ខេត្តឧត្តរមានជ័យ ៖ នៅរសៀលថ្ងៃទី០២ ខែកញ្ញាឆ្នាំ២០២១ ប្រជាកសិករគំរូចំនួន១២៣ គ្រួសារ ទទួលសំភារៈប្រើប្រាស់ទំនើបផ្នែកកសិកម្ម ផ្តល់ទុនសហវិនិយោគ (ធាតុចូលកសិកម្ម)ជូនដល់បណ្តុំអាជីវកម្ម ក្នុងការអនុវត្ត កម្មវិធីផ្សព្វផ្សាយ បច្ចេកទេសកសិកម្មថ្មីដែលធន់ទៅនឹងការប្រែប្រួលអាកាសធាតុ(ហៅកាត់ថា អាស្ពាយ) ពិធីនេះធ្វើនៅបរិវេណមន្ទីរកសិកម្មរុក្ខាប្រមាញ់និងនេសាទខេត្តឧត្ដរមានជ័យ។
លោក សូត្រ ស៊ីសុខឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តឧត្តរមានជ័យ បានឲ្យដឹងថា ការអនុវត្តកម្មវិធី ASPIRE គឺផ្ដោតលើអនុវិស័យសំខាន់ៗចំនួន០៤ចំណុចគឺ ១ អនុវិស័យផ្នែកដំណាំ
២ អនុវិស័យផ្នែកផលិតកម្មសត្វ ៣ អនុវិស័យជលផល
៤ អនុវិស័យព្រៃឈើ ដោយប្រើប្រាស់វិធីសាស្ត្រផ្សព្វផ្សាយចំនួន០៣ទៀតដើម្បីយកមកអនុវត្តរួមមាន៖
១ ការគាំទ្រសហគមន៍ កសិកម្ម ឬអង្គការកសិករ
២ ការរៀនសូត្រពីកសិករ ទៅកសិករ
៣ សេវាផ្សព្វផ្សាយសាធារណៈ។
ក្នុងនោះដែរ ឯកឧត្ដម ប៉ែន កុសល្យ បានលើកឡើងថា បងប្អូនប្រជាពលរដ្ឋទាំងអស់នៅពេលដែលបានទទួលសំភារះច្ចេកទេសទាំងអស់នេះហើយ ត្រូវខិតខំធ្វើការបង្កបង្កើនផល បង្កើនបរិមាណដាំដុះដំណាំ ចិញ្ចឹមសត្វ ដោយប្រើប្រាស់បច្ចេកទេសទំនើប វៃឆ្លាតនេះឲ្យមានគុណភាពខ្ពស់ ឆ្លើយតបទៅនឹងការប្រែប្រួលអាកាសធាតុ ការអភិវឌ្ឍសមត្ថភាព ការចងក្រងបណ្តុំអាជីវកម្ម និងសហគមន៍កសិកម្ម ដោយឈរលើសុឆន្ទៈនៃគំនិតផ្តួចផ្តើមក្នុងចក្ខុវិស័យរបស់រាជរដ្ឋាភិបាល ក្នុងការចិញ្ចឹមសត្វ ការដាំដំណាំដាំដុះផ្សេងៗមានគុណភាព ដើម្បីការចូលរួមប្រកួតប្រជែងក្នុងទីផ្សារកសិកម្ម ជាពិសេស ធ្វើឲ្យជីវភាពរស់នៅរបស់បងប្អូនកាន់តែមានភាពល្អប្រសើរឡើង ពីមួយថ្ងៃទៅមួយថ្ងៃ ជាផ្នែកមួយនៃការចូលរួមចំណែកក្នុងការកាត់បន្ថយភាពក្រីក្រក្នុងមូលដ្ឋានផងដែរ ក្នុងបរិបទជំងឺកូវីដ១៩នេះ។
ដោយឡែកសម្ភារ:ដែលបានចែកជូនដល់បងប្អូនប្រជាកសិករគំរូទាំង៥ ក្រុង/ស្រុក សរុបមានចំនួន១៣៣ គ្រឿង រួមមាន
ឧករណ៍ជ្រួយដីចំនួន ៣៤គ្រឿង ម៉ាស៊ីនបាញ់ថ្នាំចំនួន២៣គ្រឿង ម៉ាស៊ីនកិនចំណីចំនួន៦៣ គ្រឿង និងម៉ាស៊ីនកាត់ចិញ្ច្រាំស្មៅចំនួន ១៣គ្រឿង ដែលបានផ្តល់ជូនបងប្អូនប្រជាកសិករដើម្បីធ្វើកសិកម្មបន្តក្នុងអំឡុងពេលបរិបទកូវីដ-១៩នេះផងដែរ .៕
