ខេត្តមណ្ឌលគិរី៖សេចក្តីរាយការណ៏ពីខេត្តមណ្ឌលគិរីឲ្យដឹងថា ឧកញ៉ា លាង ច័ន្ទមុន្នី អតីតគឺជាមេការប្រមូលទិញឈើឲ្យក្រុមហ៊ុនឧកញ៉ា ទ្រី ភាព ប្រចាំខេត្តរតនគិរី បច្ចុប្បន្នបានធ្វើសកម្មភាពប្រមូលទិញឈើនៅក្នុងខេត្តមណ្ឌលគិរីវិញ ជាហេតុធ្វើអោយបាត់បង់ព្រៃឈើជាបន្តទៀតក្រោយពីដីសម្បទានសេដ្ឋកិច្ចចំនួន២កន្លែងក្នុងតំបន់ឧទ្យានវីរៈជ័យត្រូវបានក្រុមហ៊ុនលោកឧកញ៉ា ទ្រី ភាព ប្រគល់ជូនរដ្ឋវិញហើយនោះ។ ប្រភពបានទម្លាយឲ្យដឹងថា លោកឧកញ៉ា លាង ច័ន្ទមុន្នី បានទទួលសិទ្ធិពីក្រុមហ៊ុនខាងលើក្នុងការប្រមូលទិញឈើនៅក្នុងខេត្តរតនគិរី និងមណ្ឌលគិរី ។ ប៉ុន្តែទោះជាយ៉ាងណាព័ត៌មាននេះមិនអាចស្វែងរកសុំការបកស្រាយពីលោក ឧកញ៉ា ទ្រី ភាព ហើយនិងលោកឧកញ៉ា លាង ច័ន្ទមុន្នី បាននៅឡើយទេ។
ប្រភពព័តមានពីខេត្តមណ្ឌលគិរីបន្តថា លោកឧកញ៉ា លាង ច័ន្ទមុន្នី បានអោយ កូនកញ្ច្រែងជាច្រើននាក់ដើម្បីដើរប្រមូលទិញឈើអនាធិបតេយ្យខុសច្បាប់ដែលប្រជាពលរដ្ឋលួចកាប់ពីក្នុងព្រៃ និងធ្វើសកម្មភាពដឹកជញ្ជូនចេញពីតំបន់អភិរក្សជីវៈចម្រុះសីម៉ា តំបន់ឧទ្យានវីរៈជ័យ និងតំបន់សត្វព្រៃភ្នំព្រិចជារៀងរាល់ថ្ងៃយកទៅស្តុកទុកក្នុងទីតាំងដីសម្បទានសេដ្ឋកិច្ចរបស់ក្រុមហ៊ុនដាយណាមដែលគេគិតថា ព្រៃតំបន់អភិរក្សខាងលើកំពុងតែរងនូវការកាប់បំផ្លាញខ្លាំងឡើងដោយមានអ្នកទទួលទិញឈើយ៉ា ងសស្រាក់សស្រាំនឹងពុំឃើញមានការទប់ស្កាត់ពីសំណាក់អាជ្ញាធរខេត្តទាល់តែសោះ។
ប្រជាពលរដ្ឋអះអាងថាមិនយូរប៉ុន្មានទេព្រៃឈើនៅក្នុងដែនអភិរក្សជីវៈចម្រុះសីម៉ា ហើយនិងតំបន់សត្វព្រៃភ្នំព្រិចនឹងប្រឈមនឹងការបាត់បង់អស់គ្មានសល់ជាមិនខាន។ ហើយបញ្ហានេះសូមលោក អេង ប៊ុនហៀង អភិបាលខេត្តមណ្ឌលគិរី និងលោក កែប កត់ នាយរដ្ឋបាលព្រៃឈើមេត្តាជួយទប់ស្កាត់ជាបន្ទាន់ដើម្បីអោយព្រៃឈើនៅតំបន់នោះនៅគង់វង្សដូចដើម។
សូបញ្ជាក់ថា កន្លងមកក្រុមមេការលោកឧកញ៉ា ទ្រី ភាព តែងតែប្រើប្រាស់ឈ្មោះ និងឥទ្ធិពលអំណាចរបស់ក្រុមហ៊ុនក្នុងការរកស៊ីប្រមូលទិញឈើដែល ប្រជាពលរដ្ឋលួចកាប់ខុសច្បាប់តម្លៃថោកៗដើម្បីយកមកលក់ឲ្យក្រុមហ៊ុន លោកឧកញ៉ា ទ្រី ភាព ធ្វើឲ្យសមត្ថកិច្ច និងមន្ត្រីជំនាញនាំគ្នាខ្លាចឡើងរួញខ្លួនគ្រប់គ្នាមិនហ៊ានប៉ះពាល់នោះឡើយ ៕
យើងនឹងព្យាយាមសុំការបំភ្លឺពីឧកញ៉ាទ្រីភាព នឹងឧកញ៉ាលាងចន្ទ័មុន្នី ជាបន្តទៀត។
