពុងអភិវឌ្ឍន៍មួយចំនួនដូចជា ហ្វីលីពីន Bosnia បង់ក្លាដេស វៀតណាម មីយ៉ាន់ម៉ា នេប៉ាល់ និង ស្រីលង្កា និងការចូលរួមពីនិស្សិតបរទេសដូចជា ជប៉ុន ហុងគ្រី និងចិន បានផ្ដល់នូវឪកាសសម្រាប់ការផ្លាស់ប្ដូរបទពិសោធន៍ ចំណេះដឹង សិក្សាអំពីបញ្ហាដែលប្រទេសកំពុងអភិវឌ្ឍន៍កំពុងជួបប្រទះ និងស្វែងរកនូវដំណោះស្រាយ ដើម្បីជាមូលដ្ឋានក្នុងការបន្តការអភិវឌ្ឍន៍របស់ប្រទេសជាតិយើងតទៅមុខទៀត។
✓ ជាចុងក្រោយ ខ្ញុំពិតជាមានសេចក្ដីសោមនស្សរីករាយ ដែលមានឪកាសបន្តការសិក្សាថ្នាក់ក្រោយបរិញ្ញាប័ត្រ នៅក្នុងជំនាញមួយ ដែលអាចចូលរួមចំណែកអភិវឌ្ឍន៍ស្ថាប័ន ក៏ដូចជាប្រទេសជាតិរបស់ខ្ញុំបាន។ ខ្ញុំសង្ឃឹមថាការសិក្សារយៈពេល២ឆ្នាំនេះ និងការស្រាវជ្រាវរបស់ខ្ញុំ អាចជាចំណែកមួយដែលអាចធ្វើឲ្យមានភាពប្រសើរឡើងនៅក្នុងការសហការគ្រប់វិស័យជាមួយអង្គការសង្គមស៊ីវិល។ លើសពីនេះ ខ្ញុំក៏សង្ឃឹមថានឹងមានមន្រ្តីរាជការនៃក្រសួងមហាផ្ទៃ ទទួលបានអាហារូបករណ៍ទៅបន្តការសិក្សានៅឆ្នាំក្រោយៗទៀត ដែលនេះជាការរួមចំនែកមួយយ៉ាងសំខាន់ក្នុងការអភិវឌ្ឍន៍ធនធានមនុស្សនៃប្រទេសកម្ពុជាយើង។ ទន្ទឹមនេះខ្ញុំក៏សូមអរគុណដល់រាជរដ្ឋាភិបាលកម្ពុជា ក៏ដូចជាក្រសួងមហាផ្ទៃ និងរដ្ឋាភិបាលជប៉ុន ដែលបានលើកទឹកចិត្ត និងផ្ដល់ឪកាសដល់រូបខ្ញុំបាទទៅបន្តការសិក្សានៅប្រទេសជប៉ុន ៕
