អន្តរជាតិ ៖ កាលពីថ្ងៃព្រហស្បតិ៍ ចក្រភពអង់គ្លេសបានព្រមានក្រុមប្រឹក្សាសន្តិសុខអង្គការសហប្រជាជាតិថា ប្រជាជនមីយ៉ាន់ម៉ាពាក់កណ្តាលចំនួន៥៤លាននាក់អាចឆ្លងជំងឺកូវិដ១៩ ក្នុងរយៈពេលពីរសប្តាហ៍ខាងមុខនេះ។នេះបើយោងតាមប្រភពពីសារព័ត៌មាន CNA។ ចក្រភពអង់គ្លេសបានកោះប្រជុំដើម្បីឆ្លើយតបទៅនឹងអ្វីដែលខ្លួនហៅថា ស្ថានភាពកាន់តែអាក្រក់នៃជំងឺកូវីដនៅមីយ៉ាន់ម៉ា បានរីករាលដាលចាប់តាំងពីយោធា បានកាន់កាប់អំណាចកាលពីខែកុម្ភៈ។ អង់គ្លេសបានជំរុញឱ្យក្រុមប្រឹក្សាធានាសេចក្ដីសម្រេចលេខ ២៥៦៥ ដែលទាមទារឱ្យមានបទឈប់បាញ់នៅតំបន់មានជម្លោះ ដើម្បីអនុញ្ញាតឱ្យមានការដឹកជញ្ជូនវ៉ាក់សាំងបង្ការវីរុសកូរ៉ូណាប្រកបដោយសុវត្ថិភាព ត្រូវបានគោរពនៅមីយ៉ាន់ម៉ា។
លោកស្រី Barbara Woodward ឯកអគ្គរដ្ឋទូតចក្រភពអង់គ្លេសបានទទូចថា វាជារឿងសំខាន់ណាស់ដែលយើងត្រូវពិចារណាថា តើយើងត្រូវអនុវត្តយ៉ាងម៉េច។ អង្គការសហប្រជាជាតិប៉ាន់ប្រមាណថាមានតែ៤០ ភាគរយនៃមណ្ឌលថែទាំសុខភាពរបស់មីយ៉ាន់ម៉ានៅតែអាចដំណើរការបាន។
ស្ថាប័នពិភពលោកក៏បានប៉ាន់ស្មានផងដែរថាកងកម្លាំងយោធាបានធ្វើការវាយប្រហារយ៉ាងតិច២៦០ដងប្រឆាំងនឹងបុគ្គលិកពេទ្យនិងគ្រឿងបរិក្ខារពេទ្យដោយបានឃុំខ្លួនមន្ត្រីពេទ្យយ៉ាងតិច ៦៧ នាក់។
សូមជម្រាបថា ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់ចាប់តាំងពីរដ្ឋាភិបាលយោធាបានឡើងកាន់អំណាចដោយមានមន្ទីរពេទ្យជាច្រើនមិនមានបំពាក់សម្ភារៈគ្រប់គ្រាន់ដើម្បីទប់ទល់នឹងការកើនឡើងយ៉ាងឆាប់រហ័សនៃការឆ្លងកូវីដ១៩បន្ទាប់ពីបុគ្គលិកពេទ្យជាច្រើនបានដើរចេញតវ៉ាប្រឆាំងរដ្ឋប្រហារ៕
