ខេត្តឧត្តរមានជ័យ ៖ អភិបាលរងខេត្តឧត្តរមានជ័យ ឯកឧត្តម ឌី រ៉ាដូ រួមទាំងមន្ទីរអង្គភាពពាក់ព័ន្ធ អាជ្ញាធរមូលដ្ឋាន អញ្ជើញចូលរួមប្រជុំសម្របសម្រួលនិងសហការរកដំណោះស្រាយប្រឈមនានា ដែលកងកម្លាំងយោធា វរះសេនាតូចកាំភ្លើងធំ ចំណុះអោយទិសទី២ យុទ្ធភូមិភាគទី 4 ប្រចាំនៅស្រុកអន្លង់វែងបានចូលទៅសាងសង់លេណដ្ឋាននិងអាស្រ័យផលនៅលើដីតំបន់ទេសចរណ៍ប្រវត្តិសាស្ត្រស្រុកអន្លង់វែង ។
លោកស្រី ធិននី មុនីរស្មី ប្រធានមន្ទីរទេសចរណ៍ខេត្តឧត្តរមានជ័យ បានលើកឡើងថា មន្ទីររបស់ខ្លួនបានសហការជាមួយអាជ្ញាធរខេត្ត មន្ទីរអង្គភាពពាក់ព័ន្ធនានា រួមទាំងអាជ្ញាធរមូលដ្ឋាន ដើម្បីអភិវឌ្ឍន៍ និងអភិរក្សតំបន់ប្រវត្តិសាស្រ្តស្រុកអន្លង់វែងទាំង១៤កន្លែង តែរហូតមកដល់ពេលនេះយើងមិនទានអភិវឌ្ឍន៍បានទេ ដោយសារមានយោធា សាងសង់លេណដ្ឋាន និងអាស្រ័យផលនៅលើដីតំបន់នេះ កន្លងមក មន្ទីរបានដាក់គោលដៅបោះ បង្គោលព្រំ ដើម្បីថែរក្សាតំបន់ទេសចរណ៍ប្រវត្តិសាស្ត្រនិមួយៗ ដូច្នេះហើយមន្ទីរសុំ ឱ្យអាជ្ញាធរគ្រប់លំដាប់មេត្តាជួយដោះស្រាយ ដែលកងកម្លាំងយោធាបោះទីតាំង និងអាស្រ័យផលនៅលើដីតំបន់ទេសចរណ៍ប្រវត្តិសាស្ត្រនេះ ពីព្រោះតំបន់នេះ ត្រូវបានរាជរដ្ឋាភិបាលកម្ពុជា ចុះអនុក្រឹត្យ ដាក់ដីតំបន់នេះជាតំបន់ប្រវត្តិសាស្ត្រ ស្រុកអន្លង់វែង។
ក្នុងឪកាសនេះដែរ ឯកឧត្តម ឌី រ៉ាដូ អភិបាលរងខេត្តបានថ្លែងជំរុញឲ្យអាជ្ញាធរស្រុក មន្ទីរទេសចរណ៍ មន្ទីរបរិស្ថាន មន្ត្រីរដ្ឋបាលព្រៃឈើ និងមន្រ្តីពាក់ព័ន្ធ ត្រូវសហការគ្នាចុះទៅពិនិត្យជាស្តែងនិងយកយោមការនៅទីតាំងដែលកងកម្លាំងយោធា សាងសង់លេណដ្ឋាអាស្រ័យផល តើប៉ះពាល់ដីតំបន់ទេសចរណ៍ប្រវត្តិសាស្ត្រស្រុកអន្លង់វែង ប៉ុន្មាន ដើម្បីរាយការណ៍ជូនគណៈ បញ្ជាការរដ្ឋបាលខេត្ត និងរាយការណ៍ជូនថ្នាក់ក្រសួងជាអ្នកសម្រេច។
ឯកឧត្តម អភិបាលរងខេត្ត បានលើកឡើងថា អន្លង់វែងជាស្រុកដាច់ស្រយោលមួយរបស់កម្ពុជាដែលស្ថិតក្នុងខេត្តឧត្តរមានជ័យ ស្ថិតនៅតាមបណ្តោយព្រំដែនកម្ពុជា ថៃ ។អន្លងវែងជាតំបន់ ចុងក្រោយរបស់ខ្មែរក្រហម។ ក្រោមការគ្រប់គ្រងនៃរបបកម្ពុជាប្រជាធិបតេយ្យ(១៩៧៥.១៩៧៩) អន្លង់វែងគឺជាតំបន់កាន់កាប់ចុងក្រោយរបស់មេដឹកនាំកំពូលរបស់របបនេះ រួមមាន ប៉ូល ពត ខៀវ សំផន តាម៉ុក ជាមេសមរភូមិក្តៅចុងក្រោយរបស់របបមួយនេះ បច្ចុប្បន្នបានប្រែក្លាយជាតំបន់ទេសចរណ៍ប្រវត្តិសាស្ត្រដែលជាគោលដៅសំខាន់ប្រចាំតំបន់និងជាតំបន់ទេសចរណ៍គោលដៅធំប្រចាំប្រទេសកម្ពុជា ៕
