ការចុះពិនិត្យបង្គោលព្រំដែនលេខ២០៣ របស់សកម្មជនសង្គ្រោះជាតិ មិនបង្ករអំពើហឹង្សានោះឡើយ

តាមរបាយការណ៍ របស់អភិបាលខេត្តស្វាយរៀងលោក ជៀង អំ ផ្ញើជូនលោក ស ខេង រដ្ឋមន្ត្រីក្រសួងមហាផ្ទៃ បានបញ្ជាក់ថា នៅក្នុងការចុះទៅពិនិត្យបង្គោលព្រំដែន របស់សកម្មជនគណបក្សសង្គ្រោះជាតិ ដឹកនាំដោយលោក រៀល ខេមរិន្ទ្រ តំណាងរាស្ត្រមណ្ឌលស្វាយរៀង កាលពីថ្ងៃទី១៩ កក្កដា ឆ្នាំ២០១៥ មិនបានបង្កជាហិង្សាអ្វីទេ តែមនុស្សចំនួន៤នាក់បានរងរបួស ដោយសារតែក្របីវ័ធ។
ការចុះពិនិត្យបង្គោលព្រំដែននោះ គឺមានបំណងទៅកាន់បង្គោលព្រំដែនលេខ២០២ និង២០៣ ស្ថិតក្នុងឃុំត្នោត ស្រុកកំពង់រោទិ៍ ដឹកនាំដោយលោក រៀល ខេមរិន្ទ្រ តំណាងរាស្ត្រមណ្ឌលស្វាយរៀង, លោក អុំ សំអាន តំណាងរាស្ត្រមណ្ឌលសៀមរាប និងលោក សេង ម៉ារឌី សមាជិកព្រឹទ្ធសភា ដោយមានព្រះសង្ឃ និងពលរដ្ឋប្រមាណ១៧០០អង្គនឹងនាក់ ប្រើប្រាស់មធ្យោបាយធ្វើដំណើរ មានរថយន្ត១៨៣គ្រឿង និងម៉ូតូ៤០០គ្រឿង។
តែរហូតដល់ម៉ោង៤រសៀល មានមនុស្សប្រមាណ៦០០នាក់ប៉ុណ្ណោះ ដែលទៅដល់ចំណុចទួលតាសឿង ក្នុងទឹកដីកម្ពុជា ក្នុងនោះមានតំណាង១០០នាក់ ដឹកនាំដោយលោក រៀល ខេមរិន្ទ្រ និងលោក អ៊ុំ សំអាន បានទៅមើលបង្គោលព្រំដែនលេខ២០៣ រួចត្រឡប់ទៅវិញនៅវេលាម៉ោង៥រសៀល ដោយមិនបានទៅមើលបង្គោលលេខ២០២ទេ។
របាយការណ៍បញ្ជាក់ថា សម្រាប់អ្នករងរបួសដោយសារក្របីវ័ធនោះ គឺនៅចំណុចភូមិស្វាយ ឃុំសំឡី ខណៈពួកគេធ្វើដំណើរដោយថ្មើរជើង កាត់ភូមិអ្នកស្រុក ព្រោះតែរថយន្តជាប់ស្ទះនៅតាមផ្លូវកំពុងធ្វើដំណើរ៕

តាមប្រភពព័តមានអោយដឹងថា បន្ទាប់ពីចុះពិនិត្យមើលបង្គោលព្រំដែនលេខ២០៣ ក្នុងឃុំត្នោតស្រុកកំពង់រោទិ៍ខេត្តស្វាយរៀង តំណាងរាស្ត្រCNRPបានអះអាងថា បង្គោលព្រំដែននោះវៀតណាមបោះដោយឯកតោភាគីចូលមកលើដីខ្មែរ រំលោភបូរណភាពកម្ពុជាយ៉ាងពិតប្រាកដ។

តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ថ្លែងចំពោះមុខអ្នកសារពត៌មានថា បង្គោលព្រំដែនលេខ២០៣ នៅត្រង់ចំណុចភូមិធ្លក វៀតណាម ពិតជាបោះដោយឯកតោភាគីចូលទឹកដីកខ្មែរ ហើយភាគីវៀតណាមបានបង្កបង្កើនផលលើដីនោះ។ ដូច្នេះលោកនឹងធ្វើរបាយការណ៍បញ្ជូនទៅរដ្ឋាភិបាល ឲ្យប្រាប់ទៅភាគីវៀតណាម បញ្ឈប់ការធ្វើស្រែ និងអភិវឌ្ឍនៅតំបន់នោះ ដើម្បីជជែកគ្នាបោះបង្គោលព្រំដែននេះឡើងវិញ តាមផែនទីតម្កល់នៅអង្គការសហប្រជាជាតិណ៕
បញ្ហព្រំដែនកម្ពុជា វៀតណាម កំពុង
ត្រូវបានបក្សប្រឆាំងប្រើជានយោបាយដើម្បីទាក់ទាញប្រជាប្រិយ។