ខេត្តកោះកុង ៖ អតីតយុទ្ធជនពិការជើងឆ្វេង នៅភូមិប្រទាល ឃុំអណ្តូងទឹក ស្រុកបុទុមសាគរ ខេត្តកោះកុង នៅព្រឹកថ្ងៃទី ២៩ ខែមិថុនា ឆ្នាំ ២០២១នេះ បានទទួលលាភសំណាងទឹកប្រាក់ចំនួន ១០ លានរៀលរបស់ម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
ពិធីនេះធ្វើឡើងក្រោយពីទទួលបានព័ត៌មានថា អ្នកស្ម័គ្រចិត្តចាក់វ៉ាក់សាំងលេខរៀងទី៤លាន កាលពីថ្ងៃទី២៨ ខែមិថុនា ម្សិលមិញនេះ។ ដោយមិនបង្អង់យូរឡើយ សម្តេចតេជោ ហ៊ុន សែន នាយករដ្ឋមន្ត្រី បានចាត់លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណ:កម្មាធិការចំពោះកិច្ចចាក់វ៉ាក់សាំងកូវីដ-19
នាំយកនូវប្រាក់រង្វាន់ចំនួន១០ លានរៀល និងអំណោយដ៏ថ្លៃថ្លារបស់សម្តេចមួយចំនួនទៀត ជូនដល់អ្នកស្ម័គ្រចិត្តចាក់វ៉ាក់សាំងកូវីដ-19 គឺលោក សូ សយ អាយុ៦៥ឆ្នាំជាអតីតយុទ្ធជន។
បន្ទាប់ពីបានទទួលប្រាក់រង្វាន់ និងអំណោយ លោក សូ សយ បានសម្តែងនូវការដឹងគុណចំពោះសម្តេចតេជោ ដោយក្តីរំភើបឥតឧបមា អ្វីដែលពិសេសនោះ លោកបានលើកឡើងថា លោកបានត្រូវរង្វាន់ចំថ្ងៃកំណើតបក្សប្រជាជនកម្ពុជា ២៨ មិថុនា ជាថ្ងៃដ៍វិសេសវិសាលបំផុត។
លោកពូ សូ សយ បានលើកឡើងពី បច្ចុប្បន្នភាពក្រោមការដឹកនាំរបស់សម្តេចតេជោទៀតថា ពិតជាមានការរីកចម្រើនឥតឈប់ឈរជាការ ជាក់ស្តែង នៅតំបន់ដែលគាត់រស់នៅសព្វថ្ងៃ កាលពីមុនមានការលំបាក់ខ្លាំងណាស់ក្នុងការធ្វើដំណើរទៅកន្លែងផ្សេងៗ ត្រូវធ្វើដំណើរតាមទូក ចំណាយពេលវេលាច្រើន តែពេលបច្ចុប្បន្នយើងមានផ្លូវជាច្រើន ការធ្វើដំណើរមានការងាយស្រួល។ដូច្នេះរូបគាត់ពិតជាត្រូវការសម្តេចតេជោបន្តដឹកនាំប្រទេសបន្តទៀតខ្លាំងណាស់ ដើម្បីបន្តអភិវឌ្ឍន៍ប្រទេសជាតិឱ្យកាន់តែរីកចម្រើន។
ថ្លែងក្នុងពិធីប្រគល់និងទទួលលាភសំណាងនាព្រឹកថ្ងៃទី២៩ មិថុនា ២០២១ លោកជំទាវ ឱរ វណ្ណឌីន អំពាវនាវឱ្យប្រជាពលរដ្ឋមានការប្រុងប្រយ័ត្នចំពោះវីរុសកូរ៉ូណាបំប្លែងថ្មី ដែលបានចូលមកដល់កម្ពុជាយើងតាមច្រកអន្តរជាតិនៃប្រទេសជិតខាង សូមបងប្អូនប្រជាពលរដ្ឋត្រូវអនាម័យជាប្រចាំ និងបន្តអនុវត្តតាមវិធានការសុខាភិបាលឱ្យបានត្រឹមត្រូវ ដោយអនុវត្ត ៣ការពារ និង៣កុំ ឱ្យបានខ្ជាប់ខ្ជួន។
អ្នកនាំពាក្យក្រសួងសុខាភិបាល អំពាវនាវពលរដ្ឋកុំទៅកន្លែងបិទជិត ឬប្រមូលផ្ដុំ, ក្នុងករណីចង់ទៅទីនោះ មិនត្រូវនៅលើសពី១៥នាទីឡើយលោកស្រីបានអះអាងទៀតថា ក្នុងករណីប្រជាពលរដ្ឋនៅទីតាំងប្រមូលផ្ដុំណាមួយលើសទី១៥នាទី វីរុសកូវីដ១៩ ពិសេសពពួកបំប្លែងខ្លួនថ្មី ងាយនឹងវាយប្រហារចូលក្នុងខ្លួនមនុស្សម្នាក់ៗខ្លាំងណាស់។ ត្រង់ចំណុចនេះ លោកស្រីបានណែនាំដល់ពលរដ្ឋ មុនទៅកាន់ទីផ្សារណាមួយ ដើម្បីទិញម្ហូបជាដើមនោះ ត្រូវគិតពីផ្ទះជាមុន ថាខ្លួនត្រូវទិញអ្វីខ្លះ លុះពេលទៅដល់ត្រូវប្រញាប់ប្រញាល់ដើម្បីត្រឡប់មកផ្ទះវិញ។
មន្ដ្រីជំនាញសុខាភិបាលរូបនេះ បានគូសបញ្ជាក់ទៀតថា មុនពេលធ្វើដំណើរទៅណាមកណា ប្រជាពលរដ្ឋម្នាក់ត្រូវតែប្រកាន់ខ្ជាប់នូវវិធានការការពារខ្លួន តាមរយៈការពាក់ម៉ាស និងដាក់ជែល ឬអាល់កុលជាប់ខ្លួន ដើម្បីបាញ់ការពារ និងសម្លាប់មេរោគ៕
