អន្តរជាតិ ៖ ក្រសួងសុខាភិបាលថៃបានប្រកាសនៅព្រឹកថ្ងៃច័ន្ទនេះថា ប្រទេសថៃបានរកឃើញករណីឆ្លងថ្មីនៃជំងឺកូវីដ ១៩ ចំនួន ១២.៧០៩ នាក់និងមានអ្នកស្លាប់ចំនួន ១០៦ នាក់បន្ថែមទៀតក្នុងរយៈពេល ២៤ ម៉ោងមុននេះ។
ដោយឡែកក្នុងចំនួនឆ្លងខាងលើនេះគឺមានចំនួន ១១.៨៥១ សម្រាប់ប្រជាជនទូទៅនិង ៨៥៨ ករណីដែលជាអ្នកទោសក្នុងពន្ធនាគារ។ទន្ទឹមនឹងនេះនៅថ្ងៃអាទិត្យម្សិលមិញអ្នកជំងឺកូវីដ -១៩ ចំនួន ១១.១២៥ នាក់ត្រូវបានអនុញ្ញាតឱ្យចេញពីមន្ទីរពេទ្យបន្ទាប់ពីបានជាសះស្បើយ។
គួរបញ្ជាក់ថា ចាប់តាំងពីថ្ងៃទី ១ ខែមេសានៅពេលដែលរលកទី ៣ នៃជំងឺកូវីដ ១៩ បានចាប់ផ្តើម ប្រទេសថៃបានព្យាបាលអ្នកជំងឺកូវីដ ១៩ ចំនួន ១.៤៦០.៣២៣ នាក់ដែលក្នុងនោះ ១.៣១៣.៧៨១ នាក់បានជាសះស្បើយ។ចំណែកចំនួនអ្នកស្លាប់មានចំនួន ១៥.៣៧៥ នាក់ក្នុងកំឡុងពេលរលកទី ៣ និង ១៥.៤៦៩ នាក់ចាប់តាំងពីការចាប់ផ្តើមនៃជំងឺរាតត្បាតនេះ។.
