ខេត្តបាត់ដំបង ៖ នៅថ្ងៃទី២៥ ខែកញ្ញា ឆ្នាំ២០២១ នេះ ឯកឧត្តម ឡាំ ជា រដ្ឋលេខាធិការក្រសួង មហាផ្ទៃ ជាប្រធានក្រុមការងារថ្នាក់ជាតិចុះមូល ដ្ឋានស្រុកគាស់ក្រឡ និងជាអនុប្រធានទី១ នៃក្រុមការងារគណបក្សប្រជាជន ចុះជួយស្រុកគាស់ក្រឡ ខេត្តបាត់ដំបង បានអញ្ជើញចុះទៅដល់មូលដ្ឋាន ហើយបានប្រគល់គ្រឿងឧបភោគបរិភោគ និងទេយ្យវត្ថុមួយចំនួនធំ ព្រមទាំងថវិកា ដល់រដ្ឋបាលស្រុកគាស់ក្រឡ សម្រាប់ប្រគេនដល់ព្រះសង្ឃគង់នៅវត្តទាំង១៣ និងសាលាបុណ្យទាំង៨ ព្រមទាំងតាជី យាយជី ក្នុងមូលដ្ឋានស្រុកគាស់ក្រឡ ។ ជាមួយគ្នានោះដែរ ឯកឧត្តម បានប្រគល់សម្ភារៈការិយាល័យ និងថវិកាចំនួន ៦២០០០០០៛ ដើម្បីទ្រទ្រង់ដំណើការចាក់វ៉ាក់សាំងការពារមេរោគកូវីដ-១៩ ជូនរដ្ឋបាលស្រុកគាស់ក្រឡ ហើយក៏បានចែកជូននូវថវិកាផ្ទាល់ខ្លួនមួយចំនួនទៀត ដល់មន្ត្រីរាជការ និងកងកម្លាំងប្រដាប់អាវុធចំណុះរដ្ឋបាលស្រុកគាស់ក្រឡផងដែរដើម្បីជាការលើកទឹកចិត្តចំពោះកិច្ចខិតខំប្រឹងប្រែងបម្រើប្រជាពលរដ្ឋនៅក្នុងមូលដ្ឋាន។
ក្នុងឱកាសនោះដែរ ឯកឧត្តម ក៏បានអញ្ជើញចុះជួបសំណេះសំណាលសួរសុខទុក្ខ និងចែកអំណោយជាគ្រឿងឧបភោគបរិភោគ សម្ភារៈប្រើប្រាស់ និងថវិកា ជូនដល់ប្រជាពលរដ្ឋចំនួន១៥គ្រួសារក្នុងឃុំហប់ ដែលកំពុងជួបការលំបាកក្នុងជីវភាព ។
ទោះជាពិធីកាន់បិណ្ឌ និងភ្ជុំបិណ្ឌ ត្រូវបានផ្អាកដើម្បីការពារការរីករាលដាលនៃមេរោគកូវីដ-១៩ ក៏ដោយ ក៏ក្រុមការងារចុះជួយមូលដ្ឋានស្រុកគាស់ក្រឡប្តេជ្ញាធ្វើយ៉ាងណានាំយកចង្ហាន់ និងទេយ្យវត្ថុនានាប្រគេនដល់ព្រះសង្ឃគង់នៅតាមបណ្តាវត្តនានា ក៏ដូចជាស្បៀងអាហារ ជូនដល់ប្រជាពលរដ្ឋដែលកំពុងជួបការលំបាកជីវភាពនៅក្នុងមូលដ្ឋានស្រុកគាស់ក្រឡទាំងមូល៕
