អន្តរជាតិ ៖ សហរដ្ឋអាមេរិកបានបញ្ចប់ការដកទ័ពចេញពីអាហ្វហ្គានីស្ថាន ជិតម្ភៃឆ្នាំបន្ទាប់ពីខ្លួនបានឈ្លានពានប្រទេសនេះ ក្រោយការវាយប្រហារថ្ងៃទី ១១ ខែកញ្ញា ឆ្នាំ ២០០១ លើអគារពាណិជ្ជកម្ម។ នេះបើយោងតាមប្រភពពីសារព័ត៌មាន CNA ។
ឧត្តមសេនីយ៍កងម៉ារីនលោក Frank McKenzie មេបញ្ជាការកណ្តាលអាមេរិកបានធ្វើសេចក្តីប្រកាសអំពីការដកទ័ពនៅឯសន្និសីទសារព័ត៌មានរបស់មន្ទីរបញ្ចកោណ កាលពីថ្ងៃចន្ទ បន្ទាប់ពីកងទ័ពចុងក្រោយដែលបញ្ជូនទៅជម្លៀសជនជាតិអាមេរិកនិងអាហ្វហ្គានីស្ថាន ដែលមានហានិភ័យបន្ទាប់ពីការវិលត្រឡប់មកកាន់អំណាចរបស់ក្រុមតាលីបង់ បានហោះចេញពីទីក្រុងកាប៊ុល។
លោក McKenzie និយាយថា “ខ្ញុំនៅទីនេះដើម្បីប្រកាសពីការបញ្ចប់ការដកទ័ពរបស់យើង ចេញពីអាហ្វហ្គានីស្ថាននិងការបញ្ចប់បេសកកម្មយោធាដើម្បីជម្លៀសពលរដ្ឋអាមេរិក។ យើងមិនបាននាំអ្នករាល់គ្នាចេញតាមដែលយើងចង់បានទេ។ ប៉ុន្តែខ្ញុំគិតថា ប្រសិនបើយើងបន្តនៅ១០ថ្ងៃទៀត យើងនឹងមិនធ្វើឲ្យមនុស្សគ្រប់គ្នាចេញមកក្រៅបានទេ ហើយនៅតែមានមនុស្សខកចិត្ត។ វាជាស្ថានភាពដ៏លំបាកមួយ”។ លោក McKenzie និយាយថា ជើងហោះហើរចុងក្រោយដែលជាយន្តហោះដឹកជញ្ជូនយោធាធុន C-17 បានហោះចេញពីអាកាសយានដ្ឋានអន្តរជាតិ Hamid Karzai មួយនាទីមុនពាក់កណ្តាលអធ្រាត្រ (ម៉ោងនៅទីក្រុងកាប៊ុល)។
ជុំវិញការចាកចេញរបស់កងទ័ពអាមេរិក ក្រុមតាលីបង់ ការបាញ់កាំភ្លើងអបអរសាទរបានផ្ទុះឡើងនៅទីក្រុងកាប៊ុលនៅព្រឹកព្រលឹមថ្ងៃអង្គារ៣១ សីហា ដោយមន្ត្រីជាន់ខ្ពស់តាលីបង់បានសាទរចំពោះព្រឹត្តិការណ៍នេះថា “ជាពេលវេលាប្រវត្តិសាស្ត្រ” ដោយប្រកាសថា អាហ្វហ្គានីស្ថានឥឡូវនេះ ទទួលបាន “ឯករាជ្យពេញលេញ” ហើយ៕
