ភ្នំពេញ ៖ នៅវេលាម៉ោង៣និង៤០នាទីរសៀលថ្ងៃទី១៥កក្កដា២០១៥នេះ អាជីវករផ្សារដើមគជាង៥០នាក់ បាននាំគ្នាទៅតវ៉ានៅមុខទីស្នាក់ការផ្សារ បន្ទាប់ពីមានការព្រួយបារម្ភ ពេលដែលឃើញមន្រ្តីសាលារាជធានីភ្នំពេញ សហការជាមួយសាលាខណ្ឌទួលគោកនិងប្រធានផ្សារដើមគរចុះវាស់វែងតូបជាង៨០០នៅក្នុងផ្សារ ។
ប្រជាពលរដ្ឋដែលនាំគ្នាទៅតវ៉ាបានឲ្យដឹងថា ពួកគាត់មានការព្រួយបារម្ភបន្ទាប់ពី មានមន្រ្តីសាលារាជធានីភ្នំពេញ មន្រ្តីសាលាខណ្ឌនិងប្រធានផ្សារ នាំគ្នាចុះទៅវាស់វែងតូបនៅក្នុងផ្សារដើមគរនោះ មានសរុបទាំងអស់ជាង៨០០តូប ដោយមិនបានបញ្ជាក់ប្រាប់ពីមូលហេតុច្បាស់លាស់ ។ មិនត្រឹមតែប៉ុណ្ណោះបន្ទាប់ពីមានការចុះវាស់វែង ហើយចេះតែមានឈ្មួញដើរសួររកទិញតូប របស់ពួកគាត់ដែលកំពុងតែលក់ដូរ ហើយអាជីវករអះអាងថា តូបរបស់គាត់គឺគាត់មិនព្រមលក់ដូរទេ ម្យ៉ាងទៀតពួកគាត់បានចុះកិច្ចសន្យាជាមួយមន្រ្តីសាលារាជធានីភ្នំពេញតាំងពីឆ្នាំ១៩៩០ រហូតមកដល់ឆ្នាំ២០២១ នៅមិនទាន់ចប់កុងត្រានៅឡើយទេ ។ ប្រជាពលរដ្ឋលើកឡើងទៀតថា ពួកគាត់មិនចង់ឲ្យផ្សារដើមគរអភិវឌ្ឍន៍ទៅជាផ្សារទំនើបទេ ពួកគាត់ចង់នៅលក់ដូរដូចរាល់ថ្ងៃដដែល ។
ដោយឡែកលោកសេង សារ៉នប្រធានផ្សារដើមគរ បានឲ្យដឹងថា ទាក់ទិននឹងអាជីវករលើកគ្នាមកសាកសួរលោកផ្ទាល់ពីការចុះវាស់វែងកាលពីថ្ងៃទី១៣ ទី១៤ កន្លងមកនេះ ជាផែនការរបស់សាលារាជធានីភ្នំពេញ ដែលហៅកាត់ថាPAU បានចុះទៅវាស់វែងតូបនៅផ្សារដើមគ ដោយសហការជាមួយមន្រ្តីសាលាខណ្ឌទួលគោក និងរូបលោកផ្ទាល់ជាប្រធានផ្សារ គ្រាន់តែចូលរួមសហការតែប៉ុណ្ណោះ ។ ក្នុងនោះលោកគ្រាន់តែដឹងថា ការចុះPAUរបស់មន្រ្តីសាលារាជធានីភ្នំពេញ គឺដើម្បីចុះពិនិត្យបច្ចេកទេសមើលសំណង់ក្នុងផ្សារ និងចំនួនតូបទាំងជាង៨០០តូបនេះ និងត្រួតពិនិត្យការលក់ដូររបស់អាជីវករមានការរីកដុះដាលដល់ កម្រិតណាតែប៉ុណ្ណោះ ។
លោកប្រធានផ្សារដើមគបានឲ្យដឹងទៀតថា ចំពោះការរុះរើផ្សារឬក៏យ៉ាងណានោះ លោកមិនបានដឹងទេ ដែលតូបក្នុងផ្សារទាំងអស់មានសរុបជាង៨០០តូប ចំណែកតូបជុំវិញបរិវេណផ្សារជាផ្សារណាត់ ។ ខណៈពេលដែលអាជីវករប្រមូលផ្តុំគ្នាទៅសាកសួរ លោកប្រធានផ្សារចរចារហូតដល់ល្ងាចថ្ងៃដដែល ទើបនាំគ្នាត្រឡប់ទៅវិញរៀងខ្លួន ៕
